လ္ဂုၚ်၊ ဂျူလာၚ် (၂၄)
လၟေၚ်တရဴကွဳစက် YBS မဒှ်ပရေၚ်ပလံၚ်ဗစိုပ်အဓိက ဍုၚ်လ္ဂုၚ်တံဝွံ ဟိုတ်နူ သၟုဟ်ဓာတ် (gas) CNG ဟွံရုမ်ဂပ်တုဲ ဖအောန်ဖျေံလၟိဟ်ကွဳစက်တံတုဲ ဒးဓဇက်ဂြိပ်ဒၟံၚ်ဂှ်ရ ဒးဂဗဒၟံၚ်ကဵု အခက်အခုဲ ပရေၚ်အာကၠုၚ်တံရဂှ် ညးလ္တူဍုၚ်လ္ဂုၚ်တံ ဟီုရ။
လၟေၚ်တရဴ YBS တံဝွံ ဒၟါနူသၟုဟ်ဓာတ် CNG ဟွံရုမ်ဂပ်ဂှ်ရ စနူဂိတုဂျူလာၚ် (၂၂) တုဲ ဖအောန်ဖျေံ လၟိဟ်ကွဳစက် ဗ္ဒါဲကဝက်ပြၚ်တုဲ ဓဇက်ဂြိပ်ဒၟံၚ်ရ။
ဒၟါနူဖအောန်ဖျေံ လၟိဟ်ကွဳစက်တုဲ ဓဇက်ဂြိပ်ဒၟံၚ်ဂှ်ရ သွက်ညးဍုၚ်ကွာန်ကဆံၚ်သ္ဇိုၚ် မဒးရပ်စပ်စကာဒၟံၚ် လၟေၚ်တရဴ YBS အဓိကတံဂှ် ဒးဂဗဒၟံၚ်ကဵု အခက်အခုဲ ပရေၚ်အာကၠုၚ်ရ။
ကုညးဍုၚ်ကွာန် မဒးဂဗဒၟံၚ်အခက် သွက်ပရေၚ်အာကၠုၚ်တံဂှ် ဂကောံရီုဗၚ်ဟံၚ်ပြာ် ပရေၚ်မၞိဟ်တံ ရီုဗၚ်ပလံၚ်ဗစိုပ်ကဵုဒၟံၚ် နကဵုကွဳစက်ဖ္ဍိုက်မၞိဟ်ယဲတံတုဲ ဂိတုဂျူလာၚ် (၂၃) ဂှ် မၞိဟ်ရီုဗၚ်တံ သာဂၠိုၚ်ကၠုၚ်ရဂှ် ညးတာလျိုၚ်ဂကောံ (မာဃရိပ်ငြိမ်) မွဲတၠ ဟီုရ။
“ဗီုညးပလံၚ်ကဵု ဖေဝ်ရဳဂှ် ပလံၚ်ဗစိုပ်ကဵုဒၟံၚ် နကဵုကွဳစက် ဖ္ဍိုက်မၞိဟ်ယဲတံရ၊ နူဏေံတေံဟီုတှ်ေ မၞိဟ်ဘိုၚ်ရီုဗၚ် အောန်ဒၟံၚ်ဏီ၊ တ္ၚဲဏံဂှ် မၞိဟ်ရီုဗၚ်ဂၠိုၚ်တုဲ နလၟေၚ်ဂကောံဂှ် ဓဇက်ဂၠံၚ်တရဴတုဲ ပလံၚ်ကဵုဒၟံၚ် ညံၚ် YBS ကီုရ” သာ်ဝွံ သ္ဂးရ။
ဖအောန်ဖျေံ လၟိဟ်ကွဳစက် သာ်ဏံတုဲ ဓဇက်ဂြိပ်ဒၟံၚ်ဂှ်ဝွံ စဵုကဵုမွဲသတ္တာဟ လအ်လရောၚ်ဂှ် ပရိုၚ်တံ တိတ်ဒၟံၚ်ကီုလေဝ် ဖက်ဆောညးအုပ်ကာ YRTC ဂှ် ပပဵုပ္တိုန် လၟိဟ်ကွဳစက်တုဲ သွက်ဂွံဓဇက်ဂြိပ်ကဵုဂှ် စဳဇန်ဒၟံၚ်ရောၚ် ဟီုရ။
ကမ္မတဳကောပ်ကာဲပရေၚ်ပလံၚ်ဗစိုပ်ပုဂ္ဂလိက ရးဒေသလ္ဂုၚ် (YRTC) ဂှ် ပ္ဍဲဂိတုဂျူလာၚ် (၂၂) ဂှ် လာၚ်ကွဳစက် YBS နူကဵု (၁၁၆) လာၚ်ဂှ် လၟိဟ်ကွဳစက် (၃၀၀၀) ပြၚ် လၟေၚ်တ္ၚဲ ဓဇက်ဂြိပ်ဒၟံၚ်ရောၚ်ဂှ် လလောၚ်ပ္တိတ်လဝ်ရ။
ဆ္ဂး ညးဍုၚ်ကွာန် မဍိုက်ဗက် YBS တံဝွံ လာၚ်ကွဳစက် မဓဇက်ဂြိပ်ဒၟံၚ်တံ ဟွံစိုပ်ကၠုၚ်ဂှ်ရ သွက်ဂွံအာကမၠောန်ကီု ကေုာံ သွက်ဂွံရေၚ်တၠုၚ်ပြဝကေၚ်ကာ လၟေၚ်တ္ၚဲတံဂှ် ဒးဂဗဒၟံၚ် အခက်အိုတ်ရ။
ပရိုၚ်−သြၚ်လောန်တိုၚ်(မ်)