ထိုၚ်ဝါန်၊ ဨပရဴ (၇)
ကောံဓရီု သမ္မတထိုၚ်ဝါန် ကေုာံ ညးမၞုံအခေါၚ်ဟီုဂး ကၠတ်ထဝ်သၟဝ်အမေရိကာန် မက္ကာတဳတံဂှ် အလဵုအသဳဗေကျေန် ပါ်ပါဲလဝ်ရ။
သ္အာၚ်နူဂှ်ပၠန် ပ္ဍဲဂိတုဨပရဴ (၆) တေံ သွက်ဂွံထံၚ်ပရိုၚ်က္ၜၚ် မၞုံပ္ဍဲကလိုဟ်ၜဳထိုၚ်ဝါန်ဂှ်တုဲ က္ၜၚ်ကျာကြုက် မစိုပ်ဒၟံၚ်ဂှ်ကဵု ပရေၚ်ဘပဠတံဂှ်လေဝ် နူကဵုလ္ပာ်ထိုၚ်ဝါန် မၚ်ရံၚ်ဒၟံၚ်ကြပ်ပ်ရောၚ်ဂှ် သ္ဂးရ။
မက္ကာတဳ ညးမၞုံအဆံၚ်တတိယသၠုၚ်အိုတ် ပ္ဍဲပရေၚ်က္ဍိုက်ပ်ကဆံၚ်လ္တူ ကၟိန်ဍုၚ်အမေရိကာန်ဂှ်ကဵု အမာတ်ကၠတ်ထဝ် ရဳပါပလေတ်ကာန် ကေုာံ ဒဳမဝ်ကရေတ်တေတ်တၞဟ်ဟ်တံလေဝ် ဆဵုဂဗလဝ်ကဵု သမ္မတသာၚ်အေန်ဝန် ပ္ဍဲဂိတုဨပရဴ (၅) တေံရ။
ကောံဓရီုဂှ်ဝွံ ကၠောန်ဗဒှ်လဝ် အကြာပရေၚ်ဘပဠ အလဵုအသဳဗေကျေန်ကဵု အကာဲအရာပရေၚ်ဆက်ဆောံ ကြုက် ကေုာံ အမေရိကာန် မဒှ်ဒၟံၚ်သဝ်အိုတ်ဂှ်ရ။
ပ္ဍဲမွဲအခိၚ်ဓဝ် က္ၜၚ်ဍုၚ်ကြုက်ပိုၚ် ယှာန်ဒံၚ်ဂှ်ဝွံ စိုပ်အာလဝ် ပြၚ်ၜဳဗၟံက်ဍုၚ်ထိုၚ်ဝါန် စဵုကဵုမိုၚ်ဍာ် ၂၀၀ ရောၚ်ဂှ် ဝန်ဇၞော်ကာစဵုဒၞါထိုၚ်ဝါန် ဟီုဂးလဝ်ရ။
“ ဣဏံဂှ် ၜိုန်ရပွပ္ကတ်ပ္ကေၚ်ပရေၚ်ပၞာန်ဏောၚ်ဂးလဝ်ကီုလေဝ် နကဵုအခိၚ်မ္ဂး ဂၠေံတဴဗွဲမလောန်ရ။ မုဒှ်ရောဟီုမ္ဂး လ္ပာ်ပိုယ်တံဂှ် လ္ၚတ်ဂၠိုက်ဂၠါဲဒၟံၚ်ဖိုဟ်ရ” သာ်ဝွံ ဝန်ဇၞော်ကာစဵုဒၞါဂှ် ဟီုဂးလဝ်ရ။
ဌာနဝန်ဇၞော်ကာစဵုဒၞါကြုက်ဂှ်ဝွံ ပါ်ပါဲဟီုဗျိပၠုတ်လဝ် ကောံဓရီုမက္ကာတဳဂှ်တုဲ ကၠောန်သ္ပလဝ် ပွဘပဠတံ ဟွံမွဲပုဟ်ဂှ် ဟီုဂးလဝ်ရ။
ပ္ဍဲကဵုတၚ်လလောၚ်တြးကြုက်မွဲဂှ် “ ဒပ်ဗၠးၜးညးဍုၚ်ကွာန်ကြုက်တံဂှ်ဝွံ ရေၚ်တၠုၚ်ဒၟံၚ် ဗွဲမသၟဟ်တးကဵုတၚ်ပ္တဝ်က္ဍိုပ် ကေုာံ တာလျိုၚ်ညးတံဂှ်တုဲ သွက်ပရေၚ်ၜိုဟ်လလမ်ကလိုဟ်ၜဳ ကေုာံ ပရေၚ်ညိၚ်ဝန်တံရောၚ်” ဂှ်လေဝ် ဟီုဂးလဝ်ရ။
ဒုဇၞော်သ္ကိုပ် ဗျူရိုဝ်ပရေၚ်ဂီုကၠီုကောန်ဂကူထိုၚ်ဝါန်ဂှ် ဟိုတ်နူအဆက်လက္ကရဴ လၟေၚ်တရဴပဳလိုဝ်ဇြဳဂှ်တုဲ ဒဒှ်မခၠေဝ်ပလန်နူကဵုကြုက်ဗီုလၟုဟ်ဂှ် အမာတ်ဂမၠိုၚ် ဟွံစၟဳစလဝ်ပုဟ်ဂှ်လေဝ် ဟီုဂးလဝ်ရ။
“ဒဒှ်ရမက္ကာတဳ ကၠုၚ်စိုပ်ဂေတ်ဝေၚ်ထိုၚ်ဝါန်မာန်ဂှ် လ္ပာ်ကောန်မျူနေတ်ကြုက်တံ ညးတံ ဂွိၚ်ဂွါဲဒၟံၚ်ရောၚ်” သာ်ဝွံ ညးဆက်ဟီုဂးလဝ်ရ။
Ref:CNA