ဒပ်ကံၚ်ဇြဳပၞာန် ဗက်ရပ်ဒက်ဒၟံၚ် ညးဒေသနှေဟ်ကရေၚ် ပွိုၚ်ဍုၚ်ရေဝ်

ရေဝ်၊ ဂျောန် (၃၀)

ပ္ဍဲကဵုကွာန်နှေဟ်ကရေၚ် ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ဒပ်ကံၚ်ဇြဳပၞာန် ဟိုတ်ဟွံမွဲမွဲသာ် ဟိုတ်နူဗက်ရပ် ဒက်ဒၟံၚ်ဂှ်ရ ဒးဂြိပ်ဒဴပါဲဒလေတ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုဂျောန် ၂၅ တေံ ဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ပံၚ်ကောံ PDF တံ ကြဴနူလုပ်စိုပ်ဗ္တိုက် ဗ္ဒိုပ်ဗၠာဲသၟိၚ်နှေဟ်ကရေၚ်တုဲဂှ် နူကဵုဒပ်ကံၚ်ဇြဳပၞာန်တံ ဟိုတ်ဟွံမွဲမွဲသာ် ဗက်ရပ်ဒက်ဒၟံၚ် ညးဍုၚ်ကွာန်တံရ။

ဒပ်ကံၚ်ဇြဳပၞာန်ဝွံ ပ္ဍဲဂိတုဂျောန် ၂၉ အခိၚ်နူဂယးဂှ် ဖံက်ပန်သေနာတ်လုပ်စိုပ်ကၠုၚ် အပ္ဍဲကွာန်တုဲ ဗက်ရပ်ဒက်ညးဒေသတံကဵု ပလီုပလာ်သ္ၚိဒၟံၚ်တံဂှ် ကၠောန်ၜိုတ်ဒၟံၚ်ရောၚ် ဂွံတီကေတ်ရ။

အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ ရပ်ဒက်လဝ် ညးဒေသ ဟွံအောန်နူကဵု ၆ တၠတုဲ သီုကဵုကေတ်ဏာလဝ် ကာ၊ ကွဳလိုန်ဓာတ် အပ္ဍဲကွာန်တံရောၚ်ဂှ် ညးဒေသမွဲတၠ ဟီုရ။

ဟိုတ်နူပရေၚ်ဗက်ရပ်ဒက် ဒပ်ကံၚ်ဇြဳပၞာန်တံဂှ်တုဲ ညးဍုၚ်ကွာန်ဒေသ ဗွဲမဂၠိုၚ် ဒးဂြိပ်ဒဴပါဲဒလေတ် ဒၟံၚ်တုဲ ညးဒေသလ္ၚဵုတံဂှ် ဟွံတိတ်မ္ၚးသ္ၚိမွဲသာ် ဒးအောပ်မံၚ်ဒၟံၚ်ရောၚ်ဂှ် သ္ဂးရ။

ညးဍုၚ်ကွာန်ဒေသ နူကဵုဒပ်ကံၚ်ဇြဳပၞာန်တံ မရပ်ဒက်ဏာဂှ်ဝွံ ညးလဵုမွဲဒှ်မာန်ရောဂှ်ကဵု ထိၚ်ဒဝ်လဝ် ညးတံ ဒၞါဲလဵုရောဟီုဂှ် နကဵုသြၚ်လောန်တိုၚ်(မ်) ဂွံတီကေတ် ချိုတ်တ်ပၠိုတ်တ်မာန်ဂှ် ဂၠိုက်ဂၠါဲဒၟံၚ်ဖိုဟ်ရ။

ပ္ဍဲကဵုကွာန်နှေဟ်ကရေၚ် ဒၞါဲကောန်ဂကူမန်ဗွဲမဂၠိုၚ် မမံၚ်တန်တဴဒၟံၚ်ဂှ် သ္ၚိ ၜိုတ် ၃ လ္ၚီနွံတုဲ ဟိုတ်နူဂွိၚ် ဖေက် ဒးဒုၚ်ဗ္တိုက်ကဵု က္ၜၚ်ကျာကံၚ်ဇြဳပၞာန်တံဂှ်တုဲ ပါဲဒလေတ်ဒၟံၚ် ပ္ဍဲဘာလကျာ်တံ နွံတုဲ ဒၞါဲဗၠးဘဲတံဂှ် လေဝ် ဆုဲပြံၚ်ဒၟံၚ်တံ နွံဒၟံၚ်ရောၚ်ဂှ် ဂွံတီကေတ်ရ။

အပ္ဍဲဂိတုဂျောန်ဏံ ဟိုတ်နူပရေၚ်ပန်ပှော်လွဟ်ဇၞော် ကေုာံ ပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံဂှ် တုဲ ညးဒေသနှေဟ်ကရေၚ် (၃) တၠ ချိုတ်အာလဝ်တုဲ ဇီုကပိုက်ကလိဂွံဝပ်တံ နွံဒၟံၚ်ရ။

ပ္ဍဲတွဵုရးဍုၚ်မန်ဂှ် ကြဴနူဒပ်ပၞာန်သီအဝဵုတုဲ ညးဍုၚ်ကွာန် (၆၅) တၠ ချိုတ်အာတုဲ မၞိဟ်ဒးဒုၚ်ရပ်ဒက် (၄၀၀) ပြၚ် နွံဒၟံၚ်ရောၚ် ထ္မံက်ထ္ၜးလဝ် ပ္ဍဲဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP တံရ။

ပရိုၚ်−သြၚ်လောန်တိုၚ်(မ်)

ဗီု−Social Media