မတ်မလီု၊ ဨပရဴ (၁၃)
ပ္ဍဲသ္ဘၚ်အတး ကံၚ်ဇြဳပၞာန် မရပ်စပ်စကာနဲကဲစုၚ်ဇဳတုဲ မဂစိုတ်ဂယိုၚ်ပျဲပျာံဒၟံၚ် ညးဍုၚ်ကွာန်တံ မသ္ကိုပ်သ္ကကၠောန်ဗဒှ်ဂှ် နကဵုဓဝ်ဗ္စာရဏာ ပါလုပ်အာဟွံသေၚ်ပုဟ်ဂှ် ညးဒေသမတ်မလီုဂမၠိုၚ် ဟီုဂးလဝ်အိုတ်ရ။
ကံၚ်ဇြဳပၞာန် တွဵုရးဍုၚ်မန်ဝွံ သွက်ဂွံကၠောန်ဗဒှ် သ္ဘၚ်အတးသၚ်္ကြာန် ဂြုဂြုဂြီုဂြီုဂှ်တုဲ ပ္ဍဲမွဲဒမြိပ်ဂၠံၚ်ဇိုၚ်ၜဳ မတ်မလီုဂှ် ဒုၚ်ဖအိုတ်ကၠေံ သြန်ဂၠိုၚ်ကဵုကိုဋ်တုဲ ပလေဝ်ပလေတ်လဝ် ကၞာထးဗဟဵု၊ ကၞာထးလဟိၚ်စိုတ် ကေုာံ ကၞာထးဝေၚ်ဍာ်တံရ။
သ္အာၚ်နူဂှ်ပၠန် သွက်သ္ဂောံလဟိၚ်စိုတ်ဂှ် လိၚ်လဝ် သီုကဵုမျာန်မာဗျဳတုၚ်ဒါန်ကီု သီုကဵုညးတၠရမျာၚ်တၞဟ်သ္အာၚ်တံဂှ်တုဲ ပ္ဍဲကဵုကၠအ်ပ္ကဴရာမညမတ်မလီုဂှ်လေဝ် သွက်ဂွံကၠောန်ဗဒှ်စုတ်အာ သၚ်္ကြာန်တွာ်ဂှ် စဳဇန်လဝ်ရ။
ကံၚ်ဇြဳပၞာန်ဝွံ ဍဵုဍိုက်ဒၟံၚ် ညးဍုၚ်ကွာန်ဒၟံၚ်ကွာန်ရး မ္ၚးဍုၚ်တံဂှ်တုဲ ကၠောန်ဒၟံၚ်အတး ညံၚ်ဂွံစဳဂှ်တုဲ ဟိုတ်နူကၠောန်ဒၟံၚ် သွက်ဂွံလးထ္ၜးပျး ကုဍုၚ်သ္အာၚ်ဂှ်ရ ပါလုပ်အာ ပ္ဍဲကဵုသ္ဘၚ်အတးဍေံတံဟွံသေၚ်ပုဟ်ဂှ် ညးလ္တူဍုၚ်မတ်မလီုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စကစ ဍဵုဍိုက်ညးဍုၚ်ကွာန်တံ အနိၚ်အပိုၚ်၊ ဍဵုဍိုက် ဓဇန်ဓဇန်တံဂှ် အခိၚ်အတးမှ ဟွံသေၚ်ပုဟ်၊ ပ္ဍဲကဵုဏံဂှ် ပ္ဍဲကွာန်ရးတံမ္ဂး စံၚ်ပၟတ်ဂစိုတ်ဂယိုၚ်တုဲ ဍဵုဍိုက်၊ ပ္ဍဲဍုၚ်ဇၞော်ဂှ်တှ်ေ ရပ်ဒက်ဏောၚ်။ ဟီုမ္ဂး နကဵုဗီုပြၚ်သာ်ဏံဂှ် ဍဵုဍိုက်ပျဲပျာံတုဲ စကစ ကၠောန်ဒၟံၚ် ညံၚ်သ္ဘၚ်အတး ဂွံစဳသာ်ဏံဂှ် သွက်ဂွံထ္ၜးစဍုၚ်သ္အာၚ်တံရဏောၚ်။ ပေါဲရုဲမာဲဂှ်လေဝ် မိက်ဂွံကၠောန်၊ ဍုၚ်ဏံဂှ် ညိၚ်ဝတ်ဒၟံၚ်ယျ၊ ဍေံတံ ထိၚ်ဒက်လဝ် ညးဍုၚ်ကွာန်တံမာန်ယျ၊ ဍုၚ်ကွာန်ၜိုဟ်သြိုဟ်ဒၟံၚ်ယျ သွက်ဍေံတံ ဂွံဖန်ဗဒှ်ပလွေဟ် ဗီုပြၚ်ဏံရဏောၚ်။ ဒးဟီုတှ်ေ အာမိပ် ပ္ဍဲကဵုကၞာထး စကစတံကၠောန်မှ ဟွံသေၚ်ပုဟ်။ မိက်ဂွံကဵုဒါန် ပ္ဍဲသ္ၚိဇကုတံ၊ မုတံ သာ်ဏံလေဝ် ကၠောန်ဂွံဒၟံၚ်။ နကဵုညးသၟတ်တံလေဝ် မိပ်ဂွံဒၟံၚ်၊ ဆ္ဂး သွက်ဂွံကယျာန်ပါဲကၠေံ တၚ်နၚ်မထံၚ်ပၚ်ကဵုဒၟံၚ် ဒပ်ပၞာန်တံဏံ ကုပရေၚ်ပိုန်ဒြပ် မထံက်ပၚ်ကဵုဒၟံၚ် ကုဍေံတံဂှ် မိက်ဂွံဖ္တိုက်ဖ္အောဝ်ရ” သာ်ဝွံ သ္ဂးရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ သွက်ဂွံကၠောန်ဗဒှ် သ္ဘၚ်အတးမာန်ဂှ်ဂးတုဲ ကဵုတၠကမၠောန်ဂမၠိုၚ် ကေုာံ ကမ္ပဏဳတံ သိုၚ်ခၞံလဝ် ကၞာထးတုဲ သွက်ဂွံလုပ်စိုပ်ကၠုၚ် သ္ဘၚ်အတး ဍေံတံမကၠောန်ဗဒှ်ဂှ် မွဲတၠမ္ဂး ကဵုသြန် (၁၀၀၀၀) ဒ္ကေဝ်တုဲ စန်ဒက်ဒၟံၚ်တံဂှ် ကၠောန်ၜိုတ်ဒၟံၚ်ရ။
ညးလ္တူဍုၚ်မတ်မလီုမွဲတၠဂှ်လေဝ် ကံၚ်ဇြဳပၞာန် ၜိုန်ရကၠောန်ဒၟံၚ် ညံၚ်သ္ဘၚ်အတးဂွံစဳကီုလေဝ် အာစိုပ်မိပ်မြဟ်အာ ပ္ဍဲကဵုကၞာထးဍေံတံဟွံသေၚ်တုဲ ဟိုတ်နူဒဒှ်မဂိသ္ကေဝ်ညးဍုၚ်ကွာန်တံတုဲ သ္ဘၚ်အတးလေဝ် ဂွံပေၚ်က္ဍတ်အာကဵုမၞိဟ်ဂမၠိုၚ် ဒှ်ဟွံသေၚ်ပုဟ်ဂှ်လေဝ် ဟီုလဝ် လညာတ်ညး သာ်ဏံရ။
“ဍေံတံ ၜိုတ်လဵုကၠောန်ကၠောန်။ ပိုယ်တံမ္ဂးလေဝ် ဟွံအာပုဟ်လေဝ်။ ဆ္ဂး လ္ၚဵုတံဂှ်လေဝ် ဟီုဟွံဂွံပုဟ်၊ လ္ၚဵုတံပၠန်ဂှ်လေဝ် စိုတ်ညးတံကဵု ညးတံဂှ်ရ မၞိဟ်အာဗီုတံဏံလေဝ် နွံ။ ပိုယ်တံဂှ်တှ်ေ မံၚ်ပ္ဍဲသ္ၚိရဏောၚ်။ ဆ္ဂး ဟွံအာအိုတ်ပုဟ်ဂှ် ညာတ်ရ။ ဗွဲမဂၠိုၚ်ဂှ်တှ်ေလေဝ်၊ စနူကဵုညးဒုၚ်ကာတံဂှ် ဟွံတုပ်ဒၟံၚ်ညးသ္ကအ်ရ။ ဂွံမိၚ်ကေတ်အရေဝ်ဍေံတံဂှ်တှ်ေ ဟွံအာညးသ္ကအ်ပုဟ်၊ ဍေံတံလေဝ် ဒၟါနူဟွံဒေါအ်ဟွံဂွံတုဲရဏောၚ်၊ ဒှ်ဂှ် ဒှ်ဟွံသေၚ်ပုဟ်၊ မၞိဟ်ဂမၠိုၚ်ဂှ် စိုတ်ဂိဒၟံၚ်သီုညးဖအိုတ်ဏောၚ်” သာ်ဝွံ သ္ဂးရ။
တုဲကၠုၚ် ပ္ဍဲဂိတုဨပရဴ (၁၁) တေံဂှ်လေဝ် ပ္ဍဲကဵုကၞာထးသၚ်္ကြာန် တၠကမၠောန်ဆေၚ်ကၠေၚ်စက် တွဵုရးဍုၚ်မန် နူကဵုကံၚ်ဇြဳပၞာန် မကဵုလဝ်ဇြဟတ်ဂရိုဟ် အနိၚ်အပိုၚ်ဂှ် ဂွံဆဵုကေတ်လဝ် ဗမ်တဲမွဲမရ။
ကြဴနူဂွံဆဵုကေတ် ဗမ်တဲ ပ္ဍဲကဵုကၞာထးဂှ်တုဲဂှ် လ္ပာ်ကံၚ်ဇြဳပၞာန်တံ ကၟာတ်လဝ် ဂၠံၚ်လ္ၚဵုလ္ၚဵု မၞုံမွဲဒမြိပ်ဂၠံၚ်ဇိုၚ်ၜဳ မကၠောန်ဗဒှ်သ္ဘၚ်အတးတံဂှ်တုဲ သၠုၚ်ပ္တိုန်လဝ် ပရေၚ်ဂီုကၠီု နကဵုဒပ်ပၞာန် ကေုာံ ဒပ်ဗၠာဲသၟိၚ် ဇြဟတ်ဒပ်ဗွဲမဂၠိုၚ်ဂၠေၚ်ရောၚ်ဂှ် ညးလ္တူဍုၚ်တံ သ္ဂးအိုတ်ရ။
ဂကောံဇြဟတ်ပၠန်ဂတးတံဂှ် ကံၚ်ဇြဳပၞာန် ကၠောန်သ္ပဒၟံၚ် သ္ဘၚ်အတး ညံၚ်ဂွံစဳဂှ်ဝွံ ဒၟါနူဒှ်ဒၟံၚ်ပ္တောံ ဟွံဍာံဟွံဇေတ်တံဂှ်ရ ညးဍုၚ်ကွာန်တံ လ္ပကၠောန်သ္ပပါလုပ်အိုတ်ညိဂှ်ကဵု သွက်ဂွံဗ္စာရဏာကဵု ညးဍုၚ်ကွာန် နူကဵုဒေသ ပေါဲဗ္တိုက်သ္ကာတ်မြဟ်ဒၟံၚ်တံအိုတ်ဂှ် ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Bo Bo Win