မတ်မလီု၊ ဖေဖဝ်ဝါရဳ(၁)
တွဵုရးဍုၚ်မန်၊ ပ္ဍဲဍုၚ်မတ်မလီု အကြာမွဲၜါတ္ၚဲဏံ လပါ်ကံၚ်ဇြဳပၞာန် သၠုၚ်ဂလိုၚ်ပတိုန်လဝ် ပရေၚ်ဂီုကၠီုကီု ဂေတ်ဒၟံၚ်ကၚ် နကဵုဇြဟတ် ဂၠိုၚ်ဂၠေၚ် အဆက်ဆက်ရဂှ်ရ ကောန်ဍုၚ်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒပ်ကံၚ်ဇြဳပၞာန်ကီု သီုဒပ်ဗၠာဲသၟိၚ်တအ် သုၚ်စောဲကၠုၚ်ကွဳစက် ဗ္ဒာဲ(၁၅)ဖ္ဍိုက် ပါလုပ်သီုကွဳစက်ပၞာန်၊ ကွဳစက်သ္ၚိ ကွဳစက်ညးအရာပ်ဍိုက်တအ်တုဲ ပါဲနူဂေတ်ဒၟံၚ် ပ္ဍဲအကြာဍုၚ်ဂှ် ဖျေံလဝ်ဗ္ဒပ်ကၚ်ပရေၚ်ဂီုကၠီု ပ္ဍဲဍုၚ်ဒၞာဲဒှ်အဓိကတအ်တုဲ ကၠောန်သ္ပဒၟံၚ် ပရေၚ်မၚ်ရံၚ်တအ်ရ။
အတိုၚ်ကောန်ညးဍုၚ်ဂမၠိုၚ် ဟီုဂးလဝ်မ္ဂး လပါ်ကံၚ်ဇြဳပၞာန် ကၠောန်ကၠုၚ်ဗီုလၟုဟ်ဏံဂှ် နဒဒှ်ပရေၚ်ဘပဠ ညံၚ်ညးဍုၚ်ကွာန်တအ် ဟွံဂွံပါလုပ် ပ္ဍဲပရေၚ်ဗကပ်ဗဗေၚ်ရမျှာၚ်သ္ၚိတ်ဇြ ဂိတုဂျာန္နဝါရဳ စၟတ်တ္ၚဲ (၁) တ္ၚဲသီအဝဵု ပေၚ်(၂)သၞာံဂှ်တုဲ ဂေတ်ဒၟံၚ် ဒှ်မာန်ဏောၚ်ဂှ် သ္ၚဳဂၠိပ်လဝ်ရ။
ဆဂးဂှ် ပ္ဍဲကဵုအရာပ် မၞုံပ္ဍဲကဵုဍုၚ်တအ်ဂှ်မ္ဂး သွက်ဂွံပံက်ဆေၚ် အတိုၚ်ဗီုတြေံကၠာတေံ ဟိုတ်ပရေၚ်ကဵုဇြဟတ်ဓရိုတ် တေၚ်ဂြတ်ဂှ် ဟၟဲကၠုၚ်ဏီဂှ်ရ နကဵုကံၚ်ဇြဳပၞာန် မၚ်ရံၚ်ဒၟံၚ် ဆေၚ်ကၟာတ်လဝ်တအ်တုဲ ကေတ်ကၠုၚ်အရေဝ်မာန်ဒၟံၚ်ဂှ်ရ သွက်ဂွံစွံသတိဂှ် ဟီုဗတိုက်ဖ္အောဝ်လဝ်ရ။
သ္အာၚ်နူဂှ်ပၠန် ပ္ဍဲကဵုသၞေဟ်ကၚ်လုပ်ဍုၚ်၊ တိတ်ဍုၚ်တအ်ဂှ်လေဝ် ကံၚ်ဇြဳပၞာန် ပတေၚ်ဂြတ်လဝ် ပရေၚ်ဂီုကၠီုတုဲ ညးလုပ်ကၠုၚ် ပ္ဍဲဍုၚ်တအ်ဂှ်လေဝ်သၟာန်စၟဳစၟတ်ဒၟံၚ်ကီု ဒၞာဲအဓိက ပ္ဍဲဍုၚ်တအ်လေဝ် စၟဳစၟတ်ဒၟံၚ်ကွဳစက်၊ ကွဳလိုန်ဓာတ်တအ်ရဂှ် ညးဒေသဂမၠိုၚ် ဟီုသ္ဂးလဝ်ရ။
ပ္ဍဲကဵုဍုၚ်လေဝ် နူကဵုCCTV ဗ္ဂပ်လဝ်တအ်မွဲကဆံၚ် မၚ်ရံၚ်ဒၟံၚ် ပရေၚ်ညးဍုၚ်ကွာန်တအ် ချဳဒရာၚ်အာကၠုၚ် အဆက်ဟွံပိုတ်သ္ကုတ်တုဲ ယဝ်ဒှ်ကၠုၚ်သၠေဟ်ပၟာမ္ဂး သွက်ဂွံသၟာန်သၟုက်ဂၠိုက်ဂၠာဲ ကဵုလဝ်တၚ်စၞောန်ရဂှ် ညးစုက်လုက်ကဵု ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တအ် ဟီုသ္ဂးလဝ်ရ။
အခိၚ်လၟုဟ်ဏံမ္ဂး ပ္ဍဲကဵုရးဒေသဇၞော် ကေုာံပွိုၚ်ဍုၚ်ဗွဲမဂၠိုၚ် မပါလုပ်သီုနေပျဳတဝ်၊ လဂုၚ်တအ်ဂှ် ကံၚ်ဇြဳပၞာန်သီအဝဵု သၠုၚ်ပတိုန်လဝ် ပရေၚ်ဂီုကၠီုတုဲ ပ္ဍဲဂိတုဖေဖဝ်ဝါရဳ စၟတ်တ္ၚဲ (၁)ဏံ သွက်ဂွံကၠောန်ဗဒှ် ပရေၚ်ပလေဝ်ပလေတ် ပေါဲထံက်ဂလာန်ဒပ်ပၞာန်လေဝ် နွံဒၟံၚ်ရ။
ပရိုၚ်-သြၚ်လောန်တိုၚ်(မ်)