ကဝ်ဒူလေဝ်၊ ဨဗြဴ(၁၆)
ပ္ဍဲဂိတုမာတ်ချ် ပွိုၚ်(၁) ဂိတု ဗော်သွးကောန်ဂကူကရေၚ် ပ္ဍဲတိဍာ်ကဝ်ဒူလေဝ် KNU ဂှ် အကြာဒပ် KNLA ၊ KNDO ကဵုဒပ်ကံၚ်ဇြဳပၞာန်တအ် ပံၚ်လၟိဟ်ပေါဲဗတိုက်(၃၀၀)ဝါပြၚ် က္တဵုဒှ်လဝ်တုဲ လ္ပာ်ကံၚ်ဇြဳပၞာန် (၄၀၀) တၠပြၚ် ဒးချိုတ်လဝ်ရဂှ် ဌာန်ဂအုပ်ပၞာန်ဗဟဵု ဒပ်ပၞာန်ဗၠးၜးကောန်ဂကူကရေၚ် KNLA လလောၚ်တြးလဝ် နကဵုစၟတ်တ္ၚဲ (၁၄) ဂိတုဨဗြဴရ။
ပ္ဍဲဂိတုမာတ်ချ် ပွိုၚ်(၁) ဂိတုဂှ် ဒပ်ပၞာန်ဗၠးၜးကောန်ဂကူကရေၚ် KNLA မၞုံသၟဝ်တဲ ဌာနပရေၚ်စဵုဒၞာ KNU ၊ ဒပ်ပၞာန်စဵုဒၞာကောန်ဂကူကရေၚ် KNDO ကဵု ဒပ်ကံၚ်ဇြဳပၞာန်တအ် လၟိဟ်ပေါဲဗတိုက် ပံၚ် (၃၇၃) ဝါ က္တဵုဒှ်လဝ်တုဲ လ္ပာ်ကံၚ်ဇြဳပၞာန် ကောန်ဒပ် (၄၂၂)တၠ ဒးချိုတ်တုဲ (၂၅၈)တၠ ဒးလဝ်ဝပ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ပ္ဍဲပေါဲဗတိုက်တအ်ဂှ် သ္ဂံၚ် လ္ပာ်ဒပ်သၟဝ်တဲ KNU (၇)တၠဂမၠိုၚ် ဒးပူဇဴဏာလမျီု သွက်ဂကူသွက်ဍုၚ်တုဲ (၃၁)တၠ ဇီုကပိုက်ဒးလဝ်ဝပ်ကီု ပ္ဍဲကဵုညးဒးပူဇဴဏာလမျီုကေုာံ ညးဒးလဝ်ဘဲဝပ်တအ်ဂှ် သ္ဂံၚ် PDF တအ်လေဝ် ပါလုပ်ဒၟံၚ်ရဂှ် ဟီုသ္ဂးလဝ်ရ။
ပ္ဍဲဂိတုမာတ်ချ် တုဲကၠုၚ်ဏံ ပ္ဍဲတိဍာ် KNU ခရိုၚ်ဘာပန် ဒပ်မဟာ(၅)၊ ခရိုၚ်ဒူပလာယာ ဒပ်မဟာ(၆)၊ ခရိုၚ်ညံၚ်လေဝ်ပေန် ဒပ်မဟာ(၃) တအ်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်တောဲ သၟဝ်တဲ KNUတအ် ပေါဲဗတိုက်သ္ကာတ်မြဟ်က္တဵုဒှ်လဝ်တုဲ ပ္ဍဲခရိုၚ်ဘာပန် တိဍာ်ဒပ်မဟာ (၅)ဂှ်မ္ဂး ဗ္ဒပ်မေဝ်ခါ မဒှ်ဗ္ဒပ်ဇၞော်ကံၚ်ဇြဳပၞာန်ဖျေံသ္ဇိုၚ်ဂှ် ဂကောံဒပ်ပံၚ်ကောံ KNLA တအ်ပံၚ်တောဲ သီကေတ်မာန်ကၠုၚ်လဝ်ရ။
ပ္ဍဲဂိတုမာတ်ချ်ဂှ် အကြာဒပ်ပံၚ်ကောံ KNLA ကဵုဒပ်ကံၚ်ဇြဳပၞာန်တအ် ပေါဲဗတိုက်က္တဵုဒှ်လဝ် သ္ကာတ်တ်မြဟ်ဟ်ကီု စဵုကဵုဂိတုဨဗြဴ လ္ပာ်ဂိတုလၟုဟ်ဏံ ပ္ဍဲကဵုခရိုၚ်KNU အုပ်ဓုပ်လဝ်ဗ္ဒာဲသီုဖအိုတ်တအ်ဂှ် အကြာဒပ်ၜါလ္ပာ်ပေါဲဗတိုက်တအ် ဆက်သ္ကာတ်မြဟ်ကၠုၚ်ဒၟံၚ်တုဲ ဒပ်ကံၚ်ဇြဳပၞာန်ဗတိုက်ပန်ပှော်ကၠုၚ်ဒၟံၚ် ကဵုလွဟ်ဇၞော်၊ ကမ်လှောဝ်တောဲ သီုကဵုက္ၜၚ်ကျာမွဲဒမြိပ်ရ။
ဟိုတ်နူပေါဲဗတိုက်ၜါလ္ပာ်သ္ကာတ်မြဟ်ဒၟံၚ်တုဲ စမြိုၚ်သ္ၚိဌာန်ညးဍုၚ်ကွာန် မၞုံပ္ဍဲတိဍာ် KNU တအ်ကီု သီုကဵုစမြိုၚ်ပရေၚ်ဘာသာတအ် ဒးဇီုကပိုက်လီုလာ်လဝ်တုဲ ညးဍုၚ်ကွာပန်ပါဲဘဲပၞာန်ဗွဲမဂၠိုၚ်တအ် ဒးဂြိပ်ဒဴပါဲဓလေတ် ဒၟံၚ်ပ္ဍဲဒၞာဲဗၠးဘဲဖိုဟ်ဏီကီု ဆက်နွံဒၟံၚ်ပၟိက်ကဵု အရီုဗၚ်ထံက်ပၚ်ပရေၚ်မၞိဟ်ဖိုဟ်ဏီရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNU