ဗိက်၊ ဨဗြဴ(၄)
ဟိုတ်နူပေါဲဗတိုက် သာသ္ကာတ်မြဟ်ကၠုၚ်မာန်ဒၟံၚ်ဂှ်ရ ညံၚ်ဟွံဂွံတတ်ကၠောံအာကၠုၚ် ဂၠံၚ်ဇၞော်ကၟိန်ဍုၚ် ဗိက်-ဘုက်ပျေန် ကေုာံ ဂၠံၚ်ထုမ်ခါ-မဝ်တောၚ်ဂှ် ဒပ်စဵုဒၞာညးဍုၚ်ကွာန် (ခရိုၚ်ဗိက်)တံဒပ်လၟိဟ်(၂) လလောၚ်တြးလဝ် တၚ်ကဵုသတိကာတၟေၚ်ရ။
လၟုဟ်ဏံ ပ္ဍဲပွိုၚ်ဍုၚ်တၞၚ်သဳ ပရေၚ်ပၞာန်သ္ကာတ်မြဟ်ဒၟံၚ်တုဲ ပေါဲဗတိုက်ဂမၠိုၚ် သ္ကာတ်မြဟ်ကၠုၚ်ဒၟံၚ်ဂှ်ရ ဟွံမိက်ကဵုညးဍုၚ်ကွာန်အာတရဴ ဟွံဆေၚ်ဆက်တအ် ဇီုကပိုက်ဒးတုဲ ဒးလလောၚ်တြးပ္တိတ်ကၠုၚ် တၚ်သတိရဂှ် ဟီုသ္ဂးလဝ်ရ။
ဟိုတ်ဂှ်ရ တ္ၚဲဏံ သ္ပတံနူ ဂိတုဨဗြဴ စၟတ်တ္ၚဲ(၃)တုဲ ဂၠံၚ်ဇၞော်ကၟိန်ဍုၚ် နူဒဒန်တိုၚ်ကျေနာန် ပွိုၚ်ဍုၚ်ဗိက် စဵုကဵုကွာန်မနိုဝ်ယုမ်(မနိုးရုံး) ပွိုၚ်ဍုၚ်ဘုက်ပျေန်ကီု သီုကဵုဂၠံၚ်ဆက်စၠောံဗၞိက်ပယျဵု ထုမ်ခါ-မဝ်တောၚ် တာဒၞာလဝ် ညံၚ်ဟွံဂွံသုၚ်စောဲရ။
ညးတာလျိုၚ်တံဒပ်ခရိုၚ်ဗိက် လၟိဟ်(၂) မွဲတၠဂှ်မ္ဂး ဒးတာဒၞာကၠုၚ်ဂၠံၚ်ဍာန်ဗီုဏံဂှ် ပ္ဍဲတုဲကၠုၚ်မွဲၜါတ္ၚဲဏံ ဟိုတ်နူပရေၚ်ပန်ပှ်ောဒး ကွဳစက်ပ္ဍိုက်ညးအာတရဴ ဗာန်ဗက်ကၠုၚ်ဒၟံၚ်ရေၚ်ကွဳစက်ကံၚ်ဇြဳပၞာန်ဗၠေတ်မှာ က္တဵုဒှ်လဝ်ဂှ်ရ လကြဴမ္ဂး ညံၚ်ပရေၚ်ပရောဗီုဏံ ဟွံဂွံထပ်က္တဵုဒှ် ဒးရေၚ်တၠုၚ်လဝ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
သ္ကုတ်ဂၠံၚ်ဗိက်-ဘုက်ပျေန် ကေုာံ ထုမ်ခါ-မဝ်တောၚ်ဂှ်မ္ဂး ဒဒှ်ရကၟာတ်ဒၞာအာ စၟတ်အပိုၚ်ခြာတ္ၚဲဟၟဲကီု တ္ၚဲက္လေၚ်သုၚ်စောဲမာန်ဂှ် ကလေၚ်လလောၚ်တြးကဵု နစၟတ်တ္ၚဲကေုာံ အခိၚ်အခါပၠန်ဏောၚ်ဂှ် ဟီုသ္ဂးလဝ်ရ။
ဂိတုဨဗြဴ စၟတ်တ္ၚဲ(၁)တုဲကၠၚ်တေံ အခိၚ်ဗ္တံဂှ်လေဝ် ယာဉ်ပ္ဍိုက်ညးအာတရဴ တိုန်ကၠုၚ်လ္ပာ်ကအ်သံၚ်ဂှ် နူလ္ပာ်ဒပ်စဵုဒၞာညးဍုၚ်ကွာန်တအ် ပန်ပှ်ောဒးလဝ်ဗၠေတ်မှာအာ ပ္ဍဲဂၠံၚ်ဇၞော်ကၟိန်ဍုၚ် အကြာကွာန်လေဝ်တောၚ်ယာ ကေုာံကွာန်တမုတ်ချုမ် ပွိုၚ်ဍုၚ်တၞၚ်သဳဂှ်ရ ညးအာတရဴ (၂)တၠ ဒးချိုတ်လဝ်တုဲ ဂွံလဝ်ဝပ်(၅)တၠ မၞုံရ။
ပွိုၚ်ဍုၚ်တၞၚ်သဳဂှ်မ္ဂး ပ္ဍဲဂိတုမာတ်ချ် နူစၟတ်တ္ၚဲ(၂၈) စဵုကဵုဂိတုဨဗြဴ စၟတ်တ္ၚဲ (၂)ဂှ် ပေါဲဗတိုက်က္တဵုဒှ်လဝ် ဟွံအောန်နူ (၈)ဝါနွံတုဲ လ္ပာ်ကံၚ်ဇြဳပၞာန် ဒးချိုတ်လဝ် ဗ္ဒာဲ (၁၀)တၠကီု လ္ပာ်ဒပ်စဵုဒၞာညးဍုၚ်ကွာန်တအ်လေဝ် ဇီုကပိုက်ဒးလဝ်ဝပ် နွံဒၟံၚ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – CJ