လ္ဂုၚ်၊ ဂျူလာၚ် (၂၃)
ဟိုတ်နူတၚ်ပိုၚ်ကၞာတ် သြန်ဒဝ်ဠာ ကံၚ်ဇြဳပၞာန်တံသၟးဟွံက သီုကဵုအခက်အခုဲ လာၚ်ဇြေန်ဗၞိက်ပၠောပ်တံဂှ်တုဲ ပွမကၠောန်ပ္တိတ်ဂဥုဲဇဗ အပ္ဍဲကၟိန်ဍုၚ်တံ သွက်ဂွံဒေါအ်ဇူကၠုၚ် နွံဂှ် တၠကမၠောန်ပရေၚ်ကၠောန်ပ္တိတ်ဂဥုဲဇဗတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးကၠောန်ပ္တိတ်ဂဥုဲ အပ္ဍဲကၟိန်ဍုၚ်တံဝွံ မ္ၚးနူတၚ်ပိုၚ်ကၞာတ် သြန်ဒဝ်ဠာကံၚ်ဇြဳပၞာန်တံဂှ် ဗွဲကြဴၚုဟ်မးဒဝ်ဠာ သၠုၚ်တိုန်ကၠုၚ် ဂၠိုၚ်ကဵုဆတုဲ သွက်ဂွံရာန်ဒဝ်ဠာဂှ် ခက်ခုဲကၠုၚ်ကီု၊ ပ္ဍဲအရာပၠောပ် ဗၞိက်အပြောံတံဂှ်လေဝ် ဒၟါနူအခက်အခုဲ လာၚ်ဇြေန်ဗၞိက်ပၠောပ်တုဲ ဒးဆေၚ်ဒၟံၚ်မုက်ကဵု အကာဲအရာ ဒးဒေါအ်ဇူ ကမၠောန်တံရ။
တၠကမၠောန် ပရေၚ်ကၠောန်ပ္တိတ် ဂဥုဲဇဗမွဲတၠဂှ် ဟိုတ်နူတၚ်ဝါတ်ဂါတ် ပရေၚ်ပၠောပ်ကပေါတ်ဗၞိက် ဟွံဂွံတံဂှ်တုဲ ရုၚ်စက်ဂဥုဲဇဗတံ ဒးဂဗဒၟံၚ်ကဵု အကာဲအရာ ဒးကၟာတ်သီရောၚ်ဂှ် ဟီုရ။
“ပၠောပ်ကပေါတ်တံ ဟွံဂွံတုဲ ဒှ်အခက်အခုဲတၟာဂလိုၚ်၊ လၟုဟ်မ္ဂး ကမၠောန်ပိုယ်တံ ဒးကၟာတ်ရဏောၚ်၊ ပၠောပ်ပ္တိုန် ဗၞိက်အပြောံ ဟွံဂွံပုဟ်၊ ဗ္ကန်ကပေါတ် နူကဵုဍုၚ်သ္အာၚ် ဟွံဂွံပုဟ်ဟီုမ္ဂး ပါဲနူကၟာတ်ထောံကမၠောန်ဂှ် ဟွံမွဲရ” သာ်ဝွံ သ္ဂးရ။
အခိၚ်လၟုဟ်ဂှ် ဟိုတ်နူတၚ်ပိုၚ်ကၞာတ် လာၚ်ဇြေန်ဗၞိက်ပၠောပ် ကံၚ်ဇြဳပၞာန်တံတုဲ ပရေၚ်ဂဥုဲဇဗ လုပ်စိုပ်တံ သဝ်စှ်ေကၠုၚ် တီတီတုဲ အပ္ဍဲဗွဝ်ဖျာဂှ် ထပ်ဒးဆေၚ်ကၠုၚ်မုက် သီုကဵုဂဥုဲဇဗပိုတ်အိုတ်တံရ။
ဟိုတ်နူဂဥုဲဇဗ ပိုတ်အိုတ်ကၠုၚ်တုဲ ၚုဟ်မးဂဥုဲတံဝွံ တန်တဴကဵုလ္တူဂကူအဇာဂမၠိုၚ်တုဲ နူ(၃၀) တၟံကၠံ သၠုၚ်တိုန်ကၠုၚ် စဵုကဵု (၅၀) တၟံကၠံရ။
တၠကမၠောန် မပၠောပ်ပ္တိုန်ဒၟံၚ် ဂဥုဲဇဗ မွဲတၠဂှ် ဂဥုဲဇဗပိုတ်အိုတ်ဂှ်ဝွံ ဟိုတ်နူရာန်ကေတ်ဒဝ်ဠာ ဟွံဂွံဂှ်ကီု၊ သီုကဵုကံၚ်ဇြဳပၞာန် စကာကဵုပၠောပ်ဒၟံၚ်ဂဥုဲဇဗ နကဵုအပိုၚ်အခြာတံ မဒှ်ရဂှ် ဟီုရ။
“လၟုဟ် ပ္ဍဲဗွဝ်ဖျာဂှ် ကပေါတ်ပိုတ်ဒၟံၚ်တုဲ ဂွံရာန်ဂှ် ဝါတ်ဒၟံၚ်၊ ဒဝ်ဠာဂှ်လေဝ် တိုန်ဒၟံၚ်တၟာဂလိုၚ်၊ စၟဳစၟတ်လာၚ်ဇြေန်ပလံၚ်ပ္တိုန်ဂှ်လေဝ် အခိၚ်လံလ၊ စၟဳစၟတ်တုဲမ္ဂးလေဝ် ပမာဏဒးပၠောပ်ဂှ် ဒှ်ဒၟံၚ်ကဵုအပိုၚ်အခြာတုဲ ဒှ်အခက်အခုဲအိုတ်ရ” သာ်ဝွံ သ္ဂးရ။
ပ္ဍဲကၟိန်ဍုၚ်ဗၟာ ကပေါတ်မဆက်စပ်ကဵု ဂဥုဲဇဗတံဂှ် ပၠောပ်နၚ် နူကဵုဍုၚ်သေံ၊ ကြုက် ကေုာံ အိန္ဒိယတံ အဓိကတုဲ နကဵုပရေၚ်ကၠောန်ပ္တိတ် အပ္ဍဲကၟိန်ဍုၚ်တံဂှ် နူရုၚ်စက်ဂဥုဲ ကၟိန်ဍုၚ်ပိုၚ် (၅) ရုၚ်၊ ရုၚ်စက်ဂဥုဲ ပုဂ္ဂလိကပိုၚ် (၇) ရုၚ်တံဂှ် ကၠောန်ပ္တိတ်ဒၟံၚ် ဂကူအဇာ ဂဥုဲဇဗ အပံၚ် (၃၆၀) ပြၚ်ရ။
ဆ္ဂး ဒဒှ်မကၠောန်ပ္တိတ်အပ္ဍဲကၟိန်ဍုၚ်တံဂှ် တၚ်နွံပၟိက်ဗွဝ်ဖျာ (၁၅) တၟံကၠံဂှ်ဟေၚ် ကၠောန်ပ္တိတ်ကဵုမာန်ဒၟံၚ်ရ။
ပရိုၚ်−သြၚ်လောန်တိုၚ်(မ်)