တၞၚ်သဳ၊ ဂျူလာၚ် (၂၃)
အကြာဗော်သွးကောန်ဂကူကရေၚ် KNU ကဵု ဒပ်ပၞာန်ကဝ်တူလေဝ် မဒက်ပ္တန်လဝ်တၟိတံဂှ် ပရေၚ်ကယျာန်စာန်စးနွံမ္ဂး ရန်ပ္တဝ်ကဵု ဒတုဲဖဵုညးဍုၚ်ကွာန်တံတုဲ လစွံစိုတ်သၠဲသၠဲလးလး သွက်ဂွံပ္ညဳပ္ညပ်သောၚ်ကလးကေတ်အိုတ်ဂှ် ဂကောံသွာၚ်မှာဇန်နာနာ မဖျေံသ္ဇိုၚ် တၞၚ်သဳတံ ပ္တိတ်လိက်လစွံစိုတ် ဖ္တိုက်ဖ္အောဝ်လဝ်ရ။
တုဲကၠုၚ် ဂိတုဂျူလာၚ် (၁၉) တေံဂှ် သ္ကိုပ်က္ဍိုက်ပ်ပၞာန် KNDO တြေံ သ္ကိုပ်ဗိုလ်ဇၞော် သဝ်နေဝ်ဒါမျ မသ္ကိုပ်သ္ကတုဲ ဒဒှ်ရဒက်ပ္တန်လဝ် ကုဒပ်ပၞာန်ကဝ်တူလေဝ်ရောၚ် ဗွဲမလုပ်သၞောဝ် ကဵုသမ္တီလလောၚ်ပ္တိတ်လဝ်တုဲဂှ် ဗော်သွးကောန်ဂကူကရေၚ် KNU ပွမဒက်ပ္တန်သာ်ဏံတံဂှ် ဒဒှ်ရဟွံဒုၚ်တဲဂှ် လလောၚ်ပ္တိတ်လဝ်ရ။
စပ်ကဵုကိစ္စဏံတုဲ အကြာဂကောံဇြဟတ်ပၠန်ဂတး ဒစဵုဒစး ဒပ်ပၞာန်သီအဝဵု ပ္ဍဲဗလးတိဏံဂှ်တုဲ မနွံပၟိက်ကဵု ဖေဝ်ဒရာဒဳမဝ်ကရေဇြဳ မလုပ်ဒၟံၚ်ပေါဲဗ္တိုက် တဝ်စၞေဟ်ဒၟံၚ်ကဵု ကံၚ်ဇြဳပၞာန် နကဵုနဲကဲဇဳသာ်တံဂှ် ဟိုတ်နူလစွံစိုတ်တၞဟ်ခြာ မဟွံမွဲပၟိက်တံ ကဵု ပဋိပက္ခ ဖဵုအဆက်လက္ကရဴတံတုဲ သွက်ညးဍုၚ်ကွာန်တံ က္တဵုဒှ်ကၠေံ အခက်အခုဲတံမာန်ရောၚ်ဂှ် နကဵုဂကောံသွာၚ်မှာဇန်ပိုယ်တံ ဒှ်ဓဝိၚ်စံၚ်တူဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အကြာဂကောံဒပ်စဵုဒၞါညးဍုၚ်ကွာန် မရေၚ်တၠုၚ်ဒ္ဂေတ်ဗက်ဒၟံၚ် သၟဝ်အုပ်ဓုပ် ဒပ်ပၞာန် KNDO ကဵု KNLA မၞုံသၟဝ်သ္ကိုပ်သ္ကပရေၚ်ဍုၚ်ကွာန် ဗော်သွးကောန်ဂကူကရေၚ်တံကဵု ဒပ်စဵုဒၞါညးဍုၚ်ကွာန် အဖဝ်မိတ် ဒပ်ပၞာန်ကဝ်တူလေဝ် မဒက်ပ္တန်လဝ်တၟိလၟုဟ်တံဂှ်လေဝ် ယဝ်ရပရေၚ်ကယျာန်ဓဝါန်နွံမ္ဂး သွက်ဂွံသောၚ်ကလး ပ္ညဳပ္ညပ် နကဵုလစွံစိုတ် သၠဲသၠဲလးလးဂှ် ဖ္တိုက်ဖ္အောဝ်လဝ်ရ။
သ္အာၚ်နူဂှ်ပၠန် တိုၚ်ပ္ကဴရန်တၟံဇကုတံ ညံၚ်သၞောတ်တၠအဝဵုပၞာန်၊ ဝါဒမဟာဂကူတံ မပါလုပ် သၞောတ်တၠအဝဵုသာ်လဵုမွဲဟွံဟီု ရိုဟ်ကၞက်ဂွံပိုတ်အိုတ် ပၠိုတ်လလီုအာတုဲ ပ္ဍဲအရာမကွာ်ဂါမ်အာ တရဴကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳအနာဂတ်တေံ မၞုံကဵု အခေါၚ်ညဳသၟဟ်ကဆံၚ်တုပ် ကေုာံ အခေါၚ်စၞောန်ပျးအပိုၚ်တံဂှ် ပရေၚ်ဟွံတုပ်သၟဟ်တၞဟ်ခြာတံဂှ် ပကောံပကေဝ် နဒဒှ်ဇြဟတ်တုဲ ပံၚ်တောဲညဳသာ သွက်ဂွံရေၚ်တၠုၚ်ဂိုတ်ဂ္စါန်အာမာန်အိုတ်ဂှ် ဂကောံသွာၚ်မှာဇန်နာနာ မဖျေံသ္ဇိုၚ်တၞၚ်သဳတံ ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)