ပရေၚ်ဖံက်ဗ္တိုဟ် ဒဒန်ဂျုံအုက်ဗဳလေန်ဂှ် လ္ဂောံကဵုပရေၚ်ပၞာန်တုဲ ဒးကၠောန်လဝ်ရောၚ်ဂှ် KNU ဟီု

မတ်မလီု၊ ဂျောန်(၃၀)

ပရေၚ်ဖံက်ဗ္တိုဟ်ပလီုပလာ် ဒဒန်ဂျုံအုက်မၞုံလ္တူဂၠံၚ်ကွဳစက် လ္ဂုၚ်-မတ်မလီုဂှ် လ္ဂောံကဵုပရေၚ်ပၞာန် ထပိုတ်ထောံဂၠံၚ်တရဴထံက်ပၚ်ကံၚ်ဇြဳပၞာန်တံရဂှ် ဥက္ကဌကဝ်မတဳကောပ်ကာဲ ကေၚ်ကာမိတ်ခရိုၚ်သဓီု KNU ဟီုကဵုဌာန်ပရိုၚ်သြၚ်လောန်တိုၚ်မ်ရ။

ဒဒန်ဂျုံအုက် မၞုံလ္တူဂၠံၚ်ကွဳစက် လ္ဂုၚ်-မတ်မလီု ဗ္ဒါဲကွာန်ယှိုဲယံၚ်ပျ အကြာပွိုၚ်ဍုၚ်သဓီု ကဵုပွိုၚ်ဍုၚ် ဗဳလေန် တွဵုရးဍုၚ်မန်ဂှ် ဂိတုဂျောန် စၟတ်တ္ၚဲ (၂၈) အခိၚ်နူဂယး ၜိုတ်၄နာဍဳကဝက်ဂှ် ဂကောံဇြဟတ် ပၠန်ဂတးတံ ပစူမာၚ်ဖံက်ဗ္တိုဟ်လဝ်ရ။

ဟိုတ်နူဒးဒုၚ်ဖံက်ဗ္တိုဟ်မာၚ်ဂှ်ရ ဒဒန်သရိုဟ်စှ်ေအာ မွဲကရေက်တုဲ က္တဵုဒှ်အာလဝ် စဵုကဵုအကာဲအရာ ကွဳစက်ဖ္ဍိုက်ကပေါတ်တံ အာကၠုၚ်ဟွံဂွံရ။

စပ်ကဵုအကာဲအရာ ဒဒန်ဂျုံအုက်ဒဒုၚ်ဖံက်ဗ္တိုဟ်မာၚ်တုဲ ဥက္ကဌကဝ်မတဳ ကောပ်ကာဲကေၚ်ကာမိတ် ခရိုၚ်သဓီု KNU သ္ကိုပ်ဗိုလ်သဝ်ကျဝ်မျေတ်ဂှ် ဟီုလဝ်ဗီုလၟုဟ်ရ။

“တၚ်ရန်တၟအ်အဓိကပိုဲဂှ်တှ်ေ နူလ္ဂုၚ်-မတ်မလီုဏံ ဖာအၚ်-မြဝတဳတံရ။ လ္ပာ်တေံဂှ် စဵုစိုပ်ရေဝ်တံ ထဝါဲတံရ။ ဂၠံၚ်ဇၞော်ဂှ် နကဵုတၚ်ရန်တၟအ် မိက်ဂွံထပိုတ်ထောံ ဂၠံၚ်တရဴဆက်စပ်ကဵု ပရေၚ်ထံက်ပၚ် ကံၚ်ဇြဳပၞာန်တံ နူဇရၚ်စကစတံရ။ ဒဒန်ဂှ်လေဝ် ဂၠံၚ်ဇၞော်အဓိက မတ်မလီုကဵုလ္ဂုၚ်အာဂွံမံၚ်။ နူမတ်မလီုကဵုဖာအၚ်ဂှ် စဵုစိုပ်မြဝတဳ အာဂွံမံၚ်ရ” သာ်ဝွံ ညးဟီုရ။

ပ္ဍဲလၟေၚ်ဒဒှ် ဒဒန်ဂျုံအုက်ဒးဒုၚ်ပလီုပလာ်ဖံက်ဗ္တိုဟ်မာၚ်ဂှ် သၞာဲဒဴနူဌာနဆေၚ်စပ်ကံၚ်ဇြဳပၞာန်တံမပါလုပ် ဟွံအောန်နူကဵု ၃ တၠချိုတ်တုဲ ၂၆တၠ က္လိဂွံလဝ်ဝပ်ရဂှ် သြၚ်လောန်တိုၚ်မ် ဂၠိုက်ဂၠါဲဂွံတီကေတ်လဝ်ရ။

ကုသၞာဲဒဴဌာနဆေၚ်စပ်ကံၚ်ဇြဳပၞာန် ကၠုၚ်စၟဳတ် ပရေၚ်ဒဒန်သရိုဟ်လီုဏံဂှ် ဒပ်ပံၚ်ကောံ ဂကောံဇြဟတ် ပၠန်ဂတးတံ ဟိုတ်နူထပ်ဗ္တိုက်ထောံလဝ် မခတိုဟ်နကဵုဒရုၚ် ၁၀မ ပၠန်ဂှ်ရ ပရေၚ်ဇီုကပိုက်ချိုတ်ဂျိုၚ် ဂၠိုၚ်လဝ်ရ။

ပ္ဍဲလၟေၚ်ဒဒှ်ဒးဒုၚ်ဗ္တိုက်ကဵုဒရုၚ်ဂှ် အထံက်သ္ကိုပ်စၞောန်ပ္ညုၚ် ရုၚ်သ္ကိုပ်ဂၠံၚ်ဍာန် ခရိုၚ်သဓီုမွဲတၠ၊ ညးယိုက်ဝန် ရုၚ်သ္ကိုပ်အုပ်ဓုပ်ကာနာနာမွဲတၠ ချိုတ်တုဲ ပ္ဍဲလၟေၚ်ဒဒှ် ဒဒန်ဒးဒုၚ်ဖံက်ဗ္တိုဟ်ဂှ် သၞာဲဒဴသၞောဝ်ဥပဒေမွဲတၠ ချိုတ်အာလဝ်ရ။

ပ္ဍဲလၟေၚ်ဒဒှ်ဏံဂှ် သ္ကိုပ်ရးဒပ်ကံၚ်ဇြဳပၞာန် သ္ကိုပ်ဗိုလ်ဇၞော်အံၚ်အံၚ်ဟုၚ်မပါလုပ် မ္ၚးနူသၞာဲဒဴ ဒပ်ကံၚ်ဇြဳပၞာန်၊ ဒပ်ဗၠာဲသၟိၚ်တံဂှ် ညးတာလျိုၚ်ဌာနဆေၚ်စပ် ၂၆တၠ က္လိဂွံလဝ်ဝပ်တုဲ ညးဒးဂွိၚ်ကဵုအန္တရာယ်လမျီုတံ နွံမံၚ်ဟွံအောန်နူကဵု ၄ တၠရဂှ် ဂွံတီကေတ်ရ။

ဒဒန်ဂျုံအုက်ဂှ် ဒှ်သ္ကုတ်ဂၠံၚ် အာကၠုၚ်မံၚ် လ္ဂုၚ်၊ ဖာအၚ်၊ မတ်မလီု ကဵု မြဝတဳတံ အဓိကမွဲတုဲ ဟိုတ်နူလၟေၚ်ဒဒှ်ဏံတုဲ ၜိုတ်ကွဳစက်သ္ၚိတံရ အာကၠုၚ်ဂွံတုဲ ကွဳစက်ဖ္ဍိုက်ကပေါတ်တံ အာကၠုၚ်ဟွံဂွံဂှ်ရ လၟိဟ်ကွဳစက်ဂၠိုၚ်ကဵုကၠံ ကၟာတ်ဆိုအ်မံၚ်ရ။

ကြဴနူဒဒန်ဂျုံအုက် ဒးဒုၚ်ဖံက်ဗ္တိုဟ်တုဲဂှ် လ္ပာ်ကံၚ်ဇြဳပၞာန်တံ ပတေၚ်ဂြတ်လဝ် ပရေၚ်ဂီုကၠီုဗွဲတၟေၚ်တုဲ ကၠောန်သ္ပမံၚ် သွက်ဂွံပဠေဝ်ဒဒန်တံ နွံမံၚ်ရ။

ပ္ဍဲလၟေၚ်ဒဒှ်ဏံဂှ် နူကဵုတမ်ဒပ်ဖျေံသ္ဇိုၚ်ကံၚ်ဇြဳပၞာန်တံဂှ် ကၠောန်သ္ပပွပန်ပှော်လွဟ်ဇၞော် ပ္ဍဲကွာန်မၞုံသၟဝ်အုပ်ဓုပ်ဗော်သွးကောန်ဂကူကရေၚ် KNU ခရိုၚ်သဓီုတံ အဆက်ဟွံပိုတ်သ္ကုတ်ရ။

ညးသ္ၚဳဂၠိပ်ပရေၚ်ပၞာန်တံဂှ် ဟိုတ်နူလၟေၚ်ဒဒှ်လၟုဟ်ဏံတုဲ ပ္ဍဲတွဵုရးဍုၚ်မန် ခရိုၚ်သဓီုဂှ် ပေါဲဗ္တိုက်တံ သာတုဲသ္ကာတ်မြဟ်ကၠုၚ်မာန်ရောၚ်ဂှ် ပွပါ်ပါဲတံ နွံမံၚ်ရ။

ပရိုၚ်-သြၚ်လောန်တိုၚ်မ်

ဗီု-CJ