တၞၚ်သဳ၊ ဨဗြဴ(၁)
ရးဒေသဇၞော်တၞၚ်သဳ၊ ပွိုၚ်ဍုၚ်တၞၚ်သဳ၊ ပ္ဍဲဂၠံၚ်တၞၚ်သဳ-မဝ်တောၚ် ကွာန်ချောၚ်နှေတ်ပေါက်ဂှ် စတမ်နူဂိုမာတ်ချ် စၟတ်တ္ၚဲ(၃၁) အခိၚ်နူဂယးတုဲ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်သ္ကာတ်မြဟ်ဒၟံၚ်ရဂှ် ညးဒေသကီု သီုညးတာလျိုၚ်ပကဖ ပွိုၚ်ဍုၚ်တၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကရောၚ်ပၞာန်ကံၚ်ဇြဳ ဇြဟတ်မၞုံ ၁၀၀ ပြၚ် ဟိုတ်နူထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်ချောၚ်နှေတ်ပေါက်တုဲ ပေါဲဗတိုက်သ္ကာတ်မြဟ်ဒၟံၚ်ကေုာံ တံဒပ် KNU ၁၁၊ ကဝ်ဒူလေဝ်အာမဳ၊ ဒပ်ပံံၚ်ကောံပကဖ တၞၚ်သဳတအ်ရ။
ပ္ဍဲပေါဲဗတိုက်ဂှ် လ္ပာ်ကံၚ်ဇြဳပၞာန် ဟွံအောန်နူ (၅)တၠ ဒးလဝ်ဝပ်ကီု ဟိုတ်နူလ္ပာ်ကံၚ်ဇြဳပၞာန် ဆက်ထ္ပက်ဒၟံၚ်ပၞာန်ကီုဂှ်ရ ပေါဲဗတိုက်ၜါလ္ပာ် သာသ္ကာတ်မြဟ်ကၠုၚ်မာန်ရောၚ်ဂှ် ညးတာလျိုၚ် ပကဖပွိုၚ်ဍုၚ်တၞၚ်သဳ ဟီုသ္ဂးလဝ်ရ။
ပ္ဍဲပေါဲဗတိုက်ဏံ ဟိုတ်နူဒပ်ကံၚ်ဇြဳပၞာန် ရပ်ကေတ် နဒဒှ်ဒေၚ်ဒုၚ်ဒၞာမၞိဟ် ကေုာံရပ်ကၠုၚ်ပဝ်တာမာန်ဒၟံၚ်ဂှ်ရ နညးဍုၚ်ကွာန်တအ်လေဝ် ညံၚ်ဂွံပါဲဓလေတ်ကဵု ဒၞာဲဗၠးဘဲကီု ဒေါံဟွံဂွံ ညံၚ်ဂွံဒ္ဂေတ်ဗက်အာ အတိုၚ်စေဝ်ပၞောန်လလောၚ်တြးပ္တိတ်လဝ်ကီုဂှ် ဗတိုက်ဖ္အောဝ်လဝ်ရ။
အခိၚ်လၟုဟ်ဏံ ဟိုတ်နူပေါဲဗတိုက်ၜါလ္ပာ်တုဲ ညးဒေသနူကွာန်ချောၚ်နှေတ်ပေါက် ကေုာံကွာန်တုၚ်ခွေါန် ဒးဂြိပ်ဒဴပါဲဓလေတ်ဒၟံၚ် သီုအလုံမွဲကွာန်တုဲ နွံဒၟံၚ်ပၟိက်ကဵု အရီုဗၚ်စၞစ ကေုာံဂဥုဲဇဗတအ်ရဂှ် ဂွံတီကေတ် နူညးဒေသ ပါဲဒဴဘဲပၞာန်တအ်ရ။
ဂိတုမာတ်ချ် စၟတ်တ္ၚဲ (၂၉)တုဲကၠုၚ်တေံလေဝ် ပ္ဍဲဂၠံၚ်တၞၚ်သဳ-မောၚ်တောၚ် ကွာန်ချောၚ်နှေတ်ပေါက်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်က္တဵုဒှ်ကၠုၚ်လဝ်ရ။
ရးဒေသဇၞော်တၞၚ်သဳဂှ် သ္ပတမ်နူ ဂိတုဖေဖဝ်ဝါရဳ စၟတ်တ္ၚဲ(၂)တုဲကၠုၚ်ဏံ ကံၚ်ဇြဳပၞာန် လလောၚ်တြးကၠုၚ် ပရေၚ်အုပ်ဓုပ်ပၞာန်တုဲဂှ် အကြာဒပ်ကံၚ်ဇြဳပၞာန်ကဵု ဒပ်စဵုဒၞာညးဍုၚ်ကွာန်တအ် ပေါဲဗတိုက်က္တဵုဒှ်ကၠုၚ်ဒၟံၚ် သိၚ်သိၚ်ကြဳကြဳရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ