တယိတ်ချံၚ်၊ ဨပရဴ (၂၅)
ဒပ်ကံၚ်ဇြဳပၞာန် ဟိုတ်ဟွံမွဲမွဲသာ် ကၠုၚ်စိုပ်ရပ်ဒက်ဏာလဝ် ညးဒေသ ဒၟံၚ်ကွာန်ယၚေဝ် ကေုာံ ကွာန်ဝါယျေတ်၊ ပွိုၚ်ဍုၚ်တယိတ်ချံၚ်၊ ရးဒေသဇၞော်တၞၚ်သဳဂှ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၁၀၀) ပြၚ်ပါဂှ်ဝွံ ပ္ဍဲဂိတုဨပရဴ (၂၃) အခိၚ်နူဂယးဂှ် ကြဴနူလုပ်စိုပ်ကၠုၚ် အပ္ဍဲကွာန်ယၚေဝ်တုဲဂှ် ရပ်ဒက်ဏာလဝ် ညးဒေသ (၈၀) ပြၚ် ပ္ဍဲကဵုသ္ၚိဒၟံၚ်ဂမၠိုၚ်တုဲ ၜိုတ်အခိၚ်ဇိုၚ်သဝ်တ္ၚဲဂှ် ကလေၚ်ဗလးကဵုလဝ် ညးဒေသ (၃၀) ပြၚ်ရ။
ကြဴနူဂှ်တုဲ ပ္ဍဲဂိတုဨပရဴ (၂၄) ဂှ်လေဝ် ဒပ်ကံၚ်ဇြဳပၞာန်ဝွံ ကြဴနူလုပ်စိုပ်ကၠုၚ် အပ္ဍဲကွာန်ဝါယျေတ်တုဲဂှ် ရပ်ဒက် ညးဒေသ (၃၀) ပြၚ်တုဲ ထိၚ်ဒဝ်လဝ် ပ္ဍဲဘာလကျာ်ကွာန်ဝါယျေတ်ရောၚ်ဂှ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ဒပ်ကံၚ်ဇြဳပၞာန်ဝွံ စပ်ကဵုလၟေၚ်ဒဒှ် ဂကောံပၞာန်ညးဍုၚ်ကွာန်တံ ဒးဒုၚ်ပသောၚ်လဝ်ဂှ်တုဲ ညးဒေသကွာန်ဂမၠိုၚ်ဝွံ နကဵုတၚ်ထ္ၜးဟိုတ် အဆက်နွံဒၟံၚ်ကဵု ဒပ်စဵုဒၞါညးဍုၚ်ကွာန်တံဂှ် ဗက်ရပ်ဒက်ဒၟံၚ်ရ။
ယဝ်ရမိက်ဂွံကဵုဗလး ညးဒေသ မရပ်ဒက်လဝ်တံဂှ်မ္ဂး သွက်ဂွံကၠုၚ်နုက်ပ္တိတ် နကဵုသၠုဲဂှ် လ္ပာ်ကံၚ်ဇြဳပၞာန်တံ တြးလဝ်ပရိုၚ်ရောၚ် ညးဒေသတယိတ်ချံၚ်မွဲတၠ သ္ဂးရ။
ဒပ်ကံၚ်ဇြဳပၞာန် ဟိုတ်နူဗက်ရပ်ဒက်ဒၟံၚ် ညးဒေသတံ နကဵုဇြဟတ်ဒပ်ဗွဲမဂၠိုၚ်ဂၠေၚ်ဂှ်ရ ညးဒေသ နူကဵုကွာန်ယၚေဝ် ကေုာံ ဝါယျေတ်ဗွဲမဂၠိုၚ်ဝွံ ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်ရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဖေဖဝ်ဝါရဳ (၇) တေံလေဝ် နူကဵုထ္ပက်ကၠုၚ်ကရောၚ်ပၞာန် အပ္ဍဲကွာန်ယၚေဝ်တုဲဂှ် ရပ်ဒက်ဂစိုတ်ဂယိုၚ်ဏာလဝ် ကောန်ကွာန်ဒေသ (၂) တၠဂှ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီုဓာတ်−CJ