လ္ဂုၚ်၊ ဂျူလာၚ် (၂၄)
လ္တူတၚ်သ္ဂုတ်သွာတ် ရုၚ်သၞောဝ်ဓဝ် ICJ တံဂှ် ဆက်ဒတူလိုၚ်အာ ဗွဲမညဳကဵု သၞောဝ်ဥပဒေဍုၚ်ဂၠးတိတံ ဗိုန်န်ခိုၚ်ၚ်ရောၚ်ဂှ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန် ဟီုရ။
စပ်ကဵုအမှု ကၟိန်ဍုၚ်ဂါမ်ဗဳယျာ မစောဲလဝ်ဒုဟ် ကုကၟိန်ဍုၚ်ဗၟာ နကဵုတၚ်စောတ်စောဲ ဂစိုတ်ကမၠက်ဂကူမၞိဟ် လ္တူရိုဝ်ဟေန်ဂျာတံတုဲ တၚ်ဒစဵုဒစး (၄) တၚ် လ္ပာ်ဗၟာ ဗွဲကိုပ်ကၠာတေံဂှ် တုဲကၠုၚ်ပ္ဍဲဂိတုဂျူလာၚ် (၂၂) နူရုၚ်သၞောဝ်ဓဝ် ICJ ဒဒှ်ရတးပါဲထောံဂှ် ဖျေံလဝ်အမိၚ်တုဲ လ္ပာ်ကံၚ်ဇြဳပၞာန် ခၠေဝ်ပလန်ကၠုၚ် သာ်ဏံရ။
တၚ်သ္ဂုတ်သွာတ် ရုၚ်သၞောဝ်ဓဝ် ICJ ဂှ်ဝွံ လ္တူကၟိန်ဍုၚ်ဗၟာသၟး အဆက်ဒတုဲဖဵုဍေံ နွံဟွံသေၚ် တၚ်သ္ဂုတ်သွာတ်ဏံဝွံ ဟိုတ်နူဒှ်အာ တၚ်မဖျေံလဝ်စဳရေၚ်ဂှ်ရ လ္တူကၟိန်ဍုၚ်ဂၠးတိအိုဿီု ဇီုကပိုက်ကၠုၚ်မာန်ရောၚ်ဂှ် သ္ကိုပ်ပၞာန်ဇြဝ်မေန်ထောန် ဟီုရ။
လ္တူဂဗုတ်ကၟိန်ဍုၚ်ဂါမ်ဗဳယျာ မစောတ်စောဲလဝ်တံဂှ် ဆက်ဒတူလိုၚ်အာ ဗွဲမညဳကဵု သၞောဝ်ဍုၚ်ဂၠးတိတံ ဗိုန်န်ခိုၚ်ၚ်တုဲ နကဵုရုၚ်သၞောဝ်ဓဝ် ICJ ဂှ်လေဝ် ပ္ဍဲသၞောဝ်ဥပဒေဂၠးတိဂှ် သွက်ဂွံဒုၚ်ပ္တိုန်တိုၚ်ခဳ မဍာံစၟတ်မာန်ဂှ် ညး စၟဳမၚ်ဒၟံၚ်ရောၚ် သာ်ဝွံ သ္ဂးရ။
သ္အာၚ်နူဂှ်ပၠန် ICJ ဒုၚ်လဝ်တဲ ကုညးစၞးဍေံတံ မဗလးဏာတံဂှ်တုဲ ရေၚ်တၠုၚ်လဝ်ဂဗုတ်ဂှ်ဝွံ အတိုၚ်သၞောဝ်ဥပဒေဂၠးတိဂှ် သ္ပစၟတ်သမ္တီ ကံၚ်ဇြဳပၞာန် နဒဒှ်အလဵုအသဳရဂှ် သ္ကိုပ်ပၞာန်ဇြဝ်မေန်ထောန် ဟီုရ။
ဝန်ဇၞော်ပရေၚ်အခေါၚ်အရာမၞိဟ် ဥူအံၚ်မျဵုမေန် အလဵုအသဳညဳသၟဟ်ဂကူ NUG ဂှ် ဒဒှ်ရဒုၚ်တၠုၚ် ကုတၚ်သ္ဂုတ်သွာတ် ရုၚ်သၞောဝ်ဓဝ် ICJ ဂှ်တုဲ သွက်တၚ်စဳရေၚ် နူကဵုရုၚ်သၞောဝ်ဓဝ် မဖျေံလဝ်တံဂှ်လေဝ် ပံၚ်တောဲရေၚ်တၠုၚ်အာရောၚ်ဂှ် သ္ဂးရ။
အမှုကၟိန်ဍုၚ်ဂါမ်ဗဳယျာ မစောဲလဝ်ဒုဟ်တံဂှ် ဂကောံဝန်ဇၞော်ကၟိန်ဍုၚ်ပံၚ်ကောံရေၚ်တၠုၚ် သွာၚ်ဍုၚ်ဂၠးတိ ကံၚ်ဇြဳပၞာန် ဥူကိုဝ်ဝ်လှာၚ် မက္ဍိုက်ပ်ဂှ် အာစိုပ်ဆေၚ်ဒၟံၚ်မုက်ကဵု သၞောဝ်ဓဝ်ရ။
ပရိုၚ်−သြၚ်လောန်တိုၚ်(မ်)