လ္ဂုၚ်၊ ဨပရဴ (၂၃)
နကဵုၝောံပိုဒ် ၅၀၅−က ပွမဆဝ်မ္ၚုဟ်ညံၚ်ဟွံညိၚ်ဝတ်ဂှ် ကံၚ်ဇြဳပၞာန် ကဵုရပ်ချုက်လဝ် ညးတၠရမျာၚ် မေလတာန်ဇြေန် ပ္ဍဲကဵုဗ္ဒိုပ်ဗၠာဲသၟိၚ်ဒဂုၚ်ရောၚ်ဂှ် ညးမစုက်လုက်ကဵု ဂကောံဒပ်ဗၠာဲသၟိၚ်ရးလ္ဂုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဨပရဴ (၂၁) တေံ စပ်ကဵုလၟေၚ်ဒဒှ်ကွာန်ပဇြဳကျဳတုဲ ဟိုတ်နူဟီုဂးချူပ္တိုန် ပြံၚ်လဝ်ပရိုဝ်ဖိုၚ်ဂှ်ရ ရပ်ချုက်လဝ် ပ္ဍဲကဵုဗ္ဒိုပ်ဗၠာဲသၟိၚ်ၝောံဍုၚ် ဍုၚ်ဒဂုၚ်တၟိ သ္ကုတ်ဗၟံက်ဂှ်ရောၚ်ဂှ် သ္ဂးရ။
ကြဴနူရပ်ဒက်လဝ် ညးတၠရမျာၚ် မေလတာန်ဇြေန် ပ္ဍဲကဵုသ္ၚိညး ပ္ဍဲဂိတုဨပရဴ (၂၁) တုဲကၠုၚ်တေံတုဲဂှ် ပလံၚ်ဏာလဝ် ဒၞါဲစၟဳစၟတ်(အောၚ်သပြေ) တုဲ စၟဳစၟတ်လဝ်ရောၚ်ဂှ် ဂွံတီကေတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) မပကောံပကေဝ်လဝ် ၜိုတ်က္ဍစိုပ်တံဂှ်မ္ဂး စပ်ကဵုလၟေၚ်ဒဒှ်ကွာန်ပဇြဳကျဳတုဲ ကံၚ်ဇြဳပၞာန် ရပ်ဒက်လဝ် ညးထ္ၜးရုပ် (မေပန်းချီ) ၊ ညးတၠရမျာၚ် (ရွှေရည်သိန်းတန်) ၊ ညးတၠရမျာၚ် မေလတာန်ဇြေန် ကေုာံ မၞိဟ်ဗြဴအာယုက် (၂၈) သၞာံ နူကဵုပွိုၚ်ဍုၚ်ဒဂုၚ်တၟိ သ္ကုတ်သၟဝ်ကျာဂှ်မွဲတၠ မဒှ်ရ။
သ္အာၚ်နူဂှ်ပၠန် အ္စာလိက်ပရိုၚ် ဥူကျဝ်မေန်ဇြိုဲ မချူပ္တိုန်လဝ် ပ္ဍဲလ္တူဇာဇၞိက်ပရေၚ်မၞိဟ်တံဂှ်ကဵု အ္စာပရိုၚ် ကိုဝ်ဝေဠေန်တံဂှ်လေဝ် ရပ်ဒက်လဝ်တုဲ ညးတံသီုဖအိုတ်ဂှ် စောဲလဝ်ဂဗုတ် နကဵုၝောံပိုဒ် ၅၀၅−က ဂှ် ဂွံတီကေတ်ရ။
စပ်ကဵုရဲအနုပညာ ကေုာံ အ္စာပရိုၚ်ဂမၠိုၚ် ဒးဒုၚ်ရပ်ဒက်ဂှ်တုဲ နကဵုသြၚ်လောန်တိုၚ်(မ်) သွက်ဂွံအာတ်တၚ်စၟတ် လစွံစိုတ် လ္တူအရာတံဏံဂှ် ၜိုန်ရဂ္စါန်ဆက်စၠောံလဝ် ဂကောံမဆေၚ်စပ် ဂကောံရုပ်ဒမျိုၚ်၊ ဂကောံဂဳတ ကေုာံ ကံၚ်ဇြဳပရိုၚ်မဳဒဳယျာ ကံၚ်ဇြဳပၞာန် မဒက်ပ္တန်ကဵုလဝ်တံဂှ်ကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ပ္ဍဲဂိတုဨပရဴ (၁၁) တေံ ကံၚ်ဇြဳပၞာန် ဗ္တိုက်ဂြာတ်လဝ်မခတိုဟ် နကဵုတရဴကျာ ကွာန်ပဇြဳကျဳ ပွိုၚ်ဍုၚ်ကဗလူ၊ ရးသက်ကိုၚ်ဂှ်တုဲ မၞိဟ်ဂၠိုၚ်ကဵုဒါဇြိန် ဒးချိုတ်လဝ်တုဲ ဟိုတ်နူလၟေၚ်ဒဒှ်ဏံတုဲ ပရေၚ်ပါ်ပါဲတံ သၠုၚ်တိုန်ကၠုၚ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုဓာတ်−Google