ထဝါဲ – ဖေဖဝ်ဝါရဳ(၁)
ရးဒေသတၞၚ်သဳ၊ ပ္ဍဲလတူဍုၚ်ထဝါဲဂှ် လပါ်ကံၚ်ဇြဳပၞာန် ဂေတ်ဍုၚ်ဗက်ရပ်ဒၟံၚ် ကွဳလိုန်ဓာတ်တုဲ ကွဳလိုန်ဓာတ်ဒးဒုၚ်ရပ်လဝ်တအ်ဂှ် ကော်လဝ် သွက်ဂွံကၠုၚ်နုက်ကေတ် ပ္ဍဲတ္ၚဲကၠောန်ဗဒှ်ပေါဲဗကပ်ဗဗေၚ်ရမျှာၚ်သ္ၚိတ်ဇြရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲအကြာဂၠံၚ်ဍုၚ်ထဝါဲတအ်ဂှ် တၚ်ထ္ၜးဟိုတ်ဟၟဲမွဲသာ် ကံၚ်ဇြဳပၞာန် ဗက်ဂၠာဲရပ်ဒၟံၚ်ကွဳလိုန်ဓာတ် နကဵုဂကောံပံၚ်တောဲ ဗၠာဲသၟိၚ်ထိၚ်ယာဉ်၊ ပျူသဝ်ထဳ ကေုာံကောန်ဒပ်ကံၚ်ဇြဳပၞာန်တအ်ရ။
“ပ္ဍဲထဝါဲဂှ်တှ်ေ နူကဵုကၠာတေံရ ဗက်ရပ်ဒၟံၚ်ကွဳလိုန်ဓာတ်တအ် ကွေံကွေံရ။ စှ်လှ်ေမွဲလှ်ေတှ်ေ နူကဵုအခိၚ် ၅ နာဍဳနူဂယးပြဟ်ဂှ် ဗက်ရပ်ဒၟံၚ်။ နူတနေံတေံကဵု နူဂယးဏံ ရပ်လဝ်ဂၠိုၚ်အိုတ်ရ။ တ္ၚဲယး ပေါဲဗကပ်ဗဗေၚ်ရမျှာၚ်သ္ၚိတ်ရတှ်ေ ညံၚ်မၞိဟ်ဂွံနွံ လတူဂၠံၚ်ဂှ် ကဵုကၠုၚ်နုက်ကေတ်ရ။ ပ္ဍဲထဝါဲဂှ် ထ္ၜးဟိုတ်နာနာတုဲ ရပ်ဒၟံၚ်ရ။” ဂှ် သၟတ်ဒေသထဝါဲမွဲတၠ ဟီုသ္ဂးလဝ်ရ။
သ္အာၚ်နူဂှ်ပၠန် အခိၚ်ကံၚ်ဇြဳပၞာန် ဗက်ရပ်ဒၟံၚ်ကွဳလိုန်ဓာတ်ဂှ် ယဝ်ရကပေါတ်ဆေၚ်စပ်ကဵုယာဉ် ဟွံဍိုက်ပေၚ်မ္ဂး ကၠောန်သ္ပဒၟံၚ် စဵုကဵုသီကေတ်ကွဳလိုန်ဓာတ်၊ လိုၚ်ဇြေန်ဒဳယာဉ်ကဵု ဝှဳတိတ်တအ်ရဂှ် ညးဟီုသ္ဂးလဝ်ရ။
ကွဳလိုန်ဓာတ်ဒးဒုၚ်သီလဝ်တအ်ကဵု တၞးလိက်တၚ်ဂၞၚ်တအ်ဂှ် စကာကဵုကလေၚ်နုက်ကေတ် ပ္ဍဲရုၚ်ဗၠာဲသၟိၚ်ထိၚ်ယာဉ် မၞုံပ္ဍဲအရာပ်ဝါကျောန်ရဂှ် ဂွံတီကေတ်လဝ်ရ။
အကြာမွဲၜါတ္ၚဲဏံ ဒပ်ကံၚ်ဇြဳပၞာန် ကၠောန်သ္ပကၠုၚ်ဒၟံၚ် ပရေၚ်လုပ်စိုပ် ရပ်ဂၠိုက်ဂၠာဲဒၟံၚ် သ္ၚိဌာန် မၞုံပ္ဍဲအရာပ် လတူဍုၚ်ထဝါဲတအ် အဆက်က်ရ။
ပ္ဍဲကဵုပေါဲဗကပ်ဗဗေၚ်ရမျှာၚ်သ္ၚိတ်ဇြ သၞာံတုဲကၠုၚ်တေံဂှ်လေဝ် ကံၚ်ဇြဳပၞာန်ကၠောန်ကၠုၚ်ပေါဲလံၚ်သၚ်ဇဳ၊ စကာကဵု ဂကောံသ္ၚိကၟိန်ဒပ်ပၞာန် ကေုာံ သ္ဇိုၚ်ဝန် နူကဵုဌာနရုၚ်နာနာဂမၠိုၚ် ကဵုအာကၠုၚ်အကြာဂၠံၚ်ဍာန်လတူဍုၚ် နကဵုကွဳလိုန်ဓာတ်တုဲ စကာကဵုပံက်ကၠုၚ်လဝ်ဖျာ ဗွဲအဓမ္မနွံကၠုၚ်ရဂှ် ဂွံတီကေတ်ရ။
ဂကောံဇြဟတ်ရပ်လွဟ်ပၠန်ဂတး ဗတိုက်ဒၟံၚ်ကဵု ကံၚ်ဇြဳပၞာန်သီအဝဵု ကေုာံဂကောံဇြဟတ်ဗကပ်ဗဗေၚ်တအ်ဂှ်မ္ဂး ညံၚ်ညးဍုၚ်ကွာန်တအ် ဂွံပါလုပ်ကၠုၚ် ပ္ဍဲပေါဲဗကပ်ဗဗေၚ်ရမျှာၚ်သ္ၚိတ်ဇြဏံဂှ် ဆဝ်ပ္ၚုဟ်လဝ်ရ။
ပရိုၚ်-သြၚ်လောန်တိုၚ်(မ်)