ကိယေပ်၊ ဂျာန္နဝါရဳ (၂၇)
အမေရိကာန် ကေုာံ ဂျာမနဳတံ ကြဴနူကဵုကတိ သွက်ဂွံဗလးကွဳစက်ခြပ်ပသဲ ပ္ဍဲမုက်ပၞာန်တေံတုဲဂှ် ရုယှာ ကၠောန်သ္ပလဝ် ပရေၚ်ဗ္တိုက်နကဵုကမ်လှောဝ်ဍေံ မတိတ်လက္ကရဴအိုတ်ဂှ်ရ အလဵုအသဳဂှ် ဖ္တိုက်ဖ္အောဝ်လဝ် ကောန်ဍုၚ်ယူကရုၚ်တံ သွက်ဂွံဂၠါဲဒၞါဲမံၚ်စ္ၜုဲစ္ၜော်တံရ။
သၟိၚ်တၠယူကရုၚ်တံဂှ် ကၠာပရေၚ်ပန်ပှော်ဇၞော်ဇၞော် ဒပ်ရုယှာတံ ဂွိုအ်က္တဵုဒှ်ဂှ် လလောၚ်ပ္တိတ်လဝ် တၚ်ကဵုသတိ ပရေၚ်ဗ္တိုက်တရဴကျာ သီုကဵုပါလုပ်ဍုၚ်ဇၞော်ကိယေပ် အလုံမွဲကၟိန်ဍုၚ်တံရ။
သ္ကိုပ်အုပ်ဓုပ်အရာပ်အဵုဒဳဇြာဂှ် ဒပ်ပၞာန်ဗလာဒဳမာပူတေန်ဝွံ သုၚ်စောဲက္ၜၚ်ကျာ ကေုာံ က္ၜၚ်တံတုဲ သွက်ဂွံဗ္တိုက် ယူကရုၚ် နကဵုကမ်လှောဝ်ဇၞော်ဇၞော်တံဂှ် ပလေဝ်ပလေတ်ဒၟံၚ်ရောၚ် ဟီုဂးလဝ်ရ။
“တတ်ကၠောံ ဒေသမိုက်ကဝ်လိုက်ဗ်တုဲ ပ္ဍဲကဵုတွဵုဒၞက်ယူကရုၚ်ပိုၚ် သ္ကုတ်ပလိုတ်သၟဝ်ကျာဂှ် ကမ်လှောဝ်တံ ပဝ်ဒၟံၚ် ၜါဖ္ဍိုက်ဟွံကရ” သာ်ဝွံ ဂးတုဲ သ္ကိုပ်အုပ်ဓုပ် မိုက်ကဝ်လိုက်ဗ် အတ်ဗလက်သ်ဂှ် ဒဒှ်ရဂွံဆဵုလဝ် ကမ်လှောဝ်ၜါဖ္ဍိုက် ပ္ဍဲကဵုအာပ်ထလဳဂရာမ်ဂှ် ဟီုဂးလဝ်ရ။
ကြဴနူတၚ်ကဵုသတိ ပရေၚ်ဗ္တိုက်တရဴကျာတံ မိက်တိတ်ကၠုၚ်တုဲဂှ် ပ္ဍဲဍုၚ်ဇၞော်ဂှ် မၞိဟ်လ္ၚဵုလ္ၚဵုတံ ဂ္ဇအ်ဒၟံၚ်လ္တူယာတ် ကေုာံ ခုၚ်ဂ္ဇအ်ပလာတ်သတေတ်တံဂှ်တုဲ လ္ၚဵုတံဂှ် စ္ၜုဲစ္ၜော်ဒၟံၚ် ပ္ဍဲကဵုသၞေဟ်ကွဳပၟတ်သၟဝ်တိတံရဂှ် ဌာန်ပရိုၚ်ရာ်တာ ထ္မံက်ထ္ၜးလဝ်ရ။
အတိုၚ်ဂလာန်သၞာဲဒဴကဆံၚ်လ္တူ ယူကရုၚ်တံဂှ်မ္ဂး ဒပ်ပရေၚ်စဵုဒၞါသၞတရဴကျာတံဝွံ ပန်ဖျေံလဝ် ကမ်လှောဝ်ရုယှာ မလုပ်ကၠုၚ်လဝ်တံဂှ် သ္ဂးရ။
ၜိုန်ရရုယှာ ဘပဠဒၟံၚ် မဟာမိတ်တံကီုလေဝ် ဂျာမနဳ မကဵုလဝ်အခေါၚ် ကုအခေါၚ်ပလံၚ်ဗစိုပ်ဍေံတံဂှ် လလောၚ်တြးလဝ် ထံက်ပၚ်ကဵု ယူကရုၚ် Leopard 2 ကွဳစက်ခြပ်ပသဲ (၁၄) ဖ္ဍိုက်ရောၚ်တုဲ အမေရိကာန်ဂှ် ဗလးကဵုအာ ကွဳစက်ခြပ်ပသဲ M1 Abrams (၃၁) ဖ္ဍိုက်ရောၚ်တုဲ ကၠောန်သ္ပအာ ပရေၚ်ပ္ကတ်ပ္ကေၚ်တံရောၚ် အမေရိကာန် သ္ပလဝ်ဒတန်ရ။
ပ္ဍဲဂိတုဏံ အခိၚ်ပြဟ်ဟ်တေံဂှ် နကဵုအလဵုအသဳယူကရုၚ်လေဝ် သွက်ဂွံဗလး Challenger 2 ကွဳစက်ခြပ်ပသဲ (၁၄) ဖ္ဍိုက်ဂှ် ကဵုလဝ်ကတိတုဲ ဗျိတိၚ်ဂှ်လေဝ် သွက်ဂွံထံက်ပၚ် ကုယူကရုၚ်ဂှ် ဗလးကဵုအာ ကွဳစက်ခြပ်ပသဲလုပ်ပေါဲဗ္တိုက်အဓိကရောၚ် သာ်ဝွံ ဒှ်ကၠုၚ်ဍုၚ်ပလိုတ် မကဵုကၠုၚ်ကတိ ကိုပ်ကၠာအိုတ်ရ။
တၚ်သ္ဂုတ်သွာတ်ဂျာမနဳ မသ္ပဒတန် ကုဒဒှ်မပလံၚ်ဗစိုပ်ကွဳစက်ခြပ်ပသဲ Leopard ဂှ်ဝွံ သ္ကဵုပဋိပက္ခ ဇၞော်ကၠုၚ်ဏောၚ်ဂှ် ရုယှာ ကဵုလဝ်သတိတုဲ “တၚ်သ္ဂုတ်သွာတ် အန္တရာယ်ဇၞော်ဗွဲမလောန်ဏံဂှ် ကော်ဏာ ကဆံၚ်ပတဝ်မုက်ဒိဓဗတ် ပဋိပက္ခတၟိမွဲရောၚ်” ဂှ် ကလုတ်တမာန်ရုယှာ စပ်ကဵုဍုၚ်ဂျာမနဳ သာဂျဳနဳချာယက် ဟီုဂးလဝ်ရ။
သမ္မတယူကရုၚ်ဂှ် ပ္ဍဲကဵုဂလာန်ပၟိၚ်ညး လၟေၚ်ဗ္တံဂှ် သွက်ဂွံရီုဗၚ်ကဵု ပ္ဍဲအရာကလေၚ်ဗ္တိုက် ကုရုယှာဂှ် ဟိုတ်နူတုပ်လဝ်စိုတ် သွက်ဂွံဗလးကဵု ကွဳစက်ခြပ်ပသဲတံဂှ်ရ ဒဒှ်ရတၚ်တဴဂုဏ် ကုက္ဍိုပ်သ္ကိုပ်ဍုၚ်ပလိုတ်တံဂှ် ဟီုဂးလဝ်တုဲ သွက်ဂွံကၠောန်ၜိုတ်ကဵု ဗွဲမပြဟ်ဂှ် ထပ်အာတ်မိက်လဝ်ရ။
Ref: iNews