တၞၚ်သဳ၊ ဨပရဴ (၈)
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် အပ္ဍဲကွာန်ယာန်ဖိုဝ် ကေုာံ ကွာန်ပနာတ်ၚေဝ်၊ ပွိုၚ်ဍုၚ်တၞၚ်သဳ၊ ရးဒေသဇၞော်တၞၚ်သဳဂှ် ပန်ဂစိုတ်ဏာလဝ် ကောန်အရာပ် (၃) တၠ နကဵုသေနာတ်ရောၚ် ညးတာလျိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်တၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၅၀) ပြၚ်ပါဂှ်ဝွံ ပ္ဍဲဂိတုဨပရဴ (၆) ၜိုတ်ဇိုၚ်သဝ်တ္ၚဲ (၇) နာဍဳဂှ် လုပ်စိုပ်ကၠုၚ် အပ္ဍဲကွာန်ယာန်ဖိုဝ်တုဲ ကြဴနူရပ်ဒက် ကိုဝ်ပေအ်ဠာန် ညးဒေသအာယုက်မၞုံ (၃၀) ဂှ်တုဲဂှ် ပန်ဂစိုတ်ဏာလဝ် နကဵုသေနာတ်ရ။
ကြဴနူဂှ်တုဲ ကရောၚ်ပၞာန်ကံၚ်ဇြဳပၞာန်ဝွံ အဃောမလုပ်စိုပ်ကၠုၚ် အပ္ဍဲကွာန်ပနာတ်ၚေဝ်ဂှ် ဟိုတ်ဟွံမွဲမွဲသာ် ပန်ဂစိုတ်ဏာလဝ် ညးသၟတ်ရဲဒေသ (၂) တၠရ။
ဇွရုပ်ညးဒေသ ကွာန်ပနာတ်ၚေဝ် (၂) တၠ မဒးဒုၚ်ပန်ဂစိုတ်လဝ် ကဵုသေနာတ်ဂှ် ဒဵုကဵုအခိၚ်လၟုဟ် ဟိုတ်နူကရောၚ်ပၞာန်ဒပ်ကံၚ်ဇြဳပၞာန် ဆက်နွံဒၟံၚ်ဂှ်ရ ဟွံဂံၚ်အာကပှ်အိုတ်ပုဟ်ဂှ် ဂွံတီကေတ် ဇရေၚ်ညးဒေသတံရ။
ပ္ဍဲပွိုၚ်ဍုၚ်တၞၚ်သဳ မလလောၚ်တြးလတ် ပရေၚ်အုပ်ဓုပ်ပၞာန်တံဂှ် စနူဂိတုမာတ်ချ် (၂၈) တေံတုဲ ပေါဲဗ္တိုက် အကြာဒပ်ကံၚ်ဇြဳပၞာန်ကဵု ဂကောံဒပ်စဵုဒၞါဒေသတံ သာသ္ကာတ်မြဟ်ကၠုၚ်တုဲ ပရေၚ်ဇီုကပိုက်ၜါလ္ပာ်တံ နွံဒၟံၚ်ရ။
အတိုၚ်ဂလာန် Southern Monitor ဂှ်မ္ဂး အပ္ဍဲကာလဒပ်ပၞာန်သီအဝဵု ပွိုၚ် (၂) သၞာံဂှ် ကောန်အရာပ် (၄၀၀) ပြၚ် ချိုတ်အာလဝ်ရောၚ် သာ်ဝွံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)