နေပျဳဒဝ်၊ ဨဗြဴ(၆)
ကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ဂှ် ဂကောံဗတိုက်သရိုဟ် ပွပ္ကီုပရာပ်အလဵုအသဳပရေၚ်ညဳသၟဟ်ကောန်ဂကူ (NUG) ဗဟဵု လလောၚ်တြးကၠုၚ် နဒဒှ်ဂကောံပ္ကီုပရာပ် ပ္ဍဲဂိတုဨဗြဴ စၟတ်တ္ၚဲ (၄)ဏံရ။
တၚ်ကဝ်မယှေန်ပေါဲရုဲမာဲကံၚ်ဇြဳပၞာန် ကၠောန်သ္ပရေၚ်တၠုၚ်ဒၟံၚ်ဂှ် က္တဵုဗဒှ်ကဵု ပရေၚ်ဖေက်လကိုတ် အကြာညးဍုၚ်ကွာန်ကီု၊ ဂကောံပရေၚ်ဍုၚ်ကွာန် အပ္ဍဲဍုၚ်တအ်ဂှ် ညံၚ်ဂွံကၠောန် ကမၠောန်ဟွံကိတ်ညဳကဵုသၞောဝ်ဥပဒေဂှ် ဖ္အောဝ်ကဵုကၠောန်ဒၟံၚ် ဗွဲအဓမ္မဂှ်ရ စၟတ်သမ္တီကၠုၚ် နဒဒှ်ဂကောံပ္ကီုပရာပ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ဂကောံဗတိုက်သရိုဟ်ပွပ္ကီုပရာဗဟဵု NUG ဂှ် ဒ္ဂေတ်ဗက်အခေါၚ်ကၠောန်ဖန်ဖက် မပါလုပ် ပ္ဍဲသၞောဝ်ဥပဒေဗတိုက်သရိုဟ် ပွပ္ကီုပရာပ် ၝောံပိုဒ် ၆၊ ၝောံပိုဒ်လ္ပာ် (ၚ)ကေုာံ ၝောံပိုဒ် (၇၂) ၝောံပိုဒ်လ္ပာ်(ခ)တအ်တုဲ နကဵုတၚ်တုပ်စိုတ် ဂကောံအလဵုသဳ လလောၚ်တြးလဝ်ရဂှ် ဟီုသ္ဂးလဝ်ရ။
မ္ၚးနူဏံပၠန် ကဝ်မယှေန်ပေါဲရုဲမာကံၚ်ဇြဳပၞာန်ဂှ် ဗော်ပရေၚ်ဍုၚ်ကွာန် ကၠောန်ရေၚ်တၠုၚ်ဒၟံၚ် အတိုၚ်နဲကဲဂၠံၚ်တရဴ ဒဳမဝ်ကရေဇြဳစှ်ေစှ်ေတအ် ညံၚ်ဟွံဂွံဆက်ဒတူလာၚ်အာတုဲ ပွမပ္တိတ်ကၠုၚ်အသံပၟိၚ် ကေုာံ သၞောဝ်ဥပဒေဟွံဗဗွဲဓဝ်ကီု၊ ညံၚ်သၞောဝ်သ္ဇိုၚ်ဒက်ပ္တန် ၂၀၀၈ ဂွံဆက်တန်ကြန်အာ ရေၚ်တၠုၚ်ဒၟံၚ်ရဂှ် လလောၚ်တြးလဝ်ရ။
ပ္ဍဲမွဲလ္ပာ်ပၠန်လေဝ် ညံၚ်တၠအဝဵုပၞာန်ပ္ကီုပရာပ် ကေုာံဗော်ပရေၚ်ဍုၚ်ကွာန်ထံက်ဂလာန်ကဵုညးတအ်လ္ၚဵုဂှ် သ္ဂောံက္လိဂွံအဝဵု ဂၠံၚ်ဍာန်ကရတ်ဂှ် သုၚ်စောဲ နဲကဲစုၚ်တုဲ ပရေၚ်ကၠောန်ရေၚ်တၠုၚ်ဒၟံၚ်ကီု သီုကဵုပံၚ်တောဲရေၚ်တၠုၚ်ဒၟံၚ် ပ္ဍဲကမၠောန်ပ္ကီုပရာပ်ကံၚ်ဇြဳပၞာန်ရဂှ် ဟီုသ္ဂး စောတ်စောဲလဝ်ရ။
ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် NUG ဥူနေဘုန်လေတ်ဂှ် တၚ်ရေၚ်တၠုၚ်ဒၟံၚ်လၟုဟ်ဏံ ကဝ်မယှေန်ပေါဲရုဲမာဲ ရေၚ်တၠုၚ်ဒၟံၚ် သၟဝ်တဲကံၚ်ဇြဳပၞာန် မဒးဒုၚ်လလောၚ်တြးလဝ် နဒဒှ်ဂကောံပ္ကီုပရာပ်ဂှ် ဒှ်အာဗီုပြၚ်ထပ်လလောၚ်တြး နဒဒှ်ဂကောံပ္ကီုပရာပ်တုဲ သွက်ဂွံသီရုပ်ရိုဟ်ပလီု ဗော်ပရေၚ်ဍုၚ်ကွာန်(၄၀)ဗော် အခေါၚ်ဟၟဲလးလးရဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူပရေၚ်သီကေတ်အဝဵု သၞာံ ၂၀၂၁ ဂိတုဖေဖဝ်ဝါရဳ စၟတ်တ္ၚဲ (၁) ဂအုပ်သ္ကိုပ်ဗိုလ်ဇၞော် မေန်အံၚ်လှာၚ် က္ဍိုက်လဝ်က္ဍိုပ်ဂှ် လလောၚ်တြးကၠုၚ် ဒဒှ်ရတးပါဲ သွဟ်ပေါဲရုဲမာဲတုဲ ကလေၚ်ဒက်ပ္တန်လဝ် ကဝ်မယှေန်ပေါဲရုဲမာဲကၟိန်ဍုၚ် တၟိရ။
ကဝ်မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်လဝ်ဂှ် ကြဴနူကလေၚ်ပျးဌာန်လဝ် သၞောဝ်ဥပဒေပတိုန်စၟတ်သမ္တီ ဗော်ပရေၚ်ဍုၚ်ကွာန်တၟိတုဲဂှ် ဒဒှ်ရရုပ်သီရိုဟ်ပလီုလဝ် ဗော်ပရေၚ်ဍုၚ်ကွာန် (၄၀)ဗော် မပါလုပ်သီု ဗော်ဒဳမဝ်ကရေဇြဳကောန်ဂကူ(NLD) ကေုာံဗော်ကောန်ဍုၚ်အရၚ်ဇြဟတ်ဇၞော်လ္ၚဵုဂှ် လလောၚ်တြးလဝ် ပ္ဍဲဂိတုမာတ်ချ် စၟတ်တ္ၚဲ (၂၈)တုဲကၠုၚ်ဏံရ။
ပရိုၚ်-သြၚ်လောန်တိုၚ်(မ်)
ဗီုရုပ် – NUG