ဗြဝတဳ၊ ဨဗြဴ(၆)
ပ္ဍဲဒၞာဲပွဳဗွိုၚ်ဍုၚ်တၟိ ယှိုဲကုက္ကိုဝ် ဒပ်မၚ်ပယျဵုကရေၚ် BGF သၟဝ်တဲကံၚ်ဇြဳပၞာန် ထိၚ်ဒဝ်လဝ်ဂှ် သ္ပတမ်နူ ဂိတုဨဗြဴ စၟတ်တ္ၚဲ(၅) အခိၚ်နူဂယးတုဲ အကြာ BGF ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်သ္ကာတ်မြဟ်ဒၟံၚ်ရဂှ် ညးဒေသတအ် ဟီုသ္ဂးလဝ်ရ။
နူဂကောံဒပ်ပရေၚ်ပၠန်ဂတးပံၚ်ကောံတအ် လုပ်စိုပ်ဗတိုက်လဝ် သၞေဟ်ကၚ် ကေုာံ ဗ္ဒပ်ဒပ်မၚ်ပယျဵုကရေၚ် BGF မၞုံကွာန်ထဳကဝ်ထဝ်၊ ထဳချရာ၊ ထဳဝါပလဝ် ဗ္ဒာဲဍုၚ်တၟိယှိုဲကုက္ကိုလ် သ္ကုတ်သၟဝ်ကျာ ဍုၚ်ဗြဝတဳဂှ် ပေါဲဗတိုက်ၜါလ္ပာ်သ္ကာတ်မြဟ် က္တဵုဒှ်ဒၟံၚ်ရ။
ပ္ဍဲပေါဲဗတိုက်ဂှ် လ္ပာ်ဒပ်ကံၚ်ဇြဳပၞာန် သုၚ်စောဲဗတိုက်ရီုဒၟံၚ် နကဵုက္ၜၚ်ကျာတုဲ ဗ္ဒပ်သၞေဟ်ကၚ် BGF မၞုံကွာန်ထဳကဝ်ထဝ် ဗ္ဒာဲဍုၚ်ယှိုဲကုက္ကိုလ်မွဲဗ္ဒပ်ဂှ် ဂကောံဒပ်ပံၚ်ကောံတအ် သီကေတ်လဝ်မာန်တုဲ စံၚ်ပလီုလဝ်ရဂှ် တမ်ရိုဟ်တၚ်ဂၞၚ်ပရိုၚ်ဒေသမွဲတၠ ဟီုသ္ဂးလဝ်ရ။
ပ္ဍဲပေါဲဗတိုက် ဗ္ဒာဲဍုၚ်တၟိယှိုဲကုက္ကိုဝ်ဂှ် ဟိုတ်နူကံၚ်ဇြဳပၞာန် ကၠုၚ်ပန်ပှ်ောလဝ် နကဵုက္ၜၚ်ကျာတုဲ ညးဍုၚ်ကွာန်ယှိုဲကုက္ကိုဝ် ကေုာံကွာန်ဇိုၚ်တအ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲလ္ပာ်ၜဳတောၚ်ယေန် ဗ္ဒာဲပယျဵု သေံ-ဗၟာရ။
ဟိုတ်နူပေါဲဗတိုက်ၜါလ္ပာ်တုဲ ပ္ဍဲဒၞာဲလုပ်တိတ်ဍုၚ်ယှိုဲကုက္ကိုဝ်သီုဖအိုတ်ဂှ် BGF တအ် ကၟာတ်ဒၞာလဝ်တုဲ မၞိဟ်နွံပ္ဍဲဍုၚ်လေဝ် ညံၚ်ဟွံဂွံတိတ်မ္ၚးဏံ ပရေၚ်ကဵုလဝ်တၚ်သမ္တီ နွံဒၟံၚ်ရဂှ် ဂွံတီကေတ်ရ။
ဟိုတ်နူပေါဲဗတိုက် က္တဵုဒှ်လဝ် ဗ္ဒာဲပယျဵုတုဲ ပ္ဍဲလ္ပာ်ဍုၚ်သေံလေဝ် ဒပ်ပၞာန်သေံ ဖျေံဂလိုၚ်လဝ်ပရေၚ်ဂီုကၠီုကီု ညးပါဲဘဲပၞာန်တအ်လေဝ် ကၠောံလုပ်ဒၟံၚ်လ္ပာ်ဍုၚ်သေံ နူကဵုၜဳကြုၚ်တောၚ်ယေန် မွဲကဆံၚ်ရဂှ် ညးဒေသတအ် ဟီုသ္ဂးလဝ်ရ။
ဒၞာဲပေါဲဗတိုက်က္တဵုဒှ်လဝ် ဗ္ဒာဲဍုၚ်ယှိုဲကုက္ကိုဝ်ဂှ် နွံဒၟံၚ်ပ္ဍဲတိဍာ်ထိၚ်ဒဝ် ဗော်သွးကောန်ဂကူကရေၚ် KNU ဒပ်မဟာ(၇)တုဲ ပ္ဍဲတိဍာ်ဒပ်မဟာ(၇)ဏံ ဒှ်ပေါဲဗတိုက်က္တဵုဒှ်လဝ် အလန်ကိုပ်ကၠာအိုတ်ရဂှ် ဒပ်ပံၚ်ကောံပၠန်ဂတးကီု သီုညးစုက်လုက်တအ် ဟီုသ္ဂးလဝ်ရ။
စပ်ကဵုအကာဲအရာပေါဲဗတိုက်တုဲ ပရေၚ်ဇီုကပိုက်ဒးၜါလ္ပာ် အခိၚ်လၟုဟ်ပြဟ်ဟ်ဏံ ဟွံဂွံတီကေတ်ဏီဂှ်ရ ဆက်ဂၠိုက်ဂၠာဲ သၟာန်သၟုက်ဒၟံၚ်ရ။
မွဲလ္ပာ်ပၠန်လေဝ် ပ္ဍဲလ္ပာ်တေန်ဃာန်ညဳနောၚ် မေဝ်ကနေဝ် တိဍာ်ဒပ်မဟာ (၆) မၞုံ လ္ပာ်ပွဳပွူသၠုၚ်ကျာဍုၚ်ဗြဝတဳဂှ်လေဝ် အကြာဒပ်ပံၚ်တောဲ BGF ကံၚ်ဇြဳပၞာန်ကဵု ဒပ်ပၠန်ဂတးပံၚ်ကောံ KNLA တအ် ပေါဲဗတိုက်ဆက်က္တဵုဒှ်ဒၟံၚ်တုဲ ကံၚ်ဇြဳပၞာန် ဗတိုက်ပန်ပှော်ကၠုၚ် နကဵုက္ၜၚ်ကျာ လ္ပာ်ကွာန်မေဝ်ကနေဝ်ပ္ဍဲ မေဝ်ကနေဝ်မ္ၚး ပွိုၚ်ဍုၚ်ဗြဝတဳဂှ်ရ။
ဟိုတ်နူပရေၚ်ဒပ်ကံၚ်ဇြဳပၞာန် ဗတိုက်ပန်ပှော်ကၠုၚ် နကဵုက္ၜၚ်ကျာတုဲ ညးဒေသ နူကွာန်မေဝ်ကနေဝ်ပ္ဍဲ မေဝ်ကနေဝ်မ္ၚး သီုဖအိုတ် ဒးပါဲဒၟံၚ်ဘဲပၞာန်တုဲ သွက်ညးပါဲဒဴဘဲပၞာန်တအ်ဂှ် နွံဒၟံၚ်ပၟိက်ကဵု အရီုဗၚ်အထံက်ပၚ်ပရေၚ်မၞိဟ် နဒဒှ်ကာတၟေၚ်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- Social Media