ၜဳကလေၚ်၊ ဂျာန္နဝါရဳ (၃၁)
အပ္ဍဲကွာန်ဒိုက်ယိတ်၊ ပွိုၚ်ဍုၚ်ၜဳကလေၚ်၊ တွဵုရးဍုၚ်မန်ဂှ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် ပ္ဍဲကဵုဂိတုဂျာန္နဝါရဳ (၂၉) ဂှ်တုဲ ညးဒေသ (၂) တၠ ကလိဂွံလဝ်ဝပ်တုဲ သ္ၚိဒၟံၚ် (၄) မ လီုလာ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်ဗ္တံၜိုတ် (၇) နာဍဳကဝါ်ဂှ် နူကဵုဒပ်အမၠံက်ဇြဳဝန် ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်ၜဳကလေၚ် ပန်ပှော်လဝ် လွဟ်ဇၞော် အပ္ဍဲကွာန်ဒိုက်ယိတ် ဟွံအောန်နူကဵု (၁၀) လ္တုန်ရ။
ဟိုတ်နူဒးလွဟ်ဇၞော်ဒပ်ကံၚ်ဇြဳပၞာန်တုဲ မာၚ်နေညုၚ် အာယုက် (၁၃) သၞာံကဵု သၟတ်အာယုက် (၁၈) သၞာံမွဲတၠ ဒၟံၚ်ကွာန်ဒိုက်ယိတ်တံ ကလိဂွံလဝ်ဝပ်တုဲ မာၚ်နေညုၚ် အာယုက် (၁၃) သၞာံဂှ် ဒးဂွိၚ်ဒၟံၚ် အန္တရာယ်လမျီုရောၚ်ဂှ် သ္ဂးရ။
ညးသၟတ်မကလိဂွံလဝ်ဝပ်ၜါတၠတံဂှ် နူကဵုရုၚ်ဂဥုဲၜဳကလေၚ်မွဲကဆံၚ် ဆုဲပြံၚ်လွဳကဵုလဝ် ရုၚ်ဂဥုဲညးဍုၚ်ကွာန်ခရိုၚ်သဓီုဂှ် ဂွံတီကေတ်ရ။
ဟိုတ်နူပရေၚ်ပန်ပှော် ဒပ်ကံၚ်ဇြဳပၞာန် ပ္ဍဲကဵုကွာန်ဒိုက်ယိတ်ဂှ်တုဲ သ္ၚိဒၟံၚ်ရဲကွာန် ဥူကျံက်လုံ၊ ဒဝ်နှေန်ဇြဳ၊ ဥူအံၚ်ချေတ် ကေုာံ ဥူမျေတ်ဥူတံ (၄) မ ဇီုကပိုက်လီုလာ်အာလဝ်ရ။
ပ္ဍဲကဵုဂိတုဂျာန္နဝါရဳ (၂၇) တေံဂှ်လေဝ် ဂကောံဒပ်ပံၚ်ကောံ KNLA တံ အာစိုပ်ဗ္တိုက်လဝ် ကဵုဒရုၚ် ကုဒပ်အမၠံက်ဇြဳဝန် ကံၚ်ဇြဳပၞာန်ဂှ်တုဲ ပ္ဍဲကဵုပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန်တံ ဇီုကပိုက်ချိုတ်အာတံ နွံဒၟံၚ်ရ။
ပ္ဍဲကဵုတ္ၚဲဂှ် ပယျာံဂယးၜိုတ် (၁၀) နာဍဳဂှ်လေဝ် ဗ္ဒါဲကွာန်ဒိုက်ယိတ် လ္တူဂၠံၚ်ကွဳစက် လ္ဂုၚ်−မတ်မလီုဂှ် ဂကောံဒပ်ပံၚ်ကောံ KNLA တံ ဗ္တိုက်လဝ် ရေၚ်ကွဳစက်ကံၚ်ဇြဳပၞာန် ကွဳစက် (၁၀) ဖ္ဍိုက်ပါဂှ်ရ ကောန်ဂကောံဒပ်ကံၚ်ဇြဳပၞာန် (၃) တၠ ချိုတ်အာတုဲ (၁) တၠ ကလိဂွံလဝ်ဝပ်ရ။
ကြဴနူပရေၚ်ဗ္တိုက်ဂှ်တုဲ ဒပ်ကံၚ်ဇြဳပၞာန်ဝွံ လုပ်စိုပ်ကၠုၚ် အပ္ဍဲကွာန်ဒိုက်ယိတ်တုဲ စံၚ်ပလီုလဝ် သ္ၚိဒၟံၚ်ညးဒေသ (၃) မ တုဲ သ္ၚိဒၟံၚ် (၁) မဂှ် ပန်ပှော်ပလီုလဝ် နကဵုလွဟ်ဇၞော်ရ။
ပရိုၚ်−သြၚ်လောန်တိုၚ်(မ်)