မနဳလာ၊ ဨပရဴ (၃)
သွက်ဂွံစဵုဒၞါ နူပွဘပဠဍုၚ်သ္အာၚ်တံမာန် ပ္ဍဲကဵုဗ္ဒိုပ်ပၞာန် ဖဳလေတ်ဖေန် ဍုၚ်အာယှဒိုဟ်အဂၞဲ နဒဒှ်လစှ်ေပွပ္ကတ်ပ္ကေၚ်ပရေၚ်ပၞာန် မဂွံယၟု Army to Army မသၠုၚ်ပ္တိုန် အစောံစရာဲစဵုဒၞါ မနဳလာတံဂှ် ၜါဍုၚ်ပံၚ်တောဲကၠောန်ၜိုတ်လဝ် ပရေၚ်ပ္ကတ်ပ္ကေၚ်ပန်ပှော်တိုက်ရိုက် ကရောံအဖဝ်မိတ်အမေရိကာန်တံရ။
ပရေၚ်ပ္ကတ်ပ္ကေၚ်ဏံဂှ်ဝွံ နကဵုသမ္မတ ဝှာဒဳနာန်မာကောသ်ဂျူနဳယာ ကြဴနူတၚ်တုပ်စိုတ်ဖေဖဝ်ဝါရဳ မသၠဲပ္တိတ်လဝ် အခေါၚ်ကၟိန်ဍုၚ်အမေရိကာန် မက္ဍစိုပ်မာန်တံဂှ်တုဲဂှ် မံက်တိတ်ကၠုၚ်လဝ်ရ။
ပ္ဍဲကဵုပွပ္ကတ်ပ္ကေၚ်ပရေၚ်ပၞာန် လလအ်ပွိုၚ် (၃) သတ္တာဟ မဂွံယၟုသာလာနေဗ် မရေၚ်တၠုၚ်ဒၟံၚ်လၟေၚ်ၚ်သၞာံဂှ် ကောန်ပၞာန်အမေရိကာန် ကေုာံ ဖဳလေတ်ဖေန် (၃၀၀၀) ပြၚ်ပါလုပ်လဝ်တုဲ ပ္ဍဲကဵုဂိတုမာတ်ချ် (၃၁) ဂှ် ပန်ပှော်ထ္ၜးပျးလဝ် သီုကဵုကွဳစၚ်ခြပ်ပသဲ ကေုာံ ပရေၚ်ပ္ကတ်ပ္ကေၚ်ပန်ပှော် လွဟ်ဍောတ်တိုက်ရိုက်တံကီု သီုကဵုပန်ပှော်ထ္ၜးလဝ် ကမ်လှောဝ်အမၠံက် မဆုဲပြံၚ်ဂွံကဆံၚ်သၠုၚ်ၚ်တံဂှ်ရ။
“အခါလၟုဟ်ဂှ် ပိုယ်တံဝွံ နူကဵုအဝ်ပရေယှေန်ဂီုကၠီုအပ္ဍဲဍုၚ်ဂှ် ပြံၚ်လှာဲကၠုၚ် ဒဵုကဵုအဝ်ပရေယှေန်စဵုဒၞါတွဵုဒၞက်တံမာန်ယျ” သာ်ဝွံ သၞာဲဒဴ တန်ဗ္တောန်ပရေၚ်ပၞာန်ဖဳလေတ်ဖေန် ဟီုဂးလဝ်ရ။
ပရေၚ်ပ္ကတ်ပ္ကေၚ်ပန်ပှော်တိုက်ရိုက်ဂှ် ရေၚ်တၠုၚ်လဝ် လ္တူတ္ကအ် မက်ဇြေဇြေတုဲ အတိုၚ်တၚ်တုပ်စိုတ် ပံၚ်တောဲရေၚ်တၠုၚ် ပရေၚ်စဵုဒၞါမသၠုၚ်ပ္တိုန်ကဆံၚ် (EDCA) မတုပ်လဝ်စိုတ် ကုအလဵုအသဳမနဳလာဂှ်မ္ဂး တ္ကအ်ဏံဝွံ ပၞောဝ်ကဵုဒၞါဲအမေရိကာန်တံ ကလိဂွံအခေါၚ်က္ဍစိုပ်မာန်ဂမၠိုၚ်ဂှ် ဒှ်မွဲရ။
ပ္ဍဲသၟဝ်တၚ်တုပ်စိုတ်ဏံဂှ် ကၟိန်ဍုၚ်အမေရိကာန်ဝွံ အခေါၚ်သိုၚ်ခၞံစမြိုၚ် ပရေၚ်ပၞာန် ကေုာံ ပရေၚ်စွံကြိုၚ်ကၠေၚ်စၞပၟတ်တံ၊ ဂၠံၚ်ဂြိပ်တံနွံတုဲ၊ ပရေၚ်ဒစးဒုၚ်စွံဗ္ဂပ် လွဟ်လက်နက်ကိရိယာတံကီု၊ တန်ဗ္တောန်ဖက်ဆော ကုဌာန်ဂအုပ်ပရေၚ်ပၞာန် မၞုံဍုၚ်ဖဳလေတ်ဖေန်တံ နွံဂှ် ဂွံတီကေတ်ရ။
နဒဒှ်စဳထ္ၜး ပ္ဍဲလက်ထက်သမ္မတမာကောသ် ဒဒှ်ရပရေၚ်ဆက်ဆောံ ကုဇြဟတ်ဂၠးတိဍုၚ်ပလိုတ်တံ သၠုၚ်တိုန်ကၠုၚ်ဂှ်တုဲ ပ္ဍဲဂိတုကၠုၚ်စိုပ်ဏံလေဝ် အမေရိကာန် ကေုာံ ဖဳလေတ်ဖေန်တံဝွံ ကၠောန်ဗဒှ်အာ ပွပ္ကတ်ပ္ကေၚ်ပရေၚ်ပၞာန် အဇာဇၞော် ပ္ဍဲတ္ကအ်မက်ဇြေဇြေရောၚ်။
Ref: CNA