မတ်မလီု၊ ဨပရဴ (၅)
ဟိုတ်နူတၚ်သၞောတ်ဗ္ၜတ် ကံၚ်ဇြဳပၞာန်တံဂှ်တုဲ အပ္ဍဲအကြာတ္ၚဲတံဏံ ၚုဟ်ကၠေၚ်စက် ကလေၚ်သၠုၚ်တိုန်ကၠုၚ်ဂှ်ရ ပ္ဍဲကာလအတးဏံ ၚုဟ်က္ဍၚ်တိုန်ကၠုၚ်မာန်ရောၚ်ဂှ် တၠကမၠောန်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ကၠေၚ်စက်ဝွံ နူဂိတုဨပရဴ (၁) စဵုကဵုဂိတုဨပရဴ (၄) ဂှ် ကၠေၚ်ဓာတ် (၉၅) မွဲလဳတာ နူပွဳပွူ (၂၂၄၀) ဒ္ကေဝ်ဂှ် သၠုၚ်တိုန်ကၠုၚ် စဵုကဵု (၂၄၀၀) တုဲ ကၠေၚ်ဓာတ် (၉၂) ဂှ်လေဝ် နူကဵု (၂၁၅၀) ဒ္ကေဝ်ဂှ် သၠုၚ်တိုန်ကၠုၚ် ဗ္ဒါဲ (၂၃၀၀) ဒ္ကေဝ်၊ ပရဳမဳယာမ်ဒဳဇြေဝ် နူပွဳပွူ (၂၂၀၀) ဒ္ကေဝ်ဂှ် ဒှ်အာစဵုကဵု (၂၃၀၀) ဒ္ကေဝ် ထပ်သၠုၚ်တိုန်ကၠုၚ် (၁၅၀) ပြၚ်ရ။
ၚုဟ်ကၠေၚ်စက် သၠုၚ်တိုန်ကၠုၚ်ဂှ်ဝွံ ဟိုတ်ဒၟါနူကံၚ်ဇြဳပၞာန် သွံတြးကဵုကၠေၚ်စက် ၜိုတ်နွံပၟိက် ဟွံမွဲဂှ်ရ ကၠေၚ်စက်လ္ၚဵု ပိုတ်ဒၟံၚ်တုဲ ဒမြိပ်ပါ်ပရအ်တံကဵု ဒမြိပ်သုၚ်စောဲတံ ဟွံသၟဟ်တးဂှ်ရ ဍာ်ဇမၠိၚ် အကာဲအရာဟွံခိုဟ်ပုဟ်ဂှ် တၠကမၠောန်သွံရာန်ကၠေၚ်စက်မွဲတၠ ဟီုရ။
“ကၠေၚ်ဂှ် ရုမ်မ်ဂပ်ပ် ဟွံသွံကဵုပုဟ်။ ဍေံဒှ်ဒၟံၚ် ဗီုဏံဏောၚ်။ ကၠေၚ်ဂှ် အလဵုနွံမံၚ်အလဵုဟွံတီပုဟ်၊ အခိၚ်လၟုဟ်ဂှ်လေဝ် အတိုၚ်တီလဝ်ဂှ်ရ ကၠေၚ်ဂှ်ပိုတ်ဒၟံၚ်ဏောၚ် ဂၠိုၚ်။ အဓိကဂှ်တှ်ေ (၉၂) ကဵု (၉၅) ဂှ် ဟွံပိုတ်ပုဟ်။ လၟုဟ်ဂှ် မုပိုတ်ဒၟံၚ်ရောဟီုတှ်ေ ဒဳဇြေဝ် ကဵု ပရဳမဳယာမ် ကၠေၚ် (၂) ဂကူဏံ ပိုတ်ဒၟံၚ်။ လၟုဟ်ယဝ်ရရာန် (၁) ဠက်လဳတာမ္ဂး ရာန်ဟွံဂွံပုဟ်။ ကၠာတေံဟီုမ္ဂး (၁) ကိုဋ်လဳတာ (၂) ကိုဋ်တံ ဂွံမံၚ်ဏောၚ်။ လၟုဟ်ဂှ် (၁) ကိုဋ်၊ (၂) ကိုဋ်လဳတာဂှ် လ္ပဟီုဏီ မိက်ဂွံရာန် (၁) ဠက်လဳတာမ္ဂး သၠုဲဂှ်လေဝ်နွံဒၟံၚ်ရ၊ ရာန်တှ်ေ ရာန်ဟွံဂွံပုဟ်။ က္ၜၚ်တံလုပ်ဒၟံၚ်ကီုလေဝ် ဒးကလေၚ်အာသၟဝ်အုပ်ဓုပ် အလဵုအသဳဏံဂှ်တုဲ အရၚ်ဆေၚ်ကၠေၚ်တံ မပါ်ပရအ်လဝ်ဂှ်ကဵု အရာမဒးသုၚ်စောဲ ပ္ဍဲရာသဳဏံ ခဠပ်ဆဍေံဂှ် ဗီုလဵုမှ ဟွံသၟဟ်တးပုဟ်။ ဒှ်ဒၟံၚ်ဗီုဏံဏောၚ်၊ ညအ်ဂှ်လေဝ် ဒှ်ဒၟံၚ်ဍာ်ဇမၠိၚ်တုဲ အကာဲအရာဟွံခိုဟ်ပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ဟိုတ်နူဒှ်အခိၚ်ကာလအတး တ္ၚဲဒေါအ်ဇူဂၠိၚ်တုဲ ပရေၚ်အာကၠုၚ်တရဴ ဂၠိုၚ်မာန်တုဲ ယဝ်ရဟွံသွံကဵု ကၠေၚ်စက်ၜိုတ်နွံပၟိက်တံဂှ်မ္ဂး အပ္ဍဲဗွဝ်ဖျာ ကၠေၚ်စက်ပိုတ်အိုတ်တုဲ ၚုဟ်ကၠေၚ်စက် သာသၠုၚ်တိုန်ကၠုၚ်မာန်ရောၚ်ဂှ် တၠကမၠောန်ကၠေၚ်စက်တံ သ္ၚဳဂၠိပ်လဝ်ရ။
မွဲလ္ပာ်တေံပၠန် ဒုက္ဍိုပ်သ္ကိုပ်ပၞာန်သီအဝဵု ဒုသ္ကိုပ်ပၞာန်ဇၞော်သဵုဝေန်ဂှ် ဟိုတ်နူၚုဟ်ကၠေၚ်စက်ဂၠးတိ သၠုၚ်တိုန်ဒၟံၚ်ဂှ်ရ သွက်ဂွံဖအောန်ဖျေံကဵု ပရေၚ်ရပ်စပ်သြန်ဍုၚ်သ္အာၚ်တံဂှ်ကဵု သွက်ဂွံဝေၚ်ပါဲကဵု ဒဒှ်မခရိတ်အိုတ် ဂၠိုၚ်တံဂှ်ဂးတုဲ ပရေၚ်သုၚ်စောဲကၠေၚ်စက် မပၠောပ်နၚ် နူကဵုဍုၚ်သ္အာၚ်တံဂှ် ၜိုတ်သၟဟ်ရထ ဖအောန်ဖျေံအာရောၚ် ကြဴနူဟီုဂးတုဲဂှ် အရၚ်မပါ်ပရအ်ဒၟံၚ်ကၠေၚ်စက်တံဂှ် ဖအောန်ဖျေံအာလဝ် ဗၞတ် (၁၀) တၟံကၠံရ။
ပ္ဍဲဍုၚ်ဗၟာဂှ် ၚုဟ်ကၠေၚ်စက်ဝွံ ပ္ဍဲလက်ထက်အလဵုအသဳ NLD တုဲကၠုၚ်တေံ ကၠေၚ်ဓာတ်မွဲလဳတာ နူကဵုၚုဟ်မၞုံ (၆၀၀) ဒ္ကေဝ်ဓဝ်ဂှ် ကြဴနူဒပ်ပၞာန်သီအဝဵုတုဲ ၚုဟ်ကၠေၚ်စက် သၠုၚ်တိုန်ကၠုၚ် (၄) ဆပြၚ်တုဲ ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီုဓာတ်−TLT