နယူယျံက်-ဨဗြဴ(၇)
သွက်ရုၚ်စက်နျူကလဳယာ ဂွံဂေတ်ဂှ် ပရေၚ်ကၠးဖ္ဍး နူဒပ်ပၞာန် သီုဟၟဲမွဲသာ် စပ်ကဵုကိစ္စဂစာန်ပ္တိတ်ဒၟံၚ်ဇြဟတ် သွက်ဂွံသိုၚ်ခၞံ ရုၚ်ပံၚ် ဓာတ်နျူကလဳယာအဇာဍောတ် သီုစေဝ်ပၞောန် ဂွံဒးဒ္ဂေတ်ဗက်၊ သၞောတ်စဳမာန်ဖန်ဇန် ဟၟဲမွဲသာ် ညံၚ်ကၟိန်ဍုၚ်နာနာ စွံအာရီုတုဲ ဂွံမၚ်ရံၚ်ကျောဝ်ဂှ် ဥူကျဝ်မိုဝ်ထောန် ဗတိုက်ဖ္အောဝ် ကဵုလဝ်သတိရ။
ပ္ဍဲဌာန်ဂအုပ်ကုလသမဂ္ဂ မၞုံဍုၚ်နယူယျံက်ဂှ် ပ္ဍဲအစဳဇန်ပရေၚ်သဳကၠဳကာနာနာ ပေါဲသဳကၠဳ ကၠောန်ဗဒှ်ဒၟံၚ် နူဂိတုဨဗြဴ စၟတ်တ္ၚဲ (၃) စဵုကဵု စၟတ်တ္ၚဲ(၂၁) သၞာံ၂၀၂၃ ကောံဓရီုကဝ်မယှေန်သီပလီုလွဟ်လက်နက်ကုလသမဂ္ဂဂှ် ဟီုသ္ဂးလဝ်ရ။
ရေၚ်တၠုၚ်ဒၟံၚ် ညံၚ်လွဟ်လက်နက်နျူကလဳယျာ သီုဖအိုတ်ဂွံကၠေံဗ္ဒန်အာတုဲ ဂွံတိတ်ဗၠး နူအန္တရာယ်ပရေၚ်ဘပဠ ပရေၚ်သုၚ်စောဲလွဟ်လက်နက်နျူကလဳယာကီု ပေါဲပၞာန်နျူကလဳယာဂှ် ညးလဵုလေဝ် ဂွံဇၞးကေတ်မာန်ဟွံသေၚ်တုဲ ဟိုတ် ပေါဲပၞာန်နျူကလဳဂွံဒှ်ကၠုၚ် ဟၟဲရောၚ်ဂှ် ပိုဲသီုညးဖအိုတ် တီကၠိုက်ကေတ်လဝ်ကီု လွဟ်လက်နက်နျူကလဳယာဂှ် ဒှ်အရာစဵုဒၞာကဵု ညံၚ်ဟွံဂွံဒှ်ပၞာန် ဟွံသေၚ်တုဲ ဒှ်အကာဲအရာပၟတ်တဴ ကျာဗဂိုဟ်ရဂှ် ဟီုသ္ဂးလဝ်ရ။
သ္အာၚ်နူဏံပၠန် ညံၚ်လိက်ကသုက်တာဒၞာပရေၚ်စမ်ၜတ်နျူကလဳယာ အလုံသီုဖအိုတ် လမျီုဂွံလုပ်ဂှ် ပၟိက်ဇၞော်ဒၟံၚ်တုဲ သွက်လိက်ကသုက် လမျီုဂွံလုပ် ညံၚ်ကၟိန်ဍုၚ်ဆက်တောဲဂမၠိုၚ် ဂွံပါလုပ်ထ္ပက်စၟတ်တဲဂှ်လေဝ် ဗတိုက်ဖ္အောဝ်လဝ်ရ။
ပ္ဍဲကၟိန်ဍုၚ်ဗၟာလေဝ် ယဝ်ရပရေၚ်သီအဝဵု သၞာံ ၂၀၂၁ ဟွံဒှ်ကၠုၚ်မ္ဂး အခိၚ်လၟုဟ်ဏံ သ္ပဒ္တန်ထ္ပက်စၟတ်တဲ လိက်ကသုက်ကၟာတ်လဒဵုတာဒၞာလွဟ်လက်နက်နျူကလဳယာတုဲ လိက်ကသုက် IAEA သ္ကုတ်တောဲလကြဴလေဝ် လမျီုအာဏာလုပ်ဒၟံၚ်ရောၚ်ဂှ် အမာတ်ကလုတ် ဟီုသ္ဂးလဝ်ရ။
ကၟိန်ဍုၚ်ဆေၚ်စပ်ဂမၠိုၚ် ပ္ဍဲပရေၚ်စၚ်ခြၚ်ကီု သီုကဵုပရေၚ်သုၚ်စောဲဂှ် ဗွဲမကိတ်ညဳကဵုတၚ်စၞောန်ပ္ညုၚ် အေဂျေန်ဇြဳဇြဟတ်အနုလကၠိုက်ကၟိန်ဍုၚ်နာနာဂှ် ပၟိက်ဇၞော်ဒၟံၚ်ကီု ဒပ်ပၞာန်ဗၟာဂှ် ပရေၚ်ကၠးဖ္ဍးဟၟဲ၊ သွက်ရုၚ်စက်နျူကလဳယျာဂွံဂေတ်ဂှ် စေဝ်ပၞောန်ဂွံဒ္ဂေတ်ဗက် သၞောတ်စဳမာန်ဖန်ဖက်ဟၟဲတုဲ သ္အာၚ်နူဂှ် သ္ပလဝ်မဇ္ဇျဟ်ကဵု ပရေၚ်ဂီုကၠီုသၞောဝ်ဥပဒေတုဲ ဟိုတ်နူဟွံဒ္ဂေတ်ဗက် သၞောဝ်ဥပဒေဆေၚ်ကဵုထံက်ရီုပရေၚ်မၞိဟ်ကၟိန်ဍုၚ်နာနာ ဟၟဲဂှ်ရ နကဵုကၟိန်ဍုၚ်နာနာဂမၠိုၚ် သ္ပဂရုတုဲ မၚ်ရံၚ်ကျောဝ်အိုတ်ညိဂှ်လေဝ် အာတ်မိက်လဝ်ရ။
ကၟိန်ဍုၚ်ဒးဒုၚ်စဒၟံၚ်သိုၚ် ပရေၚ်ဒပ်ပၞာန်ဗၟာ ကလိလောန်ဓဇန်ကြာန်ဒၟံၚ် လ္တူညးဍုၚ်ကွာန် မွဲကၟိန်ဍုၚ်ဂှ် ဟိုတ်နူလွဟ်လက်နက်တုဲ ဘပဠကၠုၚ်ပရေၚ်မံၚ်စံၚ်ဘဝမၞိဟ် ကေုာံပရေၚ်ဂီုကၠီုဒေသမာန်ဒၟံၚ်တုဲ သ္အာၚ်နူဂှ်ပၠန် ဟိုတ်နူသုၚ်စောဲလွဟ်လက်နက်နျူကလဳယာ အကာဲအရာပရေၚ်ထံက်ရီုပရေၚ်မၞိဟ် က္တဵုဒှ်ကၠုၚ်မာန်ကီု သီုဒဒှ်ရဒးဒှ်ဒၟံၚ်ဓဝိၚ် အန္တရာယ်ပရေၚ်ဂီုကၠီု ဟိုတ်နူပြံၚ်စၠောံလွဟ်လက်နက်နျူကလဳယျာဂှ်လေဝ် ဟီုသ္ဂးလဝ်ရ။
ဟိုတ်ဂှ်ရ နကဵုကၟိန်ဍုၚ်ပၠုပ်နၚ်ကဵုဒၟံၚ် လွဟ်လက်နက် ဇရေၚ်ကံၚ်ဇြဳပၞာန်တအ် ညံၚ်ဂွံဒေါံအာ နူပရေၚ်ပလံၚ်ဗစိုပ်လွဟ်လက်နက် အာတ်မိက်ဏာရဂှ် အမာတ်ကလုတ် အာတ်မိက်လဝ်ရ။
ပရေၚ်ထိၚ်ဒဝ် ကမၠောန်သွံလွဟ်လက်နက် ကုဒပ်ပၞာန်ဗၟာဂှ် ဒှ်ရီုဗၚ်ဟံၚ်ပြာ် လမျီုညးဍုၚ်ကွာန်တအ်ဂှ်ရ ကၟိန်ဍုၚ်ပလံၚ်ဗစိုပ်သွံဒၟံၚ် လွဟ်လက်နက် ကုကံၚ်ဇြဳပၞာန်တအ်ဂှ် သွက်ဂွံဒေါံကဵုပရေၚ်သွံလွဟ် လွာဲလၟုဟ်ဂှ် အာတ်မိက်ဏာ စၞးညးဍုၚ်ကွာန် ကၟိန်ဍုၚ်ဗၟာရဂှ်လေဝ် ဟီုသ္ဂးလဝ်ရ။
ပရိုၚ်-သြၚ်လောန်တိုၚ်(မ်)