ပ္ဍဲညံၚ်လေဝ်ပေန် ဟိုတ်နူဒးလွဟ်ဇၞော်တုဲ မၞိဟ်ဗြဴ ၂ တၠ ချိုတ်တုဲ ၇ တၠ ကလိဂွံဝပ်

ညံၚ်လေဝ်ပေန်၊ ဂျောန် (၃၀)

ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် အပ္ဍဲကဵုတိဍာ် ဒပ်မဟာ (၃) ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တံဂှ်တုဲ မၞိဟ်ဗြဴဒေသ (၂) တၠ ချိုတ်တုဲ ကောန်ၚာ် (၄) တၠ ပါလုပ်ဂှ် ညးဒေသ (၇) တၠ ဇီုကပိုက်ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ်ရ။

ပ္ဍဲဂိတုဂျောန် ၂၄ တေံ နူကဵုဒပ်ခလရ (၂၀) ကံၚ်ဇြဳပၞာန်တံ ဟိုတ်နူပန်ပှော်လဝ်လွဟ်ဇၞော် အပ္ဍဲကွာန် တိတ်ဂါ မၞုံသြၚ်ဗၟံက်ၜဳသက်တိုၚ် ပွိုၚ်ဍုၚ်ယှိုဲကျေန်၊ ခရိုၚ်ညံၚ်လေဝ်ပေန် KNU တံဂှ်တုဲ ကောန်ၚာ်မၞုံ အပ္ဍဲကွာန် (၁) တၠကဵု ညးဗြဴ (၂) တၠ ဇီုကပိုက်ကလိဂွံလဝ်ဝပ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

ပ္ဍဲကဵုတ္ၚဲဂှ်ရ ဒပ်ကံၚ်ဇြဳပၞာန် ဟိုတ်နူပန်ပှော်စုတ်လဝ်လွဟ်ဇၞော် ပ္ဍဲကွာန်တမေန်အေန်ကုန် မၞုံသြၚ် ပလိုတ်ၜဳသက်တိုၚ် ကေုာံ ကွာတ်ပေဝ်ဒံၚ် မၞုံသြၚ်ဗၟံက်ၜဳသက်တိုၚ်တံဂှ်တုဲ ညးဗြဴ နူကဵုကွာန်ပေဝ်ဒံၚ် (၁) တၠ ဒးမကမ်ချိုတ်အာလဝ်တုဲ ကောန်ၚာ် (၂) တၠ ဇီုကပိုက်ကလိဂွံလဝ်ဝပ်တုဲ နူကဵုကွာန်တမေန် အေန်ဂှ် ညးဗြဴ (၁) တၠ ချိုတ်အာတုဲ ကောန်ၚာ် (၁) တၠ ကလိဂွံလဝ်ဝပ်ရ။

ပ္ဍဲဂိတုဂျောန် (၂၇) ဂှ်လေဝ် ကရောၚ်ပၞာန်ကံၚ်ဇြဳပၞာန် ဇြဟတ်ဒပ် (၅၀) ပြၚ်ပါဂှ်ဝွံ လုပ်စိုပ်ကၠုၚ်လဝ် ပ္ဍဲကွာန်ပဇြောန်မျံၚ်တုဲ ဟိုတ်နူပန်ပှော်စုတ်လဝ် လွဟ်ဇၞော် ၜိုတ် (၁၃) မ ပ္ဍဲကွာန်ဗၟံက်ၜဳ သက်တိုၚ် တံဂှ်ရ လွဟ်ဇၞော်ဒတုံဗ္တိုဟ်ထ္ကးအာလဝ် ပ္ဍဲကွာန်ဝိုၚ်ကျောန်၊ ဗၟံက်ကွာန်ပျေန်ယျေ၊ တိုက်တူ၊ တိတ်ဂါကုန်တံရ။

ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်ဂှ်ရ ညးသၟတ် နူကဵုဗၟံက်ကွာန်ပျေန်ယျေ (၁) တၠ ဒးလွဟ်ဇၞော် ကလိဂွံလဝ်ဝပ်တုဲ သ္ၚိဌာန်ညးလေဝ် ဇီုကပိုက်လီုလာ်အာလဝ်ရောၚ် လလောၚ်ပ္တိတ်လဝ်ရ။

သ္အာၚ်နူဂှ်ပၠန် နူကဵုဂိတုဂျောန် (၂၁) စဵုကဵုဂိတုဂျောန် (၂၈) ဒပ်ခလရ ဒပ်ကံၚ်ဇြဳပၞာန် (၂၆၄) ဝွံ နူကဵုကွာန် ကေုာံ ဂၠံၚ်ကွဳစက် မၞုံသြၚ်ပလိုတ်ၜဳသက်တိုၚ်၊ ကျံက်တခါ၊ ပုၚ်၊ (ဇလုပ်) တံဂှ် အရိုဟ်ဒဒှ်တ္ၚဲ ပန်ပှော် ဒၟံၚ်လွဟ်ဇၞော် ပ္ဍဲကွာန် မၞုံသြၚ်ဗၟံက်၊ သြၚ်ပလိုတ် ၜဳသက်တိုၚ် ပွိုၚ်ဍုၚ်ကျံက်ကျဳ KNU တံ နွံဂှ် KNU သ္ဂးလဝ်ရ။

ဟိုတ်နူပရေၚ်ပန်ပှော်လွဟ်ဇၞော်တုဲ လွဟ်ဇၞော် ဒတုံဗ္တိုဟ်ထ္ကးအာလဝ် ပ္ဍဲကွာန်မၞုံပလိုတ် ၜဳသက် တိုၚ်တံဂှ်ရ သ္ၚိဒၟံၚ်ဂမၠိုၚ် ဇီုကပိုက်လီုလာ်ဂှ်ကီု၊ ညးဍုၚ်ကွာန်တံ ဇီုကပိုက်ကလိဂွံဝပ် ကေုာံချိုတ်အာ တံ နွံလဝ်တုဲ သွက်ဂွံသ္ပဒတန် လၟိဟ်သ္ၚိဒၟံၚ်ဇီုကပိုက်လီုလာ်အာလဝ်တံ၊ လၟိဟ်မၞိဟ်ဇီုကပိုက်ကလိဂွံ ဝပ်တံ ကေုာံ လၟိဟ်မၞိဟ်ချိုတ်အာတံမာန်ဂှ် KNU ရေၚ်တၠုၚ်ဒၟံၚ်ဖိုဟ်ရောၚ် ဂွံတီကေတ် အတိုၚ်တၚ်လလောၚ်တြးတံရ။

ပရိုၚ်−သြၚ်လောန်တိုၚ်(မ်)

ဗီု−KNU