ပါရေတ်၊ ဨဗြဴ(၄)
ပၞောဝ်ကဵုဝန်ဇၞော်မဒှ်အဓိက သမ္မတပြၚ်သေတ် အဳမာန်နျူယဴမာခမ်ဂမၠိုၚ် ဝန်ဇၞော်မွဲတၠဂှ်ဝွံ ဟိုတ်နူထ္ၜးလဝ်ရုပ် ပ္ဍဲမုက်လိက်မဂ္ဂဇြေန် ပလေဝ်ဗွိုၚ်တံဂှ်ရ သ္ကဵုအလဵုအသဳပြၚ်သေတ် ချဳဇတဝ်အာရ။
ဟိုတ်နူကဵုဗီု ဟွံမွဲကဵုဂၠိက်ယာတ် မသ္ကဵုချဳဇတဝ်အာဂှ်ကီု ကေုာံ သီုကဵုအေန်တာဗျူ (၁၂) မုက်လိက် ဝန်ဇၞော်မာလေန်ချာတ် မထ္မံက်ထ္ၜးလဝ် ပ္ဍဲမဂ္ဂဇြေန်မၞိဟ်တီဂၠိုၚ်တံဂှ်တုဲလေဝ် ကဆံၚ်ထံက်ဂလာန်တံ စှ်ေအာလဝ်ရ။
တၚ်သ္ဂုတ်သွာတ် သွက်ဂွံထ္ၜးရုပ် ပ္ဍဲမဂ္ဂဇြေန်ဏံဂှ်ဝွံ ပရေၚ်ပါ်ပါဲ နူကဵုသ္ကိုပ်ဝန်ဇၞော် နူအပ္ဍဲဗော်ညးဂှ်ကီု သီုကဵုသေဌဳမေဿချာတ် အေဝ်လ်လဳသဗာတ်တံဂှ် မံက်တိတ်ကၠုၚ်လဝ်ရ။
ညး မဒှ်မၞိဟ်ဗြဴသၟာပရေၚ်ဍုၚ်ကွာန်−သၟာချဳဒရာၚ်ကတိုၚ်ကၟဟ်မွဲတၠဂှ်ဝွံ သွက်ဂွံသောၚ်ကလးထ္မံက်ထ္ၜး မူဝါဒမၞိဟ်ဗြဴ၊ ပွပကီုပရာပ် အခေါၚ်အရာမၞိဟ်ဗြဴ၊ ပရေၚ်ဍုၚ်ကွာန်၊ ပရေၚ်ဂၠးတိက္တဴက္တာန်ကၠုၚ် ကေုာံ ဒဵုကဵုပရေၚ်လိက်ပတ်တံ အရာအိုဿီုဂှ်တုဲ တုပ်လဝ်စိုတ် သွက်ဂွံသှ် ကုအေန်တာဗျူဂှ်ရောၚ်ဂှ်လေဝ် ဂွံတီကေတ်ရ။
ညးဝွံ ပ္ဍဲကဵုဂတိုပ်မုက်လိက်ဂှ် ၜိုန်ရလ္တက်လဝ်ကယိုၚ်ကယျဝ် ပေၚ်ၚ်ကီုလေဝ် အပ္ဍဲ (၁၂) မုက်လိက် လ္ပာ်အပ္ဍဲဂှ် ပူဂန်လဝ်ကဵု အလာံဍုၚ်ပြၚ်သေတ်တုဲ နကဵုဗီုပြၚ်ဟာန်ဗာန် မၞုံကဵုဇြဟတ်တံၚ်ဂြဲတံဂှ် ဒဒှ်ရထ္ၜးလဝ်ရုပ်ဂှ် ထ္မံက်ထ္ၜးလဝ်ရ။
ပ္ဍဲကဵုဗီုဓာတ် မပြးတိတ်ကၠုၚ်တံဂှ် ဝန်ဇၞော်ဝွံ နကဵုကယျိုၚ် ပူလဝ်ပၞးမွဲလ္ပာ်ဓဝ်ဂှ်ကီု ပ္ဍဲကဵုဗီုမွဲဂှ် နကဵုက္ဍိုပ်လိက် “ဝန်ဇၞော်သၠးပွး” ဂးတုဲ ထ္ၜးပျးလဝ်ကယျိုၚ်ဂှ်ရ။
ညးပါ်ပါဲ မေဿချာတ်ပါဂှ်ဝွံ ဗီုပြၚ်ညးဝွံ ဟွံစှ်ေကဵုသဘာဝတုဲ ဒဒှ်ရသ္ဇက်ဒးဂွ သွက်ဗော်ညးရောၚ်ဂှ် ဟီုဂးလဝ်ရ။
ညးကၠောန်ကမၠောန်မွဲစွံ ကုမေဿချာတ်ပါ မၞုံယၟုမာန်ဒဳဂှ် “ ဣဏံဂှ် ထေၚ်စလဝ် April Fool’s Day ဏောၚ်” သာ်ဝွံ ဟီုရ။
“ ဒတူလိုၚ် သွက်ကေၚ်ကာညးဗြဴဂှ် အဲကၠိုဟ်ကေတ်မာန်ကီုလေဝ် မူဟိုတ် ဒးကၠောန်ပ္ဍဲပလေဝ်ဗွိုၚ်ဟီုဂှ် ဟွံကၠိုဟ်ပုဟ်၊ နဲကဲတၞဟ်ဟ်တံလေဝ် နွံဒၟံၚ်ဏီဏောၚ်” သာ်ဝွံ ညးဆက်ဟီုလဝ်ရ။
မေဿချာတ်ပါဝွံ ကုညးမပါ်ပါဲ ကာဗာ Playboy ညးဂှ် ကော်စလဝ် မၞိဟ်က္ဍိုပ်ကဗတဇြုံတုဲ “စဵုဒၞါ အခေါၚ်ထ္မံက်ထ္ၜး ခန္ဓဇကု မၞိဟ်ဗြဴတံဂှ် ဇၟာပ်အခိၚ်၊ ဇၟာပ်ဒၞါဲရဏောၚ်။ ပ္ဍဲပြၚ်သေတ်ဂှ် မၞိဟ်ဗြဴတံဂှ် သၠးပွးတုဲ၊ ကုမၞိဟ်မဖံက်ပၠန်တံကဵု မၞိဟ်ဂြောပ်လဝ်စၞာံအိုဿီုတံဂှ် ရှ်ေသှ်ေဒၟံၚ်ရ” သာ်ဝွံ ချူပ္တိုန်လဝ် ပ္ဍဲတွေတ်တာရ။
Ref: Independent.ie