ဘာအၚ်၊ ဨဗြဴ (၂၅)
တွဵုရးကရေၚ်၊ ဗ္ဒပ်ကၚ်မေဝ်ဇြိထာ ကံၚ်ဇြဳပၞာန် မၞုံပွိုၚ်ဍုၚ်ဘာအၚ်ဂှ် ဂိတုဨဗြဴစၟတ်တ္ၚဲ (၂၄) အခိၚ်နူဂယး နူဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ(၁) ကေုာံ ဒပ်မဟာ(၅)တအ် ဗတိုက်သီကေတ်လဝ်ရဂှ် ဗဟိုဝ် KNU လလောၚ်တြးလဝ်ရ။
ဗဒိုပ်သၞေဟ်ကၚ်စၟဳစၟတ်မေဝ်ဇြိထာ မဒှ်ဒပ်ဖျေံသ္ဇိုၚ် တံဒပ်ပၞာန်တိုက် ခမရ စၟတ်(၄၀၁) သၟဝ်တဲကံၚ်ဇြဳပၞာန် စကခ ဂှ် ဒပ်ပံၚ်ကောံ KNLA လုပ်စိုပ်ဗတိုက်သီကေတ်လဝ် ပ္ဍဲဂိတုဨဗြဴ စၟတ်တ္ၚဲ (၂၄) အခိၚ်နူဂယး ၄ နာဍဳကဝက်ဂှ်တုဲ ပ္ဍဲအခိၚ် ပွိုၚ်ကဝက်နာဍဳ သီကေတ်လဝ်ဗဒိုပ်မာန်လဝ်ရဂှ် ဟီုသ္ဂးလဝ်ရ။
ပ္ဍဲပရောဒဒှ်သီကေတ်လဝ်ဗဒိုပ်ဂှ် ကောန်ဒပ်ကံၚ်ဇြဳပၞာန် (၅)တၠ ဒးချိုတ်လဝ် ပ္ဍဲဗဒိုပ်ဂှ်တုဲ (၁၀)တၠတအ်ဂှ် ဂြိပ်တိတ်လဝ် နူဗဒိုပ် ဗၠးတိတ်အာလဝ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးရ။
ပ္ဍဲပရေၚ်ဗတိုက်သီကေတ်ဗဒိုပ်ဂှ် ဒပ်ပံၚ်ကောံ KNLA သီဂွံလဝ် လွဟ်ဇမၠေံ (၁)ဒကိုအ်၊ လွဟ် K3 79 (၁) ဒကိုအ်၊ လွဟ် K3 (၃) ဒကိုအ်၊ ဖျေဲမကမ်(၂၀) မ၊ မကမ်(၁၅၀၀) ဒကောၚ်ရ။
ဗဒိုပ်သၞေဟ်ကၚ်မေဝ်ဇြိထာဂှ် သိုၚ်စွံလဝ် အကြာဒပ်မဟာ (၁) ကဵုဒပ်မဟာ (၂) တိဍာ် KNU တုဲ ဒှ်သၞေဟ်ကၚ်စှ်ေဒၞာဲကိုန်ဗျူဟာ မွဲဒပ်ကီု သီုဒှ်ဒပ်သၞေဟ်ကၚ် က္လိလောန်ဒၟံၚ် ပရေၚ်စၟဳစၟတ် ညးဍုၚ်ကွာန်အာတရဴ၊ ဍဵုဍိုက်ဟွံဗဗွဲဓဝ်၊ ကော်ဏာပ္ဍဲဗ္ဒပ်တုဲ ပရေၚ်ကၠောန်သ္ပ နဒဒှ်ဒေၚ်ဒုၚ်ဒၞာမၞိဟ် မွဲဗဒိုပ်လေဝ် ဒှ်ရဂှ် ဟီုသ္ဂးလဝ်ရ။
ပ္ဍဲပေါဲဗတိုက်သီဗဒိုပ်မေဝ်ဇြိဂှ် နူလ္ပာ်ဒပ်ပံၚ်ကောံ KNLA ခရိုၚ်သဓီု KNU သ္ကိုပ်ရုၚ်ဗျူဟာ စၟတ်(၁) သ္ကိုပ်ဗိုလ်ဇၞော် သဝ်ရာမ်ဗိုလ်ကီု သီုကဵုသ္ကိုပ်တံဒပ် KNLA ခရိုၚ်မူတြဝ် တံဒပ် လၟိဟ် (၁၀၂) ဗိုလ်ဇၞော် ဗိုလ်တဝ်တအ် က္ဍိုက်က္ဍိုပ်ဗတိုက်လဝ်တုဲ လ္ပာ်ဒပ်ပံၚ်ကောံတအ် ဇီုကပိုက်ဒးလဝ်ဟၟဲရဂှ် လလောၚ်တြးလဝ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – KNU