“သြန်လ္ၚီကိုတ်ကီု၊ ဇြဟတ်ကောန်ဗော်မွဲကိုတ်ကီု ဒးပံက်စွံရုၚ် ပ္ဍဲပွိုၚ်ဍုၚ် အလုံမွဲကၟိန်ဍုၚ်ဗၟာကဝက်ဏောၚ်ဟီုတှ်ေ နကဵုဗော်ကောန်ဂကူရခေၚ်ပိုဲ သွက်ဂွံစန္ဒက် အလုံမွဲကၟိန်ဍုၚ်ဗၟာ၊ သွက်ဂွံပတိုန်စၟတ်သမ္တီဂှ် ဒှ်အာအကာဲအရာ ကြေပ်ဂြတ်ပေၚ်ၚ်ရ ဗီုဏံမိက်ဂွံဟီုရ”

တၚ်ဆက်စၠောံသၟာန်သွဟ်လဝ်ကဵု ဥက္ကဋ္ဌဗော်ကောန်ဂကူရခေၚ်(ANP) ဥူတာလှထောန်။

ဗော်ဒးစန္ဒက် အလုံမွဲကၟိန်ဍုၚ်ဂှ် စတမ်နူကဵု ပတိုန်စၟတ်သမ္တီဗော်တုဲ ပ္ဍဲပွိုၚ် ၉၀ တ္ၚဲဂှ် လၟိဟ်ကောန်ဗော်အောန်အိုတ် မွဲကိုတ် ကေုာံပ္ဍဲပွိုၚ် (၁၈၀) တ္ၚဲဂှ် ပ္ဍဲကဝက် အလုံပွိုၚ်ဍုၚ် မၞုံပ္ဍဲကၟိန်ဍုၚ်သီုဖအိုတ်ဂှ် ဒးပံက်စွံရုၚ်ဏောၚ်ဂးတုဲ သၞောဝ်ဗော်ပရေၚ်ဍုၚ်ကွာန်တၟိဗီုဏံ ကံၚ်ဇြဳပၞာန် ပျးဌာန်ကၠုၚ် ပ္ဍဲဂိတုဂျာန္နဝါရဳ စၟတ်တ္ၚဲ(၂၆)တေံရ။

ဟိုတ်နူသၞောဝ်ဥပဒေဗော်ပရေၚ်ဍုၚ်ကွာန် ကံၚ်ဇြဳပၞာန်ပျးဌာန်လဝ်ဏံတုဲ ဗော်ဗွဲမဂၠိုၚ်တအ်ဂှ် သွက်ဂွံဒတူလာၚ်အာ ဒှ်ကၠုၚ်အခက်ခုဲကီု ပ္ဍဲပွိုၚ် (၆၀)တ္ၚဲဂှ် ယဝ်ရဟွံပတိုန်စၟတ်သမ္တီ ဗော်ပရေၚ်ဍုၚ်ကွာန်မ္ဂး ဒးဆေၚ်ဒၟံၚ်မုက်ကဵု အကာဲအရာဒးဒုၚ်လီုလာ်အာ အလဵုဍေံရ။ ဟိုတ်ဂှ်ရ သၞောဝ်ဥပဒေပတိုန်စရၚ်စၟတ်သမ္တီ ဗော်ပရေၚ်ဍုၚ်ကွာန်ကံၚ်ဇြဳပၞာန်ဂှ် ၜိုတ်ကဆံၚ်လဵု ကဵုဗော်ပရေၚ်ဍုၚ်ကွာန်တအ် ကြေပ်ဂြတ်အာရော။ စပ်ကဵုအကာဲအရာဏံတုဲ သၟာန်သွဟ်လဝ်ကဵု ဥက္ကဋ္ဌဗော်ကောန်ဂကူရခေၚ် (ANP) ဥူတာထောန်ရ။

-အလန်ကၠာအိုတ်ဏံ လတူသၞောဝ်ဥပဒေပတိုန်စရၚ်စၟတ်သမ္တီ ဗော်ပရေၚ်ဍုၚ်ကွာန် ကံၚ်ဇြဳပၞာန်ပျးဌာန်လဝ်ဂှ် ဗီုလဵုညာတ်ကေတ်ရော။

ဗော်ကောန်ဂကူရခေၚ်ပိုဲတှ်ေ သွက်ဂွံစန္ဒက်အလုံကၟိန်ဍုၚ်ဗၟာဂှ် ဒှ်ဗော်ပတိုန်လဝ်စရၚ်စၟတ်သမ္တီရ။ ကၠာတေံဂှ်တှ်ေ ဒှ်ဗော်ပတိုန်လဝ်စရၚ်စၟတ်သမ္တီ သွက်ဂွံစန္ဒက် အလုံမွဲကၟိန်ဍုၚ် မွဲဗော်ရ။ အတိုၚ်သၞောဝ်တိတ်ကၠုၚ်လၟုဟ်ဏံတှ်ေ သွက်ဂွံစန္ဒက် အလုံမွဲကၟိန်ဍုၚ် သွက်ဂွံပတိုန်စရၚ်ဒဒှ်ဗော်ဂှ် ခက်ခုဲအာဗွဲမဂၠိုၚ်ရ။ သြန်လ္ၚီကိုတ်ကီု၊ ဇြဟတ်ကောန်ဗော် မွဲကိုတ်ကီု၊ ဒးပံက်စွံလဝ်ရုၚ် ပ္ဍဲပွိုၚ်ဍုၚ် အလုံမွဲကၟိန်ဍုၚ်ဗၟာ ကဝက်ကီုဏောၚ်တှ်ေ နကဵုဗော်ကောန်ဂကူရခေၚ်ပိုဲ သွက်ဂွံစန္ဒက် သွက်ဂွံပတိုန်စရၚ်စၟတ်သမ္တီဂှ် အလုံမွဲကၟိန်ဍုၚ်ဗၟာ စိုပ်အာအကာဲအရာကြေပ်ဂြတ်ဒၟံၚ်ပေၚ်ၚ်ရဂှ် အဲမိက်ဂွံဟီုရ။

-ဟိုတ်နူသၞောဝ်ဏံတုဲ နကဵုဗော်ပရေၚ်ဍုၚ်ကွာန်တအ် ၜိုတ်ကဆံၚ်လဵု ဒးဆဵုဂဗကဵု တၚ်ခက်ခုဲမာန်ရော။

ပိုဲတအ် ဃောကၠာတေံတှ်ေ နကဵုကဗော်ပိုဲဂှ် တွဵုရးရခေၚ်ကီု၊ ရးဨရာဝတဳကီု၊ ရးလဂုၚ်ကီု၊ တွဵုရးဍုၚ်ချေၚ်ကီု လုပ်ပြိုၚ်ကၠုၚ်လဝ်နွံရ။ လၟုဟ်ဏံ ပါကၠုၚ်ပ္ဍဲသၞောဝ်ဥပဒေဂှ် ဒးဒုၚ်လုပ်ပြိုၚ်ကဝက်ဏောၚ်ဟီုတှ်ေ သွက်ဗော်ပိုဲဂှ် အစိုပ်ဒၟံၚ်အခက်ခုဲ အကြေပ်ဂြတ်ဇေတ်တ်ရဂှ် ပိုဲဟီုစဂွံရ။

-ဟိုတ်နူကံၚ်ဇြဳပၞာန် ပျးဌာန်ကၠုၚ် သၞောဝ်ဥပဒေဏံတုဲ နကဵုဗော်ပရေၚ်ဍုၚ်ကွာန်တအ် အကာဲအရာ ဗီုပြၚ်လဵုဒှ်ကၠုၚ်မာန်ရော။ ပ္ဍဲလတူဏံ သ္ၚဳဂၠိပ်ကဵုညိပၠန်။

ယဝ်ရဒးဟီု အတိုၚ်လညာတ်အဲတှ်ေ ပြဟ်ဟ်ဏံ ဗော်ပတိုန်လဝ်စရၚ်စၟတ်သမ္တီ (၉၀)ပြၚ်နွံရ။ ပ္ဍဲကဵုဗော်(၉၀)ပြၚ်ဂှ် ဗော်ဗွဲမဂၠိုၚ်ဂှ်တှ်ေ ဒးဆဵုဂဗကဵု အခက်ခုဲအကြေပ်ဂြတ်ဏောၚ်ဂှ် ညာတ်ကေတ်ရဂှ် အဲဟီုစမာန်ရ။ ဗီုဏံလေဝ် အဲသ္ၚဳဂၠိပ်ကေတ်လဝ်ရ ဗော်ဗွဲမဂၠိုၚ်ဂှ်တှ်ေ အာစိုပ်ခက်ခုဲကြေပ်ဂြတ်ဏောၚ်ဂှ် အဲသ္ၚဳဂၠိပ်ညာတ်ကေတ်ရ။

-အလန်လကြဴအိုတ်ဏံ စပ်ကဵုသၞောဝ်ဥပဒေဗော်ပရေၚ်ဍုၚ်ကွာန် ကံၚ်ဇြဳပၞာန်ပျးဌာန်လဝ်တၟိဏံတုဲ မုမိက်ဂွံထပ်ဟီုဗပေၚ်မံၚ်ဏီရော။

ပြဟ်ဟ်ဏံတှ်ေ ပိုဲတအ်လေဝ် ဒးဂၠာဲသွဟ်သ္ၚဳဂၠိပ် လ္ၚတ်ပါ်ပါဲသၞောတ်ဥပဒေဏံ ဏီရ။ ဟိုတ်ဂှ်ရ ပြဟ်ဟ်ဏံတှ်ေ အတိုၚ်သၞောဝ်ဥပဒေဏံ ၜိုတ်ပိုဲလ္ၚတ်ကေတ်ဂွံလဝ်ဂှ်တှ်ေ နကဵုဗော်ပိုဲ ဒးဆဵုဂဗဒၟံၚ်ကဵု အခက်ခုဲအကြေပ်အဂြတ်ယျဂှ် ပိုဲမိက်ဂွံဟီုရ။