ရေဝ်၊ ဂျာန္နဝါရဳ(၂၉)
ပ္ဍဲဂၠံၚ်ကွဳစက် ဇြပ်ဗု-ရေဝ် မၞုံအကြာကွာန်ကၞေၚ်ကၟအ်ကဵု ကွာန်အောၚ်သာယျာ၊ ဍုၚ်လၟိုၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ပ္ဍဲဂိတုဂျာန္နဝါရဳ စၟတ်တ္ၚဲ (၂၇) အခိၚ်ဇိုၚ်သဝ်တ္ၚဲ ၜိုတ်(၇)နာဍဳကဝက်ဂှ် ဂဗုတ်ကွဳစက်ဇီုတေက် က္တဵုဒှ်လဝ်တုဲ မၞိဟ်(၅)တၠ ပါလုပ်သီုကောန်ၚာ် သၟတ်ဗြဴမွဲတၠ ဒးချိုတ်အာလဝ်ရဂှ် ဂွံတီကေတ် နူညးဒေသတအ်ရ။
ဂဗုတ်ကွဳစက်ဇီုတေက်ဂှ် ကွဳစက်ဒ္ၚောဝ်လုၚ် ဒဳကၠုၚ်လပါ်ဇြပ်ဗု တိုန်ကၠုၚ် နူရေဝ်မွဲဖ္ဍိုက်ကဵု ကွဳစက်ပရိုဝ်ဗံက်စှ်ေရေဝ် နူလပါ်ဇြပ်ဗုတအ် ဇီုတေက်ဒးလဝ်ညးသ္ကအ်ရ။
ဟိုတ်နူ ဂဗုတ်ကွဳစက်ဇီုတေက်ဂှ်တုဲ ညးဒဳကွဳစက်ကီု သီုကောန်ၚာ်ဗြဴ အာယုက်(၇) သၞာံမွဲတၠ သီုမၞိဟ်ဗြဴ (၃)တၠ ဍိုက်ဗက်ကၠုၚ် ကွဳစက်ပရိုဝ်ဗံက်ဂှ် ဒးချိုတ်လဝ်လွာဲဂှ်ရဂှ် ဂကောံသၟတ်ပရဟိတလၟိုၚ် ဖျေံသ္ဇိုၚ်ပွိုၚ်ဍုၚ်ရေဝ် အာစိုပ်ရီုဗၚ်ကဵုလဝ် ပ္ဍဲဒၞာဲဒှ်ပရေၚ်ပရောဂှ် ဟီုသ္ဂးလဝ်ရ။
“Dead Body တအ် ကြေပ်မံၚ် အကြာကွဳစက်တုဲ ဂကောံရီုဗၚ်ပရေၚ်မၞိဟ် ၜိုပ်ထဝ်ကီု၊ ဂကောံပိုဲကီု၊ တုဲတှ်ေ ဂကောံစွံမေတ္တာရီုဗၚ်ပရေၚ်မၞိဟ်(အဇြေန်) ကီု၊ ညးဍုၚ်ကွာန် နွံဒၟံၚ်ဇိုၚ်ၚ်ဗ္ဒာဲတအ် ဘိုၚ်ပ္တိတ်ကဵုလဝ်ရ”ဂှ် ညးတာလျိုၚ် ဂကောံပရဟိတလၟိုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲတွဵုရးဍုၚ်မန် ပွိုၚ်ဍုၚ်ရေဝ် ဂၠံၚ်ဇြပ်ဗု-ရေဝ်ဂှ် ပ္ဍဲအခိၚ်ဗ္တံမ္ဂး ပရေၚ်ယာဉ်ဇီုတေက် က္တဵုဒှ်ဒၟံၚ်မွဲခဏမွဲခဏတုဲ ပရေၚ်မၞိဟ်ဒးချိုတ် နွံဒၟံၚ်ရဂှ် ဂွံတီကေတ် နူဂကောံရီုဗၚ်ပရေၚ်မၞိဟ် ဖျေံသ္ဇိုၚ်တွဵုရးဍုၚ်မန်တအ်ရ။
ပရိုၚ်-သြၚ်လောန်တိုၚ်(မ်)