မဂွေ – ဖေဖဝ်ဝါရဳ(၁)
ပ္ဍဲလတူဍုၚ်မဂွေ နကဵုတၚ်ရန်တၟံ ညံၚ်ပေါဲဗကပ်ဗဗေၚ်ရမျှာၚ်သ္ၚိတ်ဇြ ဟွံဂွံဒှ်တုဲ ကၠောန်သ္ပဒၟံၚ် ပရေၚ်ရပ်စပ်ကွဳလိုန်ဓာတ်တအ် အဆက်က်ရဂှ် ကဝ်မတဳပေါဲဗတိုက်ညးဍုၚ်ကွာန်မဂွေ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုဂျာန္နဝါရဳ တုဲကၠုၚ် စၟတ်တ္ၚဲ(၃၀) တေံဂှ် ဗက်ရပ်သီကေတ်ဒၟံၚ် ကွဳလိုန်ဓာတ် လိုၚ်ဇြေန်ဒဳယာဉ်ဟွံပါကီု သီုကဵုဒ္ၚောဝ်ရံၚ်လကြဴ ဟွံပါတအ်ဂှ်ရ။
ပ္ဍဲညးဍုၚ်ကွာန်တအ် ၜိုန်ရ လိုၚ်ဇြေန်ဒဳယာဉ် ပါကၠုၚ်ဒၟံၚ် ဍိုက်က်ပေၚ်ၚ်ကီုလေဝ် ထ္ၜးဟိုတ်နာနာသာ်တုဲ ဒပ်ကံၚ်ဇြဳပၞာန် ရပ်စပ်ဒၟံၚ်ရဂှ် ဂွံတီကေတ်လဝ်ရ။
“အရိုဟ်ဟ်ကၠောန်ဗဒှ် ပရေၚ်ဗကပ်ဗဗေၚ်ရမျှာၚ်သ္ၚိတ်ဇြဂှ် ဂကောံပၞာန်တအ် မုက်ဂဝဒးသၞဳဒၟံၚ် ပ္ဍဲလဒေါဝ်ညးဂၠးတိတအ်ရ။ ဂုဏ်နူဂှ်ရ ဗက်ပလာပ်ပထုဲ၊ ဗက်ဗတိုက်သရိုဟ်ဒၟံၚ် ဇၟာပ်ပ်ဗကပ်ဗဗေၚ်ရမျှာၚ်သ္ၚိတ်ဇြရ” ဂှ် ကိုဝ်ချေတ်ဝေန်မောၚ် ညးလုပ်ကဝ်မတဳ ပေါဲဗတိုက်ညးဍုၚ်ကွာန်ဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲဗကပ်ဗဗေၚ်ကၠောန်ဗဒှ်လဝ် အလန်ဏံ မွဲအလန်လေဝ် တံက်ဓဇက်ကွဳလိုန်ဓာတ်ညးဍုၚ်ကွာန်တအ်တုဲ ၜိုန်ရကၠောန်ဒၟံၚ် ညံၚ်ဂွံလီုလာ်အာကီုလေဝ် ညးဍုၚ်ကွာန်တအ် ပါလုပ်ချဳဓရာၚ် နကဵုနဲကဲကၠောန်ဂွံဏောၚ်ဂှ် ညးဟီုသ္ဂးလဝ်ဏီရ။
အခိၚ်ဗပိုတ်ကဵုချလာန် ကွဳလိုန်ဓာတ်ဒးဒုၚ်လဝ်ဂှ် ဖ္အောဝ်စကာကဵုနုက်ကေတ် ပ္ဍဲၝောံခန်ဍုၚ်မဂွေ ပ္ဍဲကဵုဂိတုဖေဖဝ်ဝါရဳ စၟတ်တ္ၚဲ(၁)ဂှ် သီုဖအိုတ်တုဲ ဒးကလၚ်ပေါဲဟီုတွံကဵုပညာ စေဝ်ပၞောန်ယာဉ်၊ စေဝ်ပၞောန်ဍာန်ဏောၚ်ဂှ် ကံၚ်ဇြဳပၞာန်ကရေပ်ဓရတ်လဝ် ညးဒေသဂမၠိုၚ်ရ။
“အဏံလေဝ် ဂုဏ်နူရပ်ဒၟံၚ်ကွဳလိုန်ဓာန်တုဲ အလဵုလေဝ် အာကၠုၚ်ဟွံပြေပြံၚ်ရ။ ပ္ဍဲပွိဖျူလေဝ် ရပ်ဒၟံၚ်ရ။ လိုၚ်ဇြေန်ဟွံပါတှ်ေ သီဏာရ။ ခယျကေတ်တှ်ေ စၟတ်တ္ၚဲ(၁)ဏံ ဂုဏ်နူမိၚ်မံၚ် ဗကပ်ဗဗေၚ်ရမျှာၚ်သ္ၚိတ်ဇြတုဲ စကာကဵုအာနုက်ကေတ် တ္ၚဲဂှ် ဒှ်မာန်ဏောၚ်” ဂှ် ညးဒေသမဂွေ ကိုဝ်ကျဝ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
လတူဍုၚ်မဂွေ ဒပ်ကံၚ်ဇြဳပၞာန် ကၠောန်သ္ပဒၟံၚ်ပရေၚ်ရပ်စပ်စၟဳစၟတ် ပ္ဍဲဒၞာဲဗွဲမဂၠိုၚ်ရ။
ကြဴနူဒပ်ပၞာန်သီအဝဵုကၟိန်ဍုၚ်ဗၟာတုဲဂှ် ကၠောန်ဗဒှ်လဝ် ပေါဲဗကပ်ဗဗေၚ် ပ္ဍဲရးမဂွေ ဗၞတ်(၃)ဝါတုဲ သီုကဵုပိဝါ အံၚ်ဇၞးလဝ်တုဲ ပေါဲဗကပ်ဗဗေၚ်ရမျှာၚ်သ္ၚိတ်ဇြ ကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ စၟတ်တ္ၚဲ(၁) သၞာံ(၂၀၂၁) ကေုာံ ဂိတုဖေဖဝ်ဝါရဳ စၟတ်တ္ၚဲ(၁) သၞာံ(၂၀၂၂)တအ်ဂှ် အံၚ်ဇၞးလဝ်ဇၞော်ကဵုဇြဟတ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)