မတ်မလီု၊ ဨဗြဴ(၈)
ပ္ဍဲကၟိန်ဍုၚ်ဗၟာ ဟိုတ်နူပဋိပက္ခရပ်လွဟ် ကေုာံပြသၞာဘဝဟွံဂီုကၠီု ထောံဌာန်ဒၟံၚ်တုဲ ညးဒးဂြိပ်ဒဴဒၟံၚ် နွံကၠုၚ်စဵုကဵု ၁ ဒသမ ၈ ပြကောဋိကိုတ်ရဂှ် ရုၚ်ပ္ညဳပ္ညပ်ဆေၚ်ရာကဵု ပရေၚ်ရီုဗၚ်ဟံၚ်ပြာ်မၞိဟ် ကုလသမဂ္ဂ UNOCHA Myanmar လလောၚ်တြးလဝ် ပ္ဍဲဂိတုဨဗြဴ စၟတ်တ္ၚဲ(၆)ရ။
အတိုၚ် UNOCHA Myanmar ဟီုသ္ဂးလဝ်မ္ဂး ထောံသ္ၚိဌာန်တုဲ ညးဒးဂြိပ်ဒဴဒၟံၚ် ၁ ဒသမ ၄ ပြကောဋိကိုတ်တအ်ဂှ် ကြဴနူဒပ်ပၞာန်သီအဝဵုတုဲ ဟိုတ်နူပဋိပက္ခရပ်လွဟ်က္တဵုဒှ်လဝ်တုဲ သှ်ေ ၀ ဒသမ ၄ ပြကောဋိကိုတ်တအ်ဂှ် ဒှ်ညးဒးဂြိပ်ဒဴဒၟံၚ် ဟိုတ်နူပဋိပက္ခ ကၠာနူဟွံဂွံသီအဝဵုရဂှ် ဟီုသ္ဂးလဝ်ရ။
သ္အာၚ်နူဂှ်ပၠန် ပ္ဍဲသ္ကုတ်လကြဴလၟုဟ်ဏံ အလုံမွဲကၟိန်ဍုၚ် ပေါဲဗတိုက်သ္ကာတ်မြဟ် ဆက်က္တဵုဒှ်ဒၟံၚ်တုဲ ၜိုန်ရတၚ်နွံပၟိက် ဆေၚ်စပ်ကဵုပရေၚ်ရံၚ်စံၚ်ထ္ၜလဘာ်မၞိဟ် ၜိုန်ရနွံဒၟံၚ်ကီုလေဝ် ကပေါတ်ဗၞိက် ကေုာံပရေၚ်မၞိဟ်အာကၠုၚ်တအ် သာတုဲဒးဒုၚ်ပိုၚ်ခြာဒၟံၚ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ပ္ဍဲတွဵုရးကချေၚ် ပရေၚ်ဗတိုက်ပန် နကဵုက္ၜၚ်ကျာ ပ္ဍဲပွိုၚ်ဍုၚ်ဖာက၊ ပရေၚ်ပါ်ခတိုဟ် ပ္ဍဲပွိုၚ်ဍုၚ်မိုဝ်ညှေန်၊ ပွိုၚ်ဍုၚ်ဖာက၊ ယှိုဲကူ ကေုာံသွောမ်ပရာဘောမ် တအ်ဂှ် ပရေၚ်ထ္ပက်ကရောၚ်ပၞာန် ရပ်စပ်ကၠေၚ်ဒက်စၟဳစၟတ် ညးဍုၚ်ကွာန်တအ် နွံလဝ်ရဂှ် ဟီုသ္ဂးလဝ်ရ။
ဟိုတ်နူအကာဲအရာလၟုဟ်တုဲ ပ္ဍဲပွိုၚ်ဍုၚ်ယှိုဲကူ ညးဒေသ နူကွာန်ဗွဲမဂၠိုၚ် ၁၃၀၀ ပြၚ်ဂှ် နူကဵုဂိတုမာတ်ချ် သ္ကုတ်ကၠာတေံ ထောံသ္ၚိဌာန် ဒးဂြိပ်ဒဴပါဲဓလေတ်ဒၟံၚ်တုဲ ဒးမံၚ်ဒၟံၚ် ပ္ဍဲဗ္ဒပ်ယာယဳ (၁၀)ဗ္ဒပ်ကီု သီုပ္ဍဲအကြာဂြိုပ်ဒဵုတအ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
UNOCHA Myanmar ဂှ်မ္ဂး ဆက်ရေၚ်တၠုၚ်ဒၟံၚ် သွက်ညးနွံဒၟံၚ်ပၟိက်ကဵုအရီုဗၚ် ထောံသ္ၚိဌာန်တုဲ ညးဒးဂြိပ်ဒဴဒၟံၚ် ကေုာံ အရီုဗၚ်ဆေၚ်စပ်ကဵုအရံၚ်စံၚ်ထ္ၜလဘာ်ပရေၚ်မၞိဟ် သွက်ညးနွံဒၟံၚ်ပၟိက် ဇွောံမ၊ ကၟဳဗ္ဒၚ် ကေုာံ ကပေါတ်အရပ်စပ်မၞိဟ် ဒေါံဟွံဂွံမာန် ဂိုတ်ဂစာန်ဒၟံၚ်ရဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – BNI