သေတ်ဂါၚ် – ဨဗြဴ(၅)
ပ္ဍဲဒေသပၞာန်စၟတ် (၁)၊ ရးသေတ်ဂါၚ်၊ ရးမဂွေ၊ ရးအၚ်ဝ၊ တွဵုရးသေံဇၞော် သ္ကုတ်သၟဝ်ကျာတအ်ဂှ် ပံၚ်လၟိဟ် ပေါဲဗတိုက် (၄၁၇) ဝါ က္တဵုဒှ်လဝ်တုဲ လ္ပာ်ကံၚ်ဇြဳပၞာန် (၆၄၉) တၠ ဒးချိုတ်လဝ်တုဲ (၇၅၆)တၠ ဇီုကပိုက်ဒးလဝ်ဝပ်ရဂှ် ဌာနဝန်ဇၞော်ပရေၚ်စဵုဒၞာ NUG လလောၚ်တြးလဝ် ပရိုၚ်ရ။
ပေါဲဗတိုတ်တအ်ဂှ် ဒှ်ပေါဲဗတိုက်က္တဵုဒှ်လဝ် ပ္ဍဲပွိုၚ်ဂိတုဖေဖဝ်ဝါရဳ တုဲကၠုၚ်မွဲဂိတုဏံရဂှ် ဓမံက်ထ္ၜးလဝ်ရ။
ပေါဲဗတိုက်တအ်ဂှ် ဂကောံPDF၊ ပ.က.ဖကေုာံ EROs ပံၚ်တောဲ မၞုံသၟဝ်ကောပ်ကာဲဒေသပၞာန် စၟတ်(၁)တအ် ဗတိုက်လဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
သီဂွံလဝ် နူကံၚ်ဇြဳပၞာန် လွဟ်လက်နက်ဂကူစုၚ် (၃၀)ဒကိုအ် သီုကဵုမကမ်ဗွဲမဂၠိုၚ်ဂၠေၚ်ရဂှ် ဟီုသ္ဂးလဝ်ရ။
ပ္ဍဲပေါဲဗတိုက်တအ်ဂှ် လ္ပာ်ဒပ်စဵုဒၞာညးဍုၚ်ကွာန် သ္ဂံၚ်(၃၃)တၠ ပူဇဴဏာလဝ်လမျီု သွက်ပရေၚ်ပၠန်ဂတးတုဲ (၉၇)တၠ ဇီုကပိုက်ဒးလဝ်ဝပ်ရဂှ် ဂွံတီကေတ်ရ။
ပ္ဍဲသၟဝ်ဌာနဝန်ဇၞော်ပရေၚ်စဵုဒၞာဂှ်မ္ဂး ဒက်ပ္တန်လဝ် ဌာန်ဂအုပ်ဒေသပၞာန် (၅)ဌာနတုဲ ဒက်ပ္တန်လဝ် ကဵုဌာန်ဂအုပ်ရးပၞာန်သ္ကုတ်သၟဝ်ကျာ၊ ဌာန်ဂအုပ်ရးပၞာန်သ္ကုတ်သၠုၚ်ကျာ၊ ဌာန်ဂအုပ်ရးပၞာန်သ္ကုတ်လ္ဒောဝ်၊ ဌာန်ဂအုပ်ရးပၞာန်သ္ကုတ်ဗၟံက် ကေုာံ ဌာန်ဂအုပ်ရးပၞာန် သ္ကုတ်ပလိုတ်တအ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – MOD