လွိုၚ်ကဝ်၊ ဂျာန္နဝါရဳ(၂၉)
တွဵုရးကရေၚ်ဍာဲ၊ ပ္ဍဲပွိုၚ်ဍုၚ်လွိုၚ်ကဝ် သီုပေါဲဗတိုက်က္တဵုဒှ်ဟၟဲမွဲသာ် ဒၟာနူဒပ်ကံၚ်ဇြဳပၞာန် ကၠောန်ကၠုၚ်ပရေၚ်ပန်ပှော် နကဵုက္ၜၚ်ကျာ ပွိုၚ် (၃)တ္ၚဲဆက်က်ဂှ်ရ နကဵုညးဒေသဂမၠိုၚ် သွက်ဂွံခါဲစွံလဝ်ဥမၚ်ဂှ် ဒပ်စဵုဒၞာကောန်ဂကူကရေၚ်ဍာဲ ကဵုကၠုၚ်သတိ လလောၚ်တြးလဝ်ရ။
ပ္ဍဲဂိတုဂျာန္နဝါရဳ စတမ်နူ စၟတ်တ္ၚဲ (၂၂) တုဲ ဒပ်ကံၚ်ဇြဳပၞာန် ကၠောန်ကၠုၚ်ပရေၚ်ပန်ဗတိုက် နကဵုက္ၜၚ်ကျာဂျေတ်၊ ပရေၚ်ထံၚ်ပရိုၚ် နကဵုဒရုမ်၊ ပရေၚ်ပဝ်ယာန်အာ နကဵုက္ၜၚ်ကျာဂျေတ် ပ္ဍဲဗ္ဒာဲဗ္ဒပ်ပါဲပၞာန်တအ် ကြပ်ပ်ရ။
ဟိုတ်နူကံၚ်ဇြဳပၞာန် ဗတိုက်လဝ် နကဵုက္ၜၚ်ကျာတုဲ နကဵုညးဍုၚ်ကွာန်ဂမၠိုၚ် သွက်ဂွံခါဲစွံလဝ် ဥမၚ်ကီု ယဝ်က္ၜၚ်ကျာ ပဝ်ကၠုၚ်မ္ဂး ညံၚ်ဟွံဂွံသ္ပ ပရေၚ်ဂြိပ်တိတ်အာ ဟၟဲဒၞာဲဌာန်ပ္တဝ်က္ဍိုပ်ကီု၊ ညံၚ်ဟွံဂွံတိတ်ရံၚ်ကျောဝ်ကီု၊ ညံၚ်ဟွံဂွံတက်ဗီု-ဗဳဒဳယောတအ်ကီု သီုညံၚ်ဟွံဂွံသ္ပ ပရေၚ်ကောံကလောံ ပ္ဍဲဒၞာဲပါဲဓလေတ်ဗုမ်ဟွံသေၚ်ကီုဂှ် ဗတိုက်ဖ္အောဝ်လဝ်ရ။
ပ္ဍဲဒေသလွိုၚ်ကဝ်ဂှ် ပ္ဍဲကဵုဂိတုဂျာန္နဝါရဳ နူကဵုစၟတ်တ္ၚဲ (၂၂) စဵုကဵုစၟတ်တ္ၚဲ (၂၄) သီုပေါဲဗတိုက်ဟၟဲမွဲသာ် ဒပ်ကံၚ်ဇြဳပၞာန် ပန်ဗတိုက်ကၠုၚ် နကဵုက္ၜၚ်ကျာ ပွိုၚ်(၃)တ္ၚဲဆက်က်ရ။
ဟိုတ်နူပရေၚ်ပန်ဗတိုက်ဂှ်တုဲ ပ္ဍဲလပါ်ဗၟံက်ဍုၚ်လွိုၚ်ကဝ် သ္ၚိဌာန်ညးဍုၚ်ကွာန်ဂမၠိုၚ် ဒးဇီုကပိုက်လီုလာ်လဝ်နွံတုဲ ပ္ဍဲဗ္ဒပ်ပါဲပၞာန် ဒဳမအ်သိုဝ်လေဝ် ဟိုတ်နူပရေၚ်ကံၚ်ဇြဳပၞာန် ပန်ဖျေံဏာလဝ်လွဟ်ဇၞော်တုဲ ဒးပဆုဲပြံၚ်လဝ်ဒၞာဲ နဒဒှ်ကာတၟေၚ်ရ။
ပ္ဍဲကၟိန်ဍုၚ်ဗၟာ ကြဴနူဒပ်ပၞာန်သီအဝဵုတုဲဂှ် ဟိုတ်နူပရေၚ်ဒပ်ကံၚ်ဇြဳပၞာန် ပန်ပှော်ကၠုၚ် နကဵုက္ၜၚ်ကျာတုဲ ညးဍုၚ်ကွာန်ဂမၠိုၚ် (၂၀၀)တၠပြၚ် ဒးချိုတ်ကၠုၚ်လဝ်နွံတုဲ ပ္ဍဲတွဵုရးကရေၚ်ဍာဲဂှ် ပရေၚ်ပန်ပှော် နကဵုက္ၜၚ်ကျာ လၟိဟ်(၁၈၀) ဝါပြၚ် ကၠောန်လဝ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)