တၞၚ်သဳ၊ ဂျာန္နဝါရဳ (၃၁)
ပ္ဍဲပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳဂှ် အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် အပ္ဍဲပွိုၚ်မွဲသတ္တာဟ တုဲကၠုၚ် နူဂိတုဂျာန္နဝါရဳ (၂၃) စဵုကဵု (၂၉) ဂှ် ကောန်ဒပ်ကံၚ်ဇြဳပၞာန် ဗ္ဒါဲ (၃၀) တၠ ချိုတ်အာလဝ်ဂှ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်တၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပေါဲဗ္တိုက်တံဏံဝွံ နူကဵုဒပ်ပံၚ်ကောံစဵုဒၞါညးဍုၚ်ကွာန်တံ အာစိုပ်ဗ္တိုက် ဗ္ဒိုပ်ဒပ်ကံၚ်ဇြဳပၞာန်တုဲဂှ် ပေါဲဗ္တိုက်ၜါလ္ပာ်တံ သ္ကာတ်မြဟ်လဝ်ရ။
ပေါဲဗ္တိုက်ၜါလ္ပာ်တံဝွံ ပ္ဍဲလ္ပာ်ကွာန်ဗာန်လမတ်၊ ဗော်ဓိကာန်၊ တမုတ်ချုမ်၊ မယေန်ကျဳ နူပွိုၚ်ဍုၚ်တၞၚ်သဳ ကေုာံ လ္တူဍုၚ်တၞၚ်သဳတံဂှ် က္တဵုဒှ်လဝ် အရိုဟ်ဒဒှ်တ္ၚဲရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန် ဗ္ဒါဲ (၃၀) တၠ ချိုတ်အာလဝ်တုဲ မၞိဟ်ကလိဂွံဝပ် ဗွဲမဂၠိုၚ်ဂၠၚ်နွံတုဲ ကောန်သ္ဂံၚ် ဒပ်စဵုဒၞါညးဍုၚ်ကွာန် ပဳဒဳအေဖ် (၃) တၠ ပြဟ်လလုဲအာလဝ်ဂှ် ညးဒုၚ်တာလျိုၚ် လလောၚ်ပရိုၚ်ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်တၞၚ်သဳ သ္ဂးရ။
ဟိုတ်နူပေါဲဗ္တိုက် ပ္ဍဲပွိုၚ်ဍုၚ်တၞၚ်သဳတံတုဲ ညးဒေသ (၁) တၠ ချိုတ်တုဲ (၁၀) တၠ ဟွံအောန် ကလိဂွံလဝ်ဝပ်တုဲ ညးဒေသ ဂၠိုၚ်ကဵုလ္ၚီ ထောံလသာဌာန်ဒၟံၚ်တုဲ ဒးဂြိပ်ဒဴဒၟံၚ်ရ။
ပေါဲဗ္တိုက်ၜါလ္ပာ် မက္တဵုဒှ်လဝ် လလအ်ပွိုၚ်မွဲသတ္တာဟတံဂှ်ဝွံ ပ္ဍဲဂိတုဂျာန္နဝါရဳ(၃၀) ဂှ် ကလေၚ်ညိၚ်အာကီုလေဝ် ပရေၚ်ပၞာန် ဆက်ကြံၚ်မ္ၚိုဟ်ဒၟံၚ်ရောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)