လဳမာ – ဂျာန္နဝါရဳ(၂၉)
ပ္ဍဲပဳရူ ဟိုတ်နူပရေၚ်ထ္ၜးဆန္ဒ ဒစဵုဒစးကဵုပရေၚ်သမ္မတက္ဍိုက်က္ဍိုပ် မၞိဟ်ဒးဒုၚ်ချိုတ်လဝ် ဂၠိုၚ်ကဵုဒါဇြေန်ဂှ်တုဲ တၚ်အာတ်သမ္မတ ဒဳနာဘိုဝ်လာတဳ သွက်ဂွံကၠောန်ဗဒှ် ပေါဲရုဲမာဲ ပ္ဍဲဂိတုဒဳဇြေမ်ဗာ သၞာံ ၂၀၂၃ ဏံဂှ် ကၠတ်ထဝ်ကောန်ဂရေတ်ပဳရူ တးပါဲကၠုၚ်ရ။
အခိၚ်လၟုဟ်ဏံမ္ဂး ကၟိန်ဍုၚ်ပဳရူဂှ် ရုပ်သီလဝ် ကောန်ကရေတ်တုဲ ကြဴနူသမ္မတတြေံ ပေတ်ဒရိုဝ်ကာတ်သတေဝ်လိုဝ် ဒးဒုၚ်ရပ်လဝ် နကဵုအသံပၟိၚ် ပရေၚ်အုပ်ဓုပ်တုဲဂှ် ပေါဲထ္ၜးဆန္ဒတအ် က္တဵုဒှ်ကၠုၚ်ဒၟံၚ် ဇၟာပ်ဒဒှ်တ္ၚဲတုဲ ဒးဆေၚ်မံၚ်မုက်ကဵု အကြေပ်အဂြတ်ပရေၚ်ဍုၚ်ကွာန်ရ။
ပရေၚ် ညးထံက်ဂလာန်သမ္မတတြေံတအ် အာမိက်လဝ် သွက်နာဲဗြဴဂှ် ဂွံနုက်တိတ် နူဌာနန္တရတုဲ သွက်ဂွံကၠောန်ဗဒှ်ပေါဲရုဲမာဲကီု ဟိုတ်နူဂၠံၚ်ဓရိပ်တရဴဇမ္ၚောဲ ကၟာတ်ဆိုအ်ဗတုဲ ပရေၚ်ဇွောံမ၊ ကၠေၚ်ဍေန် ကေုာံဇွောံမသ္ဇိုၚ်တၞဟ်သ္အာၚ်တအ် ပိုတ်သ္ကုတ်အာဂမၠိုၚ် က္တဵုဒှ်ဒၟံၚ်ရဂှ် ဂွံတီကေတ်ရ။
သမ္မတပဳရူ ဒးဆေၚ်ဒၟံၚ်မုက်ကဵု ပရေၚ်ထ္ၜးဆန္ဒ အဆက်ဟွံပိုတ်သ္ကုတ်ဂှ် သွက်ဂွံသောၚ်ကလး အကြေပ်အဂြတ်ပရေၚ်ဍုၚ်ကွာန် ၜိုန်ရဖ္အောဝ်ဗတိုက်လဝ် ကၠတ်ထဝ်ကောန်ကရေတ် သွက်ဂွံပါ်မာဲကီုလေဝ် ပ္ဍဲကောံဓရီုဆေၚ်မုက်ကၠောန်ဗဒှ်လဝ် ပ္ဍဲကဵုဂိတုဂျာန္နဝါရဳ စၟတ်တ္ၚဲ (၂၈)ဂှ်မ္ဂး ကၠတ်ထဝ်ကောန်ကရေတ် တးပါဲလဝ် နကဵုမာဲထံက်ဂလာန် (၄၅)မာဲ၊ မာဲဒစဵုဒစး (၆၅)မာဲ ကေုာံမာဲမံၚ်အကြာ (၂)မာဲရ။
“တၚ်ပတိုန်ထ္ၜး ပရေၚ်ပလေဝ်ပလေတ်ပြံၚ်သၠာဲ သၞောဝ်သ္ဇိုၚ်ဒက်ပ္တန် သွက်ဂွံကၠောန်ဗဒှ် ပေါဲရုဲမာဲဂှ် တးပါဲဏာ နကဵုမာဲဏံရ” ဂှ် ဥက္ကဋ္ဌကောန်ကရေတ် ဂျိုဝ်သ်ဝဳလဳယာမ် ဟီုသ္ဂးလဝ် ကြဴနူပရေၚ်ဟီုဂးကယျာန်ဓဝါန် လအ်ပွိုၚ် (၇)နာဍဳတုဲဂှ်ရ။
ဗော်လၟောဝ်လပါ်ပါဲတအ်ဂှ် အာတ်မိက်လဝ် ညံၚ်ပရေၚ်တဴတက်ပေါဲရုဲမာဲ ဂွံပါလုပ် ကရောံကောဗေန်ယှေန် မပါလုပ်ဒၟံၚ် ပ္ဍဲသ္ဇိုၚ်သၞောဝ်ဒက်ပ္တန်မွဲတုဲ ညးထ္ၜးဆန္ဒဂမၠိုၚ်လေဝ် အာတ်မိက်ကၠုၚ်လဝ် အဆက်ကဵု အဆက်ရ။
ကြဴနူသ္ဂုတ်သွာတ်ပါ်မာဲတုဲ ဥက္ကဋ္ဌကောန်ကရေတ် ဝဳလဳယာမ်ဂှ် ဂွံဒုၚ်ကေတ်တဲ တၚ်အာတ်မိက် ပရေၚ်ကလေၚ်သ္ၚဳဂၠိပ် သဳကၠဳပတိုန်ထ္ၜး ပ္ဍဲကောံဓရီုတၟိမာန်တုဲ သွက်ဂွံကလေၚ်ဂတးဂတန် တၚ်သ္ဂုတ်သွာတ်ဏံမာန် ခက်ခုဲဒၟံၚ်ရောၚ်ဂှ် ဟီုသ္ဂးလဝ်ရ။
ညးထ္ၜးဆန္ဒတအ်ဂှ် သ္အာၚ်နူသွက်ဂွံကၠောန်ဗဒှ် ပေါဲရုဲမာဲပြဟ်ဟ်လွာဲလၟုဟ်ဂှ်တုဲ ညံၚ်ဂွံပါဲပ္တိတ်ထောံ ဘိုဝ်လာတဳကီု၊ ညံၚ်ဂွံရုပ်သီထောံ ကၠတ်ထဝ်ကောန်ကရေတ်ကီု၊ သီုကဵုသ္ဇိုၚ်သၞောဝ်ဒက်ပ္တန်တၟိ မွဲတန်ဂှ်လေဝ် အာတ်မိက်လဝ်ရ။
“သွက်ဂွံကေမ်ဇျှာပ်လဝ်အဝဵုဂှ် ညးဂှ်လေဝ် စိုတ်ဟွံလုပ်စပုဟ်။ ညံၚ်အာယုက်သမ္မတ ဂွံဆက်သှ်ေဂှ်လေဝ် ပၟိက်အဲဟၟဲပုဟ်၊ ယဝ်ရစိုပ်ဒၟံၚ်ဒၞာဲဏံတှ်ေ အရာဏံဂှ် ဒှ်ပရေၚ်တာလျိုၚ်ပြေပြံၚ် အတိုၚ်ပါလုပ်ဒၟံၚ် ပ္ဍဲသၞောဝ်သ္ဇိုၚ်ဒက်ပ္တန်ရ” ဂှ် သမ္မတပဳရူ ဟီုသ္ဂးလဝ်ရ။
ဗော်သီုဖအိုတ်တအ် သွက်ဂွံကၠောန်သ္ပအာ နကဵုပရေၚ်ထိၚ်ဒဝ်ကေုာံ သီုကဵုဟွံပ္ကီုပရာပ်မွဲသာ် ညံၚ်ဂွံကၠောန်အာ ပရေၚ်သဳကၠဳ ညိၚ်ၚ်ဝတ်တ်ဂှ် အာတ်မိက်လဝ်တုဲ ဒှ်ဒၟံၚ်ဓဝိၚ် ဂွိၚ်ဂွာဲကဵု ပရေၚ်ပ္ကီုပရာပ် လတူပရေၚ်ထ္ၜးဆန္ဒတအ်ရဂှ် ဌာနဝန်ဇၞော်ပရေၚ်ဍုၚ်သ္အာၚ်အမေရိကာန် ဟီုသ္ဂးလဝ်ကဵု သၟာပရိုၚ်ဂမၠိုၚ်ရ။
Ref,Malay Mail