ပျုၚ်ယာန်၊ ဂျာန္နဝါရဳ (၃၀)
တၚ်သ္ဂုတ်သွာတ်အမေရိကာန် မထံက်ပၚ်ပလံၚ်ဗစိုပ် ကွဳစက်ခြပ်ပသဲဂတာပ်ခေတ် ကုယူကရုၚ် သွက်ဂွံရီုဗၚ် ပ္ဍဲအရာဗ္တိုက် ကုဂကောံဒပ်ရုယှာတံဂှ် ဒေံဗြဴ က္ဍိုပ်သ္ကိုပ်ကေန်ဂျုၚ်အာန် မဒှ်ပူဂဵုသြဇာဇၞော်မွဲတၠ ပ္ဍဲကိုဝ်ရဳယျာသၟဝ်ကျာ ကေန်ယောဂျောန် ဗျိပၠုတ်ဟီုဖျေံလဝ်ကဝုရ။
အမေရိကာန်ဝွံ ဖံက်ပ္ကဝ် စေဝ်ပၞောန်ပရေၚ်ဂီုကၠီုသၠုၚ်အိုတ်ဂှ်တုဲ သၠုၚ်ပ္တိုန်ဒၟံၚ်အသိၚ်ပေါဲပၞာန် မဖန်ဗဒှ်လဝ် သွက်ဂွံပလီုရုယှာရောၚ်ဂှ် စောတ်စောဲလဝ်ရ။
ပ္ဍဲဂိတုဂျာန္နဝါရဳ (၂၇) ဂှ် ကေန်ယောဂျောန် ဟီုဂးလဝ်သာ်ဏံတုဲ စပ်ကဵုပေါဲပၞာန်ယူကရုၚ်တုဲ ကဵုက္ဍိုပ်ထ္မံက်ထ္ၜးလဝ် ပရေၚ်ဆက်ဆောံမဇြိုဟ်နက် ရုယှာ ကေုာံ ကိုဝ်ရဳယျာသၟဝ်ကျာဂှ်တုဲ ဟိုတ်နူအစဳဇန်ကမ်လှောဝ် ကေုာံ လွဟ်လက်နက်အနုလက်ကၠိုက်ဍေံတံ ဇြဟတ်မဇၞော်ကၠုၚ်ဒၟံၚ် သိုက်က်ဂှ်တုဲ ပ္တဝ်သြိုဟ်ဆေၚ်ထောံမုက် ကုအမေရိကာန် ကေုာံ မဟာမိတ်အာယှတံ မဒှ်ရ။
“အမေရိကာန် ဒဒှ်မထံက်ပၚ်ကဵုလွဟ် ကုဒပ်ပၞာန်ယူကရုၚ် သွက်ပၞာန်ထ္ပက်ဗလးတိဂှ်ဝွံ အကာဲအရာပေါဲပၞာန် သာတုဲဂၠိုၚ်ကၠုၚ်ဒၟံၚ်ဂှ် ဂွိၚ်တဴဗွဲမဇြိုဟ်နက်ရောၚ်” သာ်ဝွံ ကေန်ယောဂျောန် လလောၚ်ပ္တိတ်လဝ် လစွံစိုတ်ညး ကိုပ်ကၠာအိုတ်ရ။
“အမေရိကာန်ဂှ် ဘပဠ ပရေၚ်ဂီုကၠီုမဟာဗျူဟာရုယှာ ဗွဲမသ္ကာတ်မြဟ်တုဲ ညံၚ်အကာဲအရာအပ္ဍဲဒေသ မသ္ကဵုက္တဵုဒှ်ကၠေံပွကော်ဆဴမွဲ ဂွံစိုပ်ကဆံၚ်သ္ဇက်ဒးဂွိၚ်ဂှ် ဒှ်ၝတၠဒုဟ်ရာဇာဝတ် မဓရိုဟ်ပလံၚ်ဒၟံၚ်ရောၚ်” သာ်ဝွံ ကေန် ဟီုဂးလဝ်ရ။
သ္အာၚ်နူဂှ်ပၠန် “ကပေါတ်လွဟ်လက်နက် အမေရိကာန် ကေုာံ ဍုၚ်ပလိုတ်ဂမၠိုၚ် မဟီုကြီုစလဝ်တံဝွံ အခါရဒးဆေၚ်မုက် ကုဒပ်ပၞာန်ရုယှာ ကေုာံ စိုတ်ဓာတ်ဟွံမိက်ဒုၚ်ကျ ညးဍုၚ်ကွာန်တံ ကေုာံ စိုတ်ဓာတ်ပရေၚ်ဗ္တိုက် မတုပ်သၟဟ်ကဵုသရာဲသ္ဂံၚ်တံဂှ်မ္ဂး တူကၠိုက်အာအိုတ်ဂှ် အဲ ဟွံဒှ်သံသယပုဟ်” သာ်ဝွံ ဂးတုဲ ကိုဝ်ရဳယျာသၟဝ်ကျာဝွံ ဒတူလိုၚ်ကရောံရုယှာရောၚ်ဂှ် ညး သ္ဂးရ။
သမ္မတအမေရိကာန် ဂျဵုဗိုၚ်ဒေန်ဝွံ ဒၟါနူဗလးကၠေံ ကွဳစက်ခြပ်ပသဲအဓိက ကုယူကရုၚ်တံဂှ်တုဲ ဒဒှ်ရတတ်ၜက်ဒၟံၚ် စေဝ်ပၞောန်ပရေၚ်ဂီုကၠီုရောၚ်ဂှ် ကေန် ဟီုဂးလဝ်တုဲ ပြဝဏံဝွံ သ္ကဵုမံက်ထေၚ်တဴ တၚ်ရန်တၟံပရေံပရေံ သွက်ဂွံသၠဲပ္တိတ်ပေါဲပၞာန် ကေုာံ သွက်ဂွံပလီုရုယှာ နကဵုအရီုဗၚ်မ္ၚးတံရောၚ်ဂှ် ကေန် ဟီုဂးလဝ်ရ။
လ္တူအကြေပ်အဂြတ် ဍုၚ်ယူကရုၚ် မဒးဂဗဒၟံၚ်တံဂှ် ကိုဝ်ရဳယျာသၟဝ်ကျာ ပ္တိုန်လဝ်ဒုဟ် ကုအမေရိကာန်တုဲ ဟိုတ်တူပဝ်လဇြဳ ဂကောံဍုၚ်ရးပလိုတ်တံ မအုပ်ဓလီုတံဂှ်တုဲ ရုယှာဝွံ သွက်ဂွံစဵုဒၞါပရေၚ်ဂီုကၠီုကၟိန်ဍုၚ်ဂှ် ဒးခၠေဝ်ပလန်လဝ် နကဵုပရေၚ်ပၞာန်ရောၚ်ဂှ် ဟီုဂးလဝ် ဗိုန်န်ခိုၚ်ၚ်ရ။
ကိုဝ်ရဳယျာသၟဝ်ကျာဝွံ ပါဲနူကဵုရုယှာ ကေုာံသဳရဳယျာတံတုဲ ဒှ်ကၟိန်ဍုၚ်မွဲဍုၚ်ဓဝ် မသ္ပလဝ်စၟတ်သမ္တီ ကုပရေၚ်ဗၠးၜး ဒေသပါ်တိတ် ရုယှာမကဵုလဝ်အထံက်အရီုလက္ကရဴ မၞုံသ္ကုတ်ဗၟံက်ယူကရုၚ်တံဂှ်ရ။ သ္အာၚ်နူဂှ်ပၠန် အစဳဇန်ဗလး သၟာကမၠောန် သွက်ဂွံရီုဗၚ်ကဵု ပ္ဍဲကဵုပရေၚ်ဂိုတ်ဂ္စါန် သွက်ပရေၚ်ကလေၚ်ဒက်ပ္တန်တံဂှ်လေဝ် ကဵုလဝ်ဒမြိပ်အရေဝ်ရ။
သွက်ဂွံရီုဗၚ်ထံက်ပၚ် ပၞာန်ထ္ပက်ရုယှာ ပ္ဍဲယူကရုၚ်ဂှ် ကိုဝ်ရဳယျာသၟဝ်ကျာ ပလံၚ်ဗစိုပ်ကဵုလဝ် လွဟ်လက်နက်မကမ်ဗွဲမဂၠိုၚ်ဂၠေၚ် သီုကဵုပါလုပ် ကမ်လှောဝ်အမၠံက်တံရောၚ် အမေရိကာန် စောတ်စောဲလဝ်တုဲ ကိုဝ်ရဳယျာသၟဝ်ကျာဂှ် ကယျာန်ပါဲလဝ် ဂၠိုၚ်ၚ်ကဵုဝါရ။
နကဵုကိုဝ်ရဳယျာသၟဝ်ကျာဂှ် ကၠောန်ၜိုတ်သၠုၚ်ပ္တိုန်လဝ်အသိၚ် ပရေၚ်ဖောအ်ဗြေဝ်တောတက်လွဟ်လက်နက်တုဲ ပ္ဍဲသၞာံ ၂၀၂၂ ဂှ် စမ်ၜတ်ပန်ပှော်လဝ် ကမ်လှောဝ် (၇၀) ဖ္ဍိုက် သီုကဵုပါလုပ်ကမ်လှောဝ်ပန်ပှော်အကြာတိုက် (ICBM) မယိုက်ဏာနၚ် နျူကလဳယျာမာန်တံဂှ်ရ။
Ref: Aljazeera