ဠုက်တိုဝ်၊ ဨပရဴ (၇)
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲပွိုၚ်ဍုၚ်ဠုက်တိုဝ် တိဍာ်ဒပ်မဟာ (၂) ဗော်သွးကောန်ဂကူကရေၚ် KNU ဂှ် ရပ်ဒက်ဏာ ညးဒေသ (၁၆) တၠ နဒဒှ်ရဲယိုက်ကပေါတ်ပၞာန်တံတုဲ သီုကဵုပန်ဂစိုတ်ဏာလဝ် ညးဒေသမွဲတၠ နကဵုသေနာတ်ရောၚ်ဂှ် ဂွံတီကေတ် ဇရေၚ်ပရိုၚ်တမ်ရိုဟ်အပ္ဍဲဒေသတံရ။
စပ္တံနူဂိတုမာတ်ချ် (၂၇) တုဲကၠုၚ်တေံတုဲ ဒပ်ကံၚ်ဇြဳပၞာန် လုပ်စိုပ်ဍိုက်ဗ္တိုက် လ္ပာ်ကွာန် မၞုံဒိုဟ်ပလိုတ် ကွာန်မျတာကုန် နူပွိုၚ်ဍုၚ်ဠုက်တိုဝ် မဒှ်တိဍာ်ဒပ်မဟာ (၂) တံ နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ်တုဲ ကၠောန်သ္ပပန်ပှော်လဝ် နကဵုလွဟ်ဇၞော်၊ လွဟ်ဍောတ်တံရ။
သ္အာၚ်နူဂှ်ပၠန် ပ္ဍဲဂိတုမာတ်ချ် (၃၁) အခိၚ်ဗ္တံဂှ်လေဝ် ဒပ်ကံၚ်ဇြဳပၞာန် စံၚ်ပလီုလဝ် သ္ၚိဒၟံၚ်ညးဒေသ (၄) မ နူကဵုကွာန်တာန်မိုဝ်ဒံၚ် မဒှ်ဒၟံၚ်ပရေၚ်ပန်ပှော် မွဲဏှမွဲဏှ အကြာဒပ်ကံၚ်ဇြဳပၞာန် ကဵု ဒပ်ပံၚ်ကောံ KNLA, PDF တံရောၚ်ဂှ် ညးဒေသတံ သ္ဂးလဝ်အိုတ်ရ။
ပ္ဍဲဂိတုဏံ ပ္ဍဲဂိတုဨပရဴ (၃) ကဵု (၄) တေံဂှ်လေဝ် ပ္ဍဲကွာန်လက်ပါန်ဖျူ မၞုံသ္ကုတ်ပလိုတ် ကွာန်မျတာကုန် ဂကောံကွာန်ကျံက်တကာဂှ် ဒပ်ကံၚ်ဇြဳပၞာန် တက်ပလီုပလာ်လဝ် သ္ၚိဒၟံၚ်ညးဒေသလ္ၚဵုတံတုဲ ကေတ်ဏာလဝ် ကွဳလိုန်ဓာတ် (၅) ဖ္ဍိုက်ကဵု ကပေါတ်ကညောတ်ဂမၠိုၚ်တုဲ ဒပ်ကံၚ်ဇြဳပၞာန် သီုကဵုပန်ဂစိုတ်ဏာလဝ် ညးသၟတ်တြုံတြုံမွဲတၠ နူကဵုကွာန်လက်ပါန်ဖျူဂှ်ရောၚ်ဂှ် ညးဒေသတံ ဟီုရ။
သ္အာၚ်နူဂှ်ပၠန် ကောန်ကွာန်ဒေသ (၁၆) တၠဂှ်လေဝ် ဒပ်ကံၚ်ဇြဳပၞာန် ထပ်ကော်ဏာလဝ် နဒဒှ်ရဲယိုက်ကပေါတ်ထ္ၜးဂၠံၚ်တုဲ (၇) တၠဂှ် ကလေၚ်ဗလးကဵုလဝ် ပ္ဍဲဂိတုဨပရဴ (၅) အခိၚ်နူဂယး (၈) နာဍဳဂှ်တုဲ သှ်ေ (၉) တၠဂှ် ဆက်ရပ်ဒက်လဝ်ရ။
ဟိုတ်နူကံၚ်ဇြဳပၞာန် စွံပွန် လ္တူညးဍုၚ်ကွာန်ကောန်အရာပ်တံတုဲ လုပ်စိုပ်ချဳဒရာၚ်ပရေၚ်ပၞာန် ကေုာံ ဝးပ္ကဝ်အခေါၚ်အရာမၞိဟ်တံဂှ်တုဲ ညးဍုၚ်ကွာန်ဒေသ နူကဵုကွာန်မျတာကုန် ကေုာံ နူကွာန်လ္ပာ်လ္တူကွာန်ကျံက်ဖျာ ဂကောံကွာန်ကျံက်တကာ ပွိုၚ်ဍုၚ်ဠုက်တိုဝ်တံဂှ်ဝွံ ဒးဂြိပ်ဒဴပါဲဒလေတ်ဒၟံၚ် အလုံကွာန်မွဲတုဲ နွံပၟိက်ဒၟံၚ်ကဵု အရီုဗၚ်ဇွောံမစၞစ၊ ဂဥုဲဇဗ ကေုာံ ဒၞါဲမံၚ်စံၚ် မပ္တံကဵုအရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် နူညးဒုၚ်တာလျိုၚ် မရီုဗၚ်ရေၚ်တၠုၚ်ကဵုဒၟံၚ်မွဲတၠရ။
ပရိုၚ်−သြၚ်လောန်တိုၚ်(မ်)
ဗီုဓာတ်−KHRG