နေဗျဳဒဝ်၊ ဂျာန္နဝါရဳ (၂၇)
ပ္ဍဲကျာ်စေတဳ ကေုာံ ဘာလကျာ် မၞုံရးဒေသဇၞော် ကေုာံ တွဵုရးနာနာတံဂှ် သၞာဲဒဴနူဌာနမဆေၚ်စပ်တံ၊ ကောန်ဒပ်ကံၚ်ဇြဳပၞာန်တံ ကေုာံ ကောန်ဒပ်သိုဟ်ပၠိုတ်ပၟတ်တံ ပံၚ်တောဲသ္အးဇ္ၚး ကေုာံ လံက်ဍာ်ခပဵုကျာ်စေတဳတုဲ ပၠေၚ်လဝ်အန္တရာယ်ဂှ် ညးမစုက်လုက်ကဵု ဗွိုၚ်နေဗျဳဒဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုဂျာန္နဝါရဳ (၂၅) တ္ၚဲဏေံတေံ သီုကဵုပါလုပ်နေဗျဳဒဝ်၊ ကျာ်လ္ဂုၚ် မၞုံဍုၚ်လ္ဂုၚ်သၟးဟွံက ပ္ဍဲကဵုဘာလကျာ် ကေုာံ ကျာ်စေတဳ နူရးဒေသ ကေုာံ တွဵုရးတံဂှ် မွဲအခိၚ်ဓဝ် သွက်ဂွံလံက်ဍာ်ခပဵုကုကျာ် ကေုာံ သွက်ဂွံပံၚ်တောဲသ္အးဇ္ၚးဂှ် ကံၚ်ဇြဳပၞာန် ကၠတ်စၞောန်ပ္ညုၚ်လဝ် သ္ၚိတ်တ်ရ။
အတိုၚ်တၚ်စၞောန် ကံၚ်ဇြဳပၞာန်ဂှ် ပ္ဍဲကဵုကျာ်စေတဳ ကေုာံ ဘာလကျာ် မၞုံတွဵုရး ကေုာံ ရးဒေသတံဂှ် သၞာဲဒဴကံၚ်ဇြဳပၞာန်တံ ဒဒှ်ရကၠောန်သ္ပပံၚ်တောဲသ္အးဇ္ၚးလဝ်ဂှ်ကဵု လံက်လဝ်ဍာ်ခပဵု ကုကျာ်စေတဳတံဂှ် ထ္မံက်ထ္ၜးလဝ် ပ္ဍဲကဵုလိက်ပရိုၚ် တြးဝါဒကံၚ်ဇြဳပၞာန် ပ္ဍဲဂိတုဂျာန္နဝါရဳ (၂၆) ဂှ်ရ။
ပ္ဍဲလိက်ပရိုၚ်တြးဝါဒ ကံၚ်ဇြဳပၞာန်ဂှ် ပ္ဍဲကဵုကျာ်စေတဳ ကေုာံ ဘာလကျာ် မၞုံအပ္ဍဲရးဒေသဇၞော်တၞၚ်သဳ၊ ရးဗဂေါ၊ ရးဨရာဝတဳ၊ ရးသက်ကိုၚ်၊ ရးမဂွဵု၊ ရးမာန္တလေဝ် သီုကဵုပါလုပ် တွဵုရးရခေၚ်၊ သေံ၊ ချေၚ်၊ ကရေၚ်ဍာဲ၊ ကချေၚ်တံဂှ် ဗာ်ပသောၚ်အုပ်ခြုမ်တံ ကေုာံ လံက်ဍာ်ခပဵုကုကျာ် မပ္တံကဵု ကမၠောန်သ္အးဇ္ၚးတံဂှ် ကၠောန်ၜိုတ်လဝ်ရောၚ် လလောၚ်ပ္တိတ်လဝ်ရ။
အကြာပ်ဒပ်ဇၞော်ဒပ်ကျာ ဇြဳဒဳအေမ် ဇြေယျဂှ် နကဵုကံၚ်ဇြဳပၞာန် ပွမကၠောန်ၜိုတ်သာ်ဏံ အလုံကၟိန်ဍုၚ်မွဲ တုပ်ပ်ဂှ်ဝွံ ဒှ်ပွပၠေၚ်အန္တရာယ်တုဲ အခိၚ်မမံၚ်ဒၟံၚ် အပ္ဍဲဒပ်တေံဂှ် ကေၚ်ဂဗလဝ် လၟေၚ်ဒဒှ်သာ်ဏံရောၚ်ဂှ် သ္ဂးရ။
“အလုံမွဲကၟိန်ဍုၚ် ကၠောန်တုပ်ပ်ဟီုဂှ် ချိုတ်ပၠိုတ်ရ၊ ပၠေၚ်အန္တရာယ်ရဏောၚ်။ လ္တူနူမၞိဟ်ဓမ္မတာပိုယ်ဏံဂှ် ဍေံတံ ပတှ်ေယတြာ ဂၠိုၚ်ရ။ ကဆံၚ်သၠုၚ်ခ္ဍၚ် ဗေဒၚ်တံ၊ ယတြာတံဂှ် ကၠောန်ခ္ဍၚ်ရ။ မ္ၚးဏံရ ဂစိုတ်ဂယိုၚ်ဒၟံၚ်၊ ပ္ဍဲဒပ်တေံဂှ် အဝ်ယာဲအဲ ဖ္ဍောတ်ဒၟံၚ်ဓမ္မစက် ဟွံပိုတ်သ္ကုတ်ဟဂှ်ရ၊ ဖေက်ကွေံကွေံ။ လၟုဟ်လေဝ် ညအ်ဂှ် လ္တူနူမိက်ဂွံဂွံဓဝ်ပတှ်ေဂှ် ပၠေၚ်အန္တရာယ်ရဏောၚ်၊ လံက်ဍာ်ခပဵုကုကျာ်ဟီုဂှ်တှ်ေ အလုံမွဲကၟိန်ဍုၚ် ကၠောန်မွဲအခိၚ်ဓဝ်ဂှ်ရ ကၠောန်လဝ် နကဵုတၚ်စၞောန် တၞဟ်ခြာရဏောၚ်။ ပိုယ်တံလေဝ် အပ္ဍဲတေံဂှ် ဗီုဏံ ကေၚ်ဂဗလဝ်ရ” သာ်ဝွံ ညးသ္ဂးရ။
သ္အာၚ်နူဂှ်ပၠန် အတိုၚ်နဲတၠအဝဵုအဆက်က်တံ မကၠောန်လဝ်ဂှ် သုၚ်စောဲပရေၚ်ဘာသာတုဲ ပၠောပ်ဓဝ်ပတှ်ေ ကုညးဍုၚ်ကွာန်တုဲ ပ္ဍဲလက်ထက်ကံၚ်ဇြဳပၞာန်ဂှ်လေဝ် ကၠောန်သွက်အဝဵုဂွံတန်ကြန်ရဂှ် အကြာပ်ဒပ်ဇြေယျ ပါ်ပါဲလဝ်ရ။
ရေၚ်တၠုၚ်ဒၟံၚ် ပရေၚ်သ္အးဇ္ၚးပံၚ်ကောံ ပ္ဍဲကဵုကျာ် အလုံမွဲကၟိန်ဍုၚ်တံဂှ် သ္ကိုပ်ဝန်ဇၞော် နူတွဵုရး ကေုာံ ရးဒေသဇၞော် မဆေၚ်စပ်တံ၊ သ္ကိုပ်ရးတံ ကေုာံ ညးတာလျိုၚ်တံ ကၠုၚ်စိုပ်ကျောဝ်ဗဵုလဝ်တုဲ ရေၚ်တၠုၚ်ပ္ညဳပ္ညပ်ပံၚ်တောဲကဵုလဝ် အရာမနွံပၟိက်တံဂှ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)