လဂုၚ်၊ ဨဗြဴ(၂၅)
ပရေၚ်စၟယဲကိုဝ်ဝေတ်ကၠောံထၞာန် ပ္ဍဲကၟိန်ဍုၚ်ဗၟာဂှ် ဂိတုဨဗြဴမံက်ဏံ သၠုၚ်ဂၠိုၚ်တိုန်ကၠုၚ်ဒၟံၚ် ညိညဇြိုၚ်သာတုဲ အခိၚ်ကာလအတးလောန်ဏံဂှ်မ္ဂး ညးယဲသ္ပလဝ်ဒ္တန် ယဲဂိုဝ်ဝေတ် ဗ္ဒာဲ (၁၉၀)တၠ နွံကၠုၚ်ရဂှ် ဓမံက်ထ္ၜးလဝ် ပ္ဍဲလိက်ပရိုၚ်တြးဝါဒကံၚ်ဇြဳပၞာန်ရ။
နူဂိတုဨဗြဴ စၟတ်တ္ၚဲ(၁၇) မဒှ်တ္ၚဲ သၞာံတၟိကၟိန်ဍုၚ်ဗၟာဂှ် စဵုဂိတုဨဗြဴ စၟတ်တ္ၚဲ (၂၃) ပ္ဍဲပွိုၚ်မွဲသတ္တာဟ မၞိဟ်ယဲသ္ပလဝ်ဒ္တန် ဂိုဝ်ဝေတ် စဵုကဵု (၁၈၉)တၠ နွံကၠုၚ်ရဂှ် ဌာနဝန်ဇၞော်ပရေၚ်ထတ်ယိုတ်ကံၚ်ဇြဳပၞာန် လလောၚ်တြးလဝ်ရ။
ပ္ဍဲကဵုမၞိဟ်ယဲသ္ပလဝ်ဒ္တန်ဂိုဝ်ဝေတ် (၁၈၉)တၠတအ်ဂှ် မၞိဟ်ယဲဒးချိုတ်အာလဝ် ၜိုန်ရဟၟဲကီုလေဝ် ညးလုပ်ကၠုၚ် နူဍုၚ်သ္အာၚ် (၇၂)တၠ ကေုာံ သှ်ေမၞိဟ်(၁၁၇)တၠတအ်ဂှ် ဒှ်မၞိဟ်ကၠောံထၞာန်လဝ် ပ္ဍဲဍုၚ်ရဂှ် ဂွံတီကေတ် အတိုၚ်တၚ်ဂၞၚ် ဌာနဝန်ဇၞော် ပရေၚ်ထတ်ယိုတ်ရ။
စၟယဲဂကူဂိုဝ်ဝေတ် ပြံၚ်လဝ်ဗဳဇ XBB 1.16 ကၠောံထၞာန်ပြးတိတ်ကၠုၚ်ဂှ် လ္တူနူကဵုစၟပြံၚ်ဗဳဇ ဂွံဆဵုကေတ်လဝ်ကၠာတေံ စဵုကဵု ၁ ဒသမ ၂၇ ချ ၜိုန်ရပြဟ်ပြေဟ်ဒၟံၚ်ကီုလေဝ် ပရေၚ်ယဲသ္ကာတ်မြဟ်။ ပရေၚ်ဒးတိုန်လွဳလွတ် ပ္ဍဲရုၚ်ဂဥုဲ ကေုာံ ပရေၚ်ဒးချိုတ်လဝ်ဂမၠိုၚ် သၠုၚ်ဂၠိုၚ်တိုန်ကၠုၚ် ဟၟဲရဂှ် ဌာနဝန်ဇၞော်ပရေၚ်ထတ်ယိုတ် ဟီုသ္ဂးလဝ်ရ။
အ္စာဂဥုဲမွဲတၠဂှ်မ္ဂး ဗ္ၜတ်ဂိုဝ်ဝေတ်ကၠောံထၞာန်ဒၟံၚ်လၟုဟ်ဏံ ၜိုန်ရဟွံဒးဒှ်ဓဝိၚ်ကဵု အန္တရာယ်လမျီုကီုလေဝ် ယဝ်ရပရေၚ်စၟယဲကၠောံထၞာန် ဂၠိုၚ်သ္ကာတ်မြဟ်တိုန်ကၠုၚ်မ္ဂး ဒးဆဵုဂဗကဵု အန္တရာယ်လမျီုမာန်ဒၟံၚ်ရဂှ် ဟီုကဵုဌာန်ပရိုၚ် သြၚ်လောန်တိုၚ်(မ်)ရ။
အခိၚ်လၟုဟ်ပြဟ်ဟ်ဏံမ္ဂး ညးယဲကၠုၚ်ထ္ၜးဒၟံၚ် ပ္ဍဲရုၚ်ဂဥုဲမ္ၚးတအ်ဂှ် လက္ချဏ်တုပ်ကဵုယဲဂိုဝ်ဝေတ် ဇကုဇကောဝ်ဂိသကေဝ်ကီု၊ က္ဍိုပ်ထ္ပက်ဂိကီု မ္ၚးနူဂှ် နူကဵု(၃)တ္ၚဲ စဵုကဵုၜိုတ်(၅)တ္ၚဲ ဇကုကတဴတုဲ သီုကဵုယဲဟွံသ္ကာတ်မြဟ်မွဲသာ် ၜိုန်ရဂွံဗၠးလဝ်ကီုလေဝ် ဂမ္တဴသာမညဟာ၊ ဂမ္တဴဂိုဝ်
ဝေတ်ဟာဟီုဂှ် ပါ်ပါဲဟွံမာန်ရဂှ် အ္စာဂဥုဲဏံ သောၚ်ထ္ၜးလဝ်ရ။
ဌာနဝန်ဇၞော်ပရေၚ်ထတ်ယိုတ်ကံၚ်ဇြဳပၞာန်ဂှ်မ္ဂး နကဵုညးဍုၚ်ကွာန်တအ် သွက်ဂွံဝေၚ်ပါဲ ဒၞါဲမၞိဟ်ကောံကလောံကီု ဂဥုဲစဵုဒၞာဂိုဝ်ဝေတ် ထ္ပက်ကဵုဒၟံၚ်မသက္ကုၚုဟ်မး ဂၠိုၚ်ၚ်ကဵုအလန်တုဲ သွက်ဂွံထ္ပက်ဂဥုဲစဵုဒၞာဗက်လကြဴ ပ္ဍဲဌာနပရေၚ်ထတ်ယိုတ်မကြပ်ညောန်တအ် ညံၚ်ဟွံဂွံလုတ်ဒကုတ်အာဂှ် ဟီုဗတိုက်ဖ္အောဝ်လဝ်ရ။
ပ္ဍဲကၟိန်ဍုၚ်ဗၟာဂှ် နူအခိၚ်ယဲဂိုဝ်ဝေတ်စက္တဵုဒှ်တုဲ စဵုဂိတုဨဗြဴ စၟတ်တ္ၚဲ (၂၃) သၞာံဏံ လၟိဟ်မၞိဟ်ယဲ သ္ပလဝ်ဒ္တန်စၟယဲ ပံၚ် ၆၃၄,၀၀၀ တၠပြၚ်နွံကၠုၚ်တုဲ ညးဒးချိုတ်လဝ် ၁၉, ၄၀၀ ပြၚ်နွံဒၟံၚ်ရဂှ် ဂွံတီကေတ်အတိုၚ်စရၚ်ဌာနဝန်ဇၞော်ပရေၚ်ထတ်ယိုတ်ရ။
ပရိုၚ်-သြၚ်လောန်တိုၚ်(မ်)
ဗီုရုပ် – Reuters