ဂဂဝ်- ဨဗြဴ(၅)
ရးဒေသမဂွေ၊ ပွိုၚ်ဍုၚ်ဂဂဝ် ပ္ဍဲပရေၚ်ဗ္ဒပ်ကွာန်ကာန် ဒးဒုၚ်ဗတိုက်လဝ်ဂှ် လ္ပာ်ကံၚ်ဇြဳပၞာန် ဇီုကပိုက်ဒးချိုတ်လဝ် နွံဂၠိုၚ်မာန်တုဲ သီုသီဂွံလဝ် လွဟ်လက်နက်တအ်ရဂှ် ဂကောံစဵုဒၞာညးဍုၚ်ကွာန်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဂိတုမာတ်ချ် စၟတ်တ္ၚဲ (၃၁) တုဲကၠုၚ်ဏံဂှ် သ္ဂံၚ် တံဒပ်ခရိုၚ်ဂဂဝ် စၟတ် ၁၊၇၊ ၁၁၊ ၁၂၊ ၁၄၊ ၁၉၊ ABSDF၊ HYPER UAV FORCE၊ ပ.က.ဖ တအ် ပံၚ်ကောံတုဲ လုပ်စိုပ်ဗတိုက်လဝ် ဗ္ဒပ်ဗၠာဲသၟိၚ်တိဍာ် ကွာန်ကာန်ရ။
ပေါဲဗတိုက်ဂှ် စက္တဵုဒှ်လဝ် နူအခိၚ် (၆)နာဍဳနူဂယးတုဲ စံၚ်ပလီုမာန်လဝ် ဗ္ဒပ်ဗၠာဲသၟိၚ်ရး ကွာန်ကာန် ၜိုတ်(၇၅)တၟံကၠံကီု လ္ပာ်ကံၚ်ဇြဳပၞာန်ၜိုတ် (၄၅)တၠ ဒးချိုတ်လဝ်တုဲ (၁၀)တၠပြၚ် ဒးလဝ်ဝပ်ရဂှ် ဒပ်စဵုဒၞာဒေတအ် လလောၚ်တြးလဝ် ပရိုၚ်ရ။
သွက်ဂွံသီကေတ် ဗ္ဒပ်ဗၠာဲသၟိၚ်ကွာန်ကာန်မာန်ဂှ် ၜိုန်ရဒပ်စဵုဒၞာညးဍုၚ်ကွာန်တအ် ဂစာန်ပ္တိတ်ဇြဟတ်စဵုကဵုပန်ဝါ ပေၚ်ၚ်ကီုလေဝ် လ္ပာ်ကံၚ်ဇြဳပၞာန် ကၠုၚ်ပန်ရီုကဵုက္ၜၚ်ကျာ(၇)အလန်တုဲ ဟိုတ်နူကၠုၚ်ဖျေံစွံကဵုလဝ် ပၞာန်ရီုကဵုက္ၜၚ်ကျာ Mi-17ဂှ်ရ ဒးက္လေၚ်ဆုတ်တိတ်လဝ်ရဂှ် ဂွံတီကေတ်ရ။
ပ္ဍဲပေါဲဗတိုက်ဂှ် သီဂွံလဝ် G-3 (၄)ဒကိုအ်၊ G-4(၁)ဒကိုအ်၊ G-3 မံၚ်(၁)မ၊ ဖျေဲမကမ် (၄)မ၊ ဗုမ်ကၠဟ်(၂)မ၊ စက်ဟီုအရေဝ်(၂)မ၊ ဖုၚ်(၇)မ၊ Laptop(၁)မ၊ ၜုန်(၁) တၞုၚ်၊ သြန် (၆၀၈၀၀) ဒ္ကေဝ် ကေုာံကပေါန်အရပ်စပ်တၞဟ်သ္အာၚ် နူကံၚ်ဇြဳပၞာန်ပၞာန်ရဂှ် ဓမံက်ထ္ၜးလဝ်ရ။
ပ္ဍဲပေါဲဗတိုက်ဂှ် ဟိုတ်နူလ္ပာ်ကံၚ်ဇြဳပၞာန် ဒးဂိလဝ်တုဲ ဂြာတ်ထောံဖျေံဗုမ် ကဵုက္ၜၚ်ကျာဂှ်ရ ပရေၚ်သ္ၚိဒၟံၚ်မၞိဟ်လ္ၚဵုတအ် ဒးဇီုကပိုက်လီုလာ်လဝ် နွံတုဲ ညးဍုၚ်ကွာန် မွဲဗွိုၚ်ကွာန် ၜိုတ်(၅)ကွာန် လၟိဟ်ညးဍုၚ်ကွာန်မွဲလက်ပြၚ် ဒးဂြိပ်ဒဴဒၟံၚ်ဘဲပၞာန်ရဂှ် ဂွံတီကေတ်ရ။
ပ္ဍဲပေါဲဗတိုက်သီဗ္ဒပ်ဂှ် သ္ဂံၚ်လ္ပာ်ဒပ်ပံၚ်ကောံတအ် ဒးပြဟ်လလုဲလဝ် ၜါတၠတုဲ ဒးလဝ်ဘဲဝပ် ဟွံဒးဒှ်ဓဝိၚ် နွံဒ္စိတ်တၠကီု သ္ဂံၚ်မွဲတၠဂှ်မ္ဂး ဒးဆောံလေၚ်လဝ် ဇိုၚ်မွဲဒိုဟ်ရဂှ် ဂွံတီကေတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်-ဒပ်ပရေၚ်စဵုဒၞာပွိုၚ်ဍုၚ်ဂဂဝ်