ၜဳကလေၚ်၊ ဂျာန္နဝါရဳ(၂၉)
တွဵုရးဍုၚ်မန်၊ ပွိုၚ်ဍုၚ်ၜဳကလေၚ်၊ ဒပ်အမၠံက်ကံၚ်ဇြဳပၞာန် စၟတ်(၃၁၄) မၞုံပ္ဍဲကွာန်ဇြဳဝန်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၂၇)ဂှ် ဒးဒုၚ်ဗတိုက်လဝ် နကဵုဒရုမ် ပ္ဍဲအခိၚ်ဇိုၚ်သဝ်တ္ၚဲကဵု အခိၚ်ဗ္တံရဂှ် ဂွံတီကေတ် နူညးဒေသတအ်ကီု သီုဂကောံဇြဟတ်ပၠန်ဂတးတအ်ရ။
ဒပ်အမၠံက်ကံၚ်ဇြဳပၞာန်ဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် သုၚ်စောဲလဝ် လွဟ်ဇၞော် ၆၀ မမ တုဲ အာစိုပ်ဗတိုက်လဝ် ဗၞတ်ၜါဝါပေၚ်ၚ်ရ။
ပ္ဍဲပရေၚ်ဗတိုက်လဝ် နကဵုဒရုမ်ဂှ် လွဟ်ဇၞော် ၆၀ မမ တအ် ၜိုန်ရဒတုံပြဟ် ခတိုဟ်လဝ် ပ္ဍဲဗွိုၚ်ဒပ်ကံၚ်ဇြဳပၞာန်ကီုလေဝ် အကာဲအရာဇီုကပိုက်ချိုတ်ဂျိုၚ်လဝ် ဆက်ဂၠိုက်ဂၠာဲ ပကောံပကေဝ်ဒၟံၚ်ရဂှ် ဂွံတီကေတ်ရ။
ကြဴနူဒပ်အမၠံက်ကံၚ်ဇြဳပၞာန် ဒးဒုၚ်ဗတိုက်လဝ်တုဲ ဟိုတ်နူလပါ်ကံၚ်ဇြဳပၞာန် ပန်ဖျေံနၚ်လွဟ်ဇၞော် ပ္ဍဲကဵုကွာန်တအ် အဆက်ဟွံပိုတ်သ္ကုတ်တုဲ ပြေၚ် ပ္ဍဲကွာန်ဒေါၚ်ယွာ ၜါ ဇီုကပိုက်ဒးလဝ်ဘဲဝပ်ရဂှ် ညးဒေသတအ် ဟီုသ္ဂးလဝ်ရ။
ဒပ်ပံၚ်ကောံ KNLA ဂှ်တ္ၚဲဏံ ပ္ဍဲအခိၚ်နူဂယးဂှ်လေဝ် ပ္ဍဲလတူဍာန်ကွဳစက် လဂုၚ်မတ်မလီု ကွာန်ဒေါက်ယျာတ်၊ ပွိုၚ်ဍုၚ်ၜဳကလေၚ်ဂှ် တန်ရေၚ်ကွဳစက်ကံၚ်ဇြဳပၞာန် (၁၀)ဖ္ဍိုက် တံၚ်ခတိုဟ်ဗတိုက်လဝ် မာၚ်ရ။
ဟိုတ်နူတံၚ်ခတိုဟ်လဝ်မာၚ်တုဲ ပရေၚ်ပန်ပှော်ၜါလပါ် က္တဵုဒှ်လဝ်ကီု ကောန်ဒပ်ကံၚ်ဇြဳပၞာန် (၃)တၠ ဒးချိုတ်လဝ်တုဲ (၁)တၠဂှ်မ္ဂး ဒးလဝ်ဘဲဝပ် သ္ကာတ်တ်မြဟ်ဟ်ရ။
ကြဴနူဒှ်လဝ် ပရေၚ်ပန်ပှော်တုဲ ဒပ်ကံၚ်ဇြဳပၞာန် လုပ်စိုပ်ကၠုၚ် ကွာန်ဒေါက်ယျာတ်တုဲ စံၚ်ပလီုလဝ် သ္ၚိဒၟံၚ်ညးဍုၚ်ကွာန်တအ် (၃)မကီု သ္ၚိမွဲမဂှ်လေဝ် ပန်ပလီုလဝ် နကဵုလွဟ်ဇၞော်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)