ပလဝ်၊ ဨဗြဴ(၇)
ရးဒေသဇၞော်တၞၚ်သဳ လလောၚ်တြးလဝ် ပရေၚ်အုပ်ဓုပ်ပၞာန်၊ ပွိုၚ်ဍုၚ်ပလဝ်၊ ပ္ဍဲကဵုကွာန်ဝေတ်တိုဝ် ပေါဲဗတိုက်ဟၟဲမွဲသာ် ဟိုတ်နူဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ပါလုပ်သီုကောန်သၟတ်(၃)တၠ မၞိဟ်(၇)တၠ ဒးလဝ်ဝပ်ရဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒပ်ကံၚ်ဇြဳပၞာန် ဖျေံလဝ်ဗ္ဒပ် ပ္ဍဲကုန်ပလဝ်ဂှ် ဂိတုဨဗြဴ စၟတ်တ္ၚဲ (၅) တုဲကၠုၚ်ဏံ အခိၚ်နူဂယး ၜိုတ် ၉ နာဍဳကဝက်ဂှ် ပန်ဖျေံလဝ်လွဟ်ဇၞော် ပ္ဍဲကွာန်ဝေတ်တိုဝ် ဟွံအောန်နူ (၄)မရ။
မကမ်ကံၚ်ဇြဳပၞာန် ပန်ဖျေံဏာဂှ် ဒတုံစှ်ေလဝ်လ္တူသ္ၚိ မၞုံဗ္ဒာဲဘာဗ္တောန်လိက် ကွာန်ဝေတ်တိုဝ်တုဲ ခတိုဟ်လဝ်ရ။
ဟိုတ်နူမကမ်လွဟ်ဇၞော် ဒပ်ကံၚ်ဇြဳပၞာန်တုဲ မာံကောၚ်ပျိဝ အာယုက်(၂)သၞာံ၊ မိဝိုၚ်ပုမ်ချေတ် အာယုက်(၄)သၞာံ၊ မာံတိုဝ်အောၚ် အာယုက် (၈)သၞာံ ကေုာံဂကောံသ္ၚိကၟိန် သီုမၞိဟ်(၇)တၠ ဇီုကပိုက် ဒးလဝ်ဝပ်မကမ်ရ။
ညးဒေသ ဇီုကပိုက်ဒးလဝ် လွဟ်မကမ်တအ်ဂှ် ပလံၚ်ဗစိုပ်ဏာရုၚ်ဂဥုဲ ညောန်ကြပ်တုဲ ပ္ဍဲကဵုဂှ် ကောန်ၚာ်သၟတ်မွဲတၠကဵု ညးဗြဴမွဲတၠဂှ် အကာဲအရာဒးဒှ်ဓဝိၚ်ကဵု အန္တရာယ်လမျီု နွံရဂှ် ညးဒေသမွဲတၠ ဟီုသ္ဂးလဝ်ရ။
ဒပ်ကံၚ်ဇြဳပၞာန် ပန်ဖျေံလဝ်လွဟ်ဇၞော် ပ္ဍဲကွာန်ဂှ် ဂိတုဨဗြဴ စၟတ်တ္ၚဲ (၆) အခိၚ်နူဂယးတ္ၚဲဏံလေဝ် ဒၟာနူထပ်ပန်ဖျေံလွဟ်ဇၞော် ပ္ဍဲကွာန်ဝေတ်တိုဝ်ပၠန်ဂှ်ရ ညးဒေသလ္ၚဵု ဒးဂြိပ်ပါဲဓလေတ်ကၠုၚ် နွံဒၟံၚ်ရဂှ် ဂွံတီကေတ်ရ။
ကြဴနူလလောၚ်တြးကၠုၚ် ပရေၚ်အုပ်ဓုပ်ပၞာန် ပ္ဍဲပွိုၚ်ဍုၚ်ပလဝ်တုဲဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတအ် ပေါဲဗတိုက်က္တဵုဒှ်ကၠုၚ်ဒၟံၚ် သိၚ်သိၚ်တုဲ ဟိုတ်နူလ္ပာ်ဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ပရေၚ်ကောန်အရာပ်ဇီုကပိုက်ချိုတ်ဒၟံၚ် နွံကၠုၚ်ရ။
ပရိုၚ်-သြၚ်လောန်တိုၚ်(မ်)
ဗီုရုပ်- CJ