လ္ဂုၚ်၊ ဨဗြဴ(၁)
ပ္ဍဲကဵုသ္ဘၚ်အတးသၚ်္ကြာန် ကၠောံသၞာံတၟိဏံ ကံၚ်ဇြဳပၞာန် မဂ္စါန်ဒၟံၚ် ညံၚ်ဂွံစဳမၞိဟ်ဂွံဂၠိုၚ်ဂှ် နူကဵုဌာနဝန်ဇၞော်ယေန်သၞာၚ် ကေုာံ သာသနာတံ နဒဒှ်တၚ်ဆဝ်မ္ၚုဟ် ညံၚ်ဂွိုအ်ဒယှ်ေကဗျလၚ်္ကာၜှ်ေချေတ်တံဂှ် လလောၚ်ပ္တိတ်ကၠုၚ် ပ္ဍဲလိက်ပရိုၚ်တြးဝါဒ မပ္တိတ်လဝ် ပ္ဍဲဂိတုမာတ်ချ် (၃၁) တေံရ။
ပ္ဍဲကဵုတၚ်ဆဝ်မ္ၚုဟ်ဏံဂှ် စပ်ကဵုသ္ဘၚ်အတးသၚ်္ကြာန်တုဲ ညံၚ်သိက္ခာညးတၞဟ်သ္အာၚ် ဟွံသေၚ်မ္ဂး ညံၚ်သိက္ခာဂကောံဗော်သွးတံ ဂွံလီု ဂွံဇီုကပိုက်ဂှ် တိုက်ရိုက်ကဵုဒှ်၊ တိုက်ရိုက်ဟွံသေၚ်ကဵုဒှ် ပွမဟီုဂး၊ ဒယှ်ေ ကဗျလၚ်္ကာၜှ်ေချေတ်တံ၊ ချဳဒရာၚ်ရေၚ်တၠုၚ်တံ ဒှ်တမ် ညံၚ်ဂွံပါဲကဵုပြဝသာ်ဏံဂှ် တာဒၞါလဝ်ရ။
က္ဍိုပ်သ္ကိုပ်ဂကောံအိုဝ်ဝေ ကိုဝ်မေန်တိုဲတေတ်ဂှ်လေဝ် ကဗျလၚ်္ကာၜှ်ေချေတ် (သံချပ်) တံဏံဝွံ ပ္ဍဲအကြာညးဍုၚ်ကွာန်ကဵု ညးထံက်ထ္ၜး ပရူပရာ မက္တဵုဒှ်ဒၟံၚ် အပ္ဍဲဍုၚ်တံဂှ် ဟိုတ်နူဒှ်ဒၟံၚ်တိုက်ရိုက်ဂှ်ရ တၠအဝဵုတံ ဖေက်တုဲ ကၟာတ်လဒဵုလဝ်ရောၚ်ဂှ် သ္ၚဳဂၠိပ်လဝ်ရ။
“ညးဍုၚ်ကွာန်ကဵု ညးမထံက်ထ္ၜးပါ်ပါဲ သၞောတ်အလဵုအသဳတံ ဟိုတ်နူဂွံလုက်စုက်တိုက်ရိုက်ဂှ်ရ အကာဲအရာသာ်ဏံဂှ် တၠအဝဵုအဆက်က်တံ ဖေက်ဒၟံၚ်။ ဟိုတ်ဂှ်ရ ရမျာၚ်ဒယှ်ေကဗျလၚ်္ကာၜှ်ေချေတ် အတးသၚ်္ကြာန်တံဂှ်ဝွံ တၠအဝဵုဂှ် ကၟာတ်လဒဵုဒၟံၚ်လၟိုန်တုဲ ဒှ်အကာဲအရာဍေံတံဖေက်အိုတ်ရဏောၚ်။ မူဟိုတ်ရောဟီုတှ်ေ ညံၚ်ပေါဲဟီုတွံပရေၚ်ဍုၚ်ကွာန် ညံၚ်ကောံဓရီုတံကီု ညးဟီုတွံစန်ဒက်တံ၊ ညးထံက်ထ္ၜးပါ်ပါဲတံကဵု ပုရိသာတ်ညးဍုၚ်ကွာန်တံ ဒၟါနူဂွံလုက်စုက်ကြပ်ပ်တိုက်ရိုက်ဂှ်ရ စိုပ်ကတောဝ်ညးဍုၚ်ကွာန်တံ တိုက်ရိုက်ဏောၚ်။ ဟိုတ်နူကဵုဒှ်အကာဲအရာ သာစိုပ်တရဴဂှ်ရ တၠအဝဵုတံဂှ် ကၟာတ်လဒဵုထောံရ” သာ်ဝွံ ညးသ္ဂးရ။
တုဲကၠုၚ် ပ္ဍဲလက်ထက်ဥူတုၚ်ဇြုၚ်တေံ ဟိုတ်နူမိက်ဂွံထ္ၜးပျး အပြံၚ်အလှာဲပရေၚ်ဍုၚ်ကွာန်တံတုဲ ပွမကၟာတ်လဒဵု ဒဒှ်မဒယှ်ေ ကဗျလၚ်္ကာၜှ်ေချေတ်ပါ်ပါဲတံဏံ ဟွံမွဲတုဲ ကဵုလဝ်အခေါၚ်သၠးပွးကီုလေဝ် ကြဴနူဂှ်တုဲ ဒဵုကဵုအလဵုအသဳ NLD ဂှ် ကဵုပ္တိုန်သေန်သာ စပ်ကဵုဒယှ်ေ(သံချပ်)အတးတံဂှ် နွံလဝ်ရ။
ဒါရာ်တာ ဂကောံရမျာၚ် ဂကောံချဳဒရာၚ်အခေါၚ်ဟီုပ္တိတ်ဗွဲမဗၠးၜး ဇြေတ်ပဳဂှ် ပ္ဍဲလက်ထက်ကံၚ်ဇြဳပၞာန် အခေါၚ်ဟီုပ္တိတ် ဗွဲမဗၠးၜးတံဂှ်ဝွံ ဒှ်ကၠုၚ်ပရေံအိုတ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နူကဵုဒပ်ပၞာန် သီထောံအဝဵုတုဲဂှ် ပ္ဍဲကဵုအခေါၚ်အရာမၞိဟ်သ္ဂောံဂွံနာနာတံဂှ် ပြဟ်လလုဲဆောတ်ယောၚ်စှ်ေကၠုၚ်အိုတ်ရ နွံ။ အရာသာ်လဵုမှ တောတက်တိုန်တံ၊ ခိုဟ်ဂေါဝ်ကၠုၚ်တံ နွံဒၟံၚ်ဗီုကၠာတေံရဟီုတံဂှ် မုမှပ္တောံၜတ်ဟွံဂွံ မုမှဟွံမွဲဒၟံၚ်ရ။ စိုပ်အာ ကဆံၚ်ပရေံအိုတ်ကဵု အကာဲအရာယုတ်သဝ်အိုတ်တံရောၚ်ဂှ် ချပ်ကေတ်ရ။ ၜိုန်ဂှ်ကီုလေဝ် ပ္ဍဲအကြာဏံ ညးဍုၚ်ကွာန် ညးသၟတ် မဗ္တိုက်ပလီုဒၟံၚ် သၞောတ်တၠအဝဵုပၞာန်လၟုဟ်တံ သီုဖအိုတ်ဂှ်လေဝ် အကြာမကၟာတ်လဒဵုဒၟံၚ်ဂှ် ဗီုဂွံဂှ် လုပ်ဒၟံၚ်ပေါဲဗ္တိုက်တံ နွံရ။ ဟီုမ္ဂး ဖေက်အရာတံဏံတုဲ စပ္တံနူကဵုမတံဏံဂှ် ဒဒှ်မကၟာတ်လဒဵုတံဂှ် စုတ်ကၠုၚ် ပ္ဍဲလိက်ပရိုၚ်တံရ” သာ်ဝွံ ညးသ္ဂးရ။
ပ္ဍဲကာလသၚ်္ကြာန် သၞာံ ၂၀၁၉ တုဲကၠုၚ်တေံ အပ္ဍဲရးလ္ဂုၚ်ကဵု ရးဨရာဝတဳ ကောန်ဂကောံဒယှ်ေ(သံချပ်) (ဒေါင်းတို့မျိုးဆက်) (၇) တၠဂှ် ဒၟါနူကဵုလိက်ကဗျ မသ္ကဵုဇီုကပိုက်တဴ သိက္ခာဒပ်ပၞာန်ဗၟာတံ ပါလုပ်ဂးတုဲ နကဵုၝောံပိုဒ် ၅၀၅ (က) သ္ကဵုပွဂုဏ်သိက္ခာကၟိန်ဍုၚ်အေဲဇြဂှ်ကီု၊ နကဵုၝောံပိုဒ် ၆၆( ဃ) ပ္ဍဲကဵုသၞောဝ်ဆက်စၠောံတံဂှ် ပ္ဍဲကဵုပွိုၚ်ဍုၚ် (၆) ပွိုၚ်ဍုၚ်ဂှ် နူကဵုဒပ်ပၞာန်ဗၟာ စောဲဂဗုတ်တုဲ ဖျေံလဝ်ဒဏ်ထံၚ်ရ။
ဂကောံ(သံချပ် ဒေါင်းတို့မျိုးဆက်) မဒက်ပ္တန်လဝ် နကဵုသမဂ္ဂကွးဘာဂှ်ဝွံ ပ္ဍဲကဵုသၚ်္ကြာန်သၞာံတုဲတေံဂှ် နဒဒှ်(သံချပ်) ပၠန်ဂတးဂှ် ပ္တိုန်ထ္ၜးလဟိၚ်ကဵုလဝ် ပ္ဍဲကဵုကွာန်ရး မၞုံပ္ဍဲတိဍာ်ဗၠးၜးမွဲဒၞါဲ ကေုာံ ပ္ဍဲကဵုဗ္ဒိုပ် ဂကောံဒပ်စဵုဒၞါညးဍုၚ်ကွာန်မွဲဂှ် နွံလဝ်ရ။
ကံၚ်ဇြဳပၞာန်ဂှ် ညံၚ်သ္ဘၚ်အတးသၚ်္ကြာန်ဏံ ဂွံစဳမၞိဟ်ဂွံဂၠိုၚ်ဂှ် မွဲကရောံကဵုကၞာထးဗဟဵု၊ ပေါဲပြိုၚ်လှ်ေဒိၚ်၊ ကၞာထးဝေၚ်ဍာ် သၚ်္ကြာန်တွာ်၊ ဗ္စဖျုၚ်စတုဒိသာတံကဵု ကဏ္ဍလဟိၚ်စိုတ် နူကဵုညးတၠရမျာၚ်ဒယှ်ဒယှ်တံဂှ် သွက်ညးဍုၚ်ကွာန်တံ ဂွံပါလုပ်မိပ်မြဟ်မာန်ဂှ် စဳဇန်ဒၟံၚ်ရ။
ဂကောံဇြဟတ်ပၠန်ဂတးတံဂှ် နကဵုညးဍုၚ်ကွာန်တံ လ္ပပါလုပ်ပ္ဍဲအတးသၚ်္ကြာန် ကံၚ်ဇြဳပၞာန် မကၠောန်ဗဒှ်ဂှ်ကဵု ပ္ဍဲကဵုဒၞါဲမၞိဟ်ကောံ အခိၚ်အတးတံဂှ် လ္ပကၠောန်သ္ပအာကၠုၚ်အိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−MOI/92 Solider