ဘာပန်၊ ဨပရဴ (၅)
ပ္ဍဲခရိုၚ်ဘာပန် ဗော်သွးကောန်ဂကူကရေၚ် KNU ဂှ် အပ္ဍဲဂိတုမာတ်ချ်မွဲဂိတု တုဲကၠုၚ်တေံ အကြာဒပ်မၚ်ပယျဵု BGF ကံၚ်ဇြဳပၞာန်တံကဵု ဒပ်မဟာ (၅) KNLA တံဂှ် ပေါဲဗ္တိုက်အပံၚ် ဗ္ဒါဲ (၂၀၀) က္တဵုဒှ်လဝ်ရောၚ် ဒပ်မဟာ (၅) လလောၚ်ပ္တိတ်လဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် လ္ပာ်ကံၚ်ဇြဳပၞာန် ကေုာံ လ္ပာ် BGF တံဂှ် (၉၂) တၠ ချိုတ်တုဲ (၄၅) တၠ ကလိဂွံလဝ်ဝပ်တုဲ လ္ပာ်ကံၚ်ဇြဳပၞာန် ပ္ဍဲကဵုညးမချိုတ်အာတံဂှ် သ္ကိုပ်ဒပ်စြေက် (၁) တၠ ကေုာံ အကြာပ်ဒပ် (၂) တၠ ပါလုပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
လ္ပာ်ဒပ်မဟာ (၅) KNLA ဂှ် (၄) တၠ ပြဟ်လလုဲတုဲ (၁၄) တၠ ဇီုကပိုက်ကလိဂွံလဝ်ဝပ်ဂှ် ဒပ်မဟာ (၅) သ္ဂးလဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် သီုကဵုပလီုပလာ်ဂွံလဝ် ကွဳစက်အရပ်စပ်ပၞာန် ကံၚ်ဇြဳပၞာန်တံ (၃) ဖ္ဍိုက်ကဵု ကွဳလိုန်ဓာတ် (၁) ဖ္ဍိုက်တံရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ဗ္တိုက်ဂြာတ်လဝ်မခတိုဟ် နကဵုက္ၜၚ်ကျာဂျက် (၂) ဝါတုဲ ဒၟါနူပန်ပှော်စုတ်လဝ် လွဟ်ဇၞော် (၁၄၂) မ အပ္ဍဲကွာန်ညးဍုၚ်ကွာန်ဒေသတံ မံၚ်တန်တဴတံဂှ်ကဵု ကၠအ်ဂူတံဂှ်ရ ညးဒေသ (၁) တၠ ချိုတ်တုဲ (၅) တၠ ဇီုကပိုက်ကလိဂွံလဝ်ဝပ်ရောၚ်ဂှ် ဂွံတီကေတ် အတိုၚ်တၚ်လလောၚ်တြးဝွံရ။
ပ္ဍဲခရိုၚ်ဘာပန် KNU ဂှ် ဟိုတ်နူဒပ်ကံၚ်ဇြဳပၞာန် ကေုာံ ဒပ်မၚ်ပယျဵု ဂကောံဒပ် BGF တံ ကၠောန်သ္ပကလိလောန်ဝးပ္ကဝ်ဒၟံၚ် အခေါၚ်အရာမၞိဟ် ကေုာံ ပရေၚ်ချဳဒရာၚ်ပရေၚ်ပၞာန်တံဂှ်ရ ပေါဲဗ္တိုက်ဆေၚ်မုက် ကုကောန်ဂကောံဒပ် ဒပ်မဟာ (၅) KNLA တံ က္တဵုဒှ်ဒၟံၚ် အရိုဟ်ဒဒှ်တ္ၚဲတုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသ ဗွဲမဂၠိုၚ်ဂၠေၚ် ဒးဂြိပ်ဒဴပါဲဒလေတ်ဒၟံၚ်ရောၚ်ဂှ် ဂွံတီကေတ် ဇရေၚ်ဂကောံမှာဇန်ကရေၚ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်− Cobra Column