ဒဳမအ်သဵု၊ ဨဗြဴ(၄)
ပ္ဍဲတွဵုရးကရေၚ်ဍာဲ ပ္ဍဲသ္ကုတ်ဗၟံက်ဒဳမအ်သဵုဂှ် ဟိုတ်နူပေါဲဗ္တိုက်တံ သ္ကာတ်မြဟ်ဒၟံၚ်ဂှ်ရ ညးဍုၚ်ကွာန်ပါဲဒဴဘဲပၞာန် မဂြိပ်တိတ်ကၠုၚ် ပ္ဍဲပယျဵုသေံ−ကရေၚ်ဍာဲဂှ် နွံကၠုၚ် ဗ္ဒါဲ (၁၀၀၀) ရောၚ်ဂှ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးပါဲဒဴဘဲပၞာန်ကရေၚ်ဍာဲ မဆုဲပြံၚ်ကၠုၚ် ပ္ဍဲပယျဵု ဗွဲမဂၠိုၚ်ဂှ်ဝွံ ဒှ်ညးဗြဴ၊ ညးဇၞော်ဗျုထဴ ကေုာံ ကောန်ၚာ်သၟတ်တံတုဲ ညးတံဝွံ စနူဂိတုမာတ်ချ် အခိၚ်ပြဟ်ဟ်တေံတုဲ ဟိုတ်နူဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ဗွဲမသ္ကာတ်မြဟ်ဂှ်တုဲ ပါဲဒဴကၠုၚ်ဘဲပၞာန်အိုတ်ရ။
ညးပါဲဒဴဘဲပၞာန် ဗွဲမဂၠိုၚ်ဂှ်ဝွံ ဒှ်ညးမသ္ပဒတဴဒၟံၚ် ပ္ဍဲဂကောံကွာန် ဒဝ်တမကျဳဂမၠိုၚ်တုဲ ကၠုၚ်စိုပ်ပါဲဒလေတ်လဝ် ပ္ဍဲပယျဵုသေံ−ကရေၚ်ဍာဲ မဒးကွာ်ကေတ် တရဴအောန်အိုတ် ၜိုတ် (၅) တ္ၚဲ ခက်ခက်ခုဲခုဲဂှ် ဂွံတီကေတ်ရ။
ညးဍုၚ်ကွာန် မပါဲဒလေတ်ကၠုၚ် ပ္ဍဲဒေသပယျဵုတံဂှ်ဝွံ ယဝ်ရကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်မ္ဂး ဂြိပ်လုပ်လ္ပာ်သေံတေံဂွံတုဲ ဖေက်ဒးဒုၚ်ပန်ပှော်ဗ္တိုက် နူကဵုတရဴကျာဂှ်ရ ပါဲဒလေတ်ကၠုၚ်အိုတ်ဂှ် ညးမရီုဗၚ်ဒၟံၚ်ပရေၚ်ပါဲဒဴဘဲပၞာန်မွဲတၠ ဟီုရ။
ပ္ဍဲတွဵုရးကရေၚ်ဍာဲဂှ် ဟိုတ်နူပေါဲဗ္တိုက်တံတုဲ ညးပါဲဒဴဘဲပၞာန် ဂၠိုၚ်တိုန်ကၠုၚ် မွဲတ္ၚဲတုဲမွဲတ္ၚဲတုဲ နွံပၟိက်ဒၟံၚ်ကဵု ဇွောံမစၞစ၊ ဒၞါဲစ္ၜုဲစ္ၜော် ကေုာံ ဂဥုဲဇဗတံတုဲ လ္ပာ်ကံၚ်ဇြဳပၞာန် နကဵုထပိုတ်ပန်ထပိုတ် ညံၚ်ဂွိုအ်ယိုက်ဏာနၚ် ကပေါတ်အရပ်စပ်သ္ဇိုၚ်တံဂှ် ကၠောန်ဒၟံၚ်တေၚ်ၚ်ဂြတ်တ်ရောၚ်ဂှ် ဂွံတီကေတ်ရ။
ကြဴနူဒပ်ပၞာန်သီအဝဵုတုဲ ပ္ဍဲကဵုတွဵုရးကရေၚ်ဍာဲဂှ် ဟိုတ်နူပေါဲဗ္တိုက်ၜါလ္ပာ်တံတုဲ ညးဍုၚ်ကွာန်ဒေသ ၜိုတ် (၈၀) တၟံကၠံ ဒးဂြိပ်ဒဴပါဲဒလေတ်ဒၟံၚ်တုဲ လၟိဟ်ဂၞန်ဏံဝွံ ပ္ဍဲကဵုတွဵုရး လၟိဟ်မၞိဟ် ၜိုတ် (၃) ကိုဋ် မဖျေံသ္ဇိုၚ်မံၚ်တန်တဴဒၟံၚ်ဂှ် (၂) ကိုဋ်ဘာ်ပြၚ် ဒးဂြိပ်ဒဴဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KANTHARYADDY TIMES