သွက်ဂွံသောၚ်ကလး အကြေပ်အဂြတ်ကၟိန်ဍုၚ်ဗၟာဂှ် ပ္တိတ်အာဇြဟတ်ဏောၚ် ဂကောံဒေါအ်ပန်ပှော် ၅ ဂကောံ ဟီု

နေဗျဳဒဝ်၊ ဂျောန် (၃၀)

ဂကောံထ္ပက်လဝ်စၟတ်တဲဒေါအ်ပန်ပှော် ပ္ဍဲလိက်ကသုက် NCA (၅) ဂကောံဂှ် သွက်ဂွံသောၚ်ကလး တတ်ၜက်အာ အကြေပ်အဂြတ်ပရေၚ်ဍုၚ်ကွာန်ဍုၚ်ဗၟာ မက္တဵုဒှ်ဒၟံၚ်လၟုဟ်တံမာန်ဂှ် ဂ္စါန်ရေၚ်တၠုၚ် အာဏောၚ် ကြဴနူဆဵုဂဗသဳကၠဳပရေၚ်ၜိုဟ်လလမ် ကုကံၚ်ဇြဳပၞာန် ပွိုၚ် ၃ တ္ၚဲတုဲဂှ် လလောၚ်ပ္တိတ်လဝ်ရ။

ဂကောံရပ်လွဟ်ကောန်ဍုၚ်အရၚ် မပါလုပ်ထ္ပက်လဝ်စၟတ်တဲ ပ္ဍဲလိက်ကသုက် NCA (၅) ဂကောံဂှ်ဝွံ ကံၚ်ဇြဳပၞာန် ကော်ဘိက်တုဲ နူဂိတုဂျောန် ၂၆ စဵုကဵု ၂၈ ပွိုၚ်ပိတ္ၚဲ သဳကၠဳလဝ်ညးသ္ကအ် ပ္ဍဲကဵုနေဗျဳဒဝ်ရ။

ကြဴနူဆဵုဂဗသဳကၠဳကဵု ကံၚ်ဇြဳပၞာန်တုဲဂှ် ထ္ပက်လဝ်စၟတ်တဲ တၚ်တုပ်စိုတ် စပ်ကဵုမူဝါဒ (၄) တၚ် သီုကဵုတၚ်နၚ်ဗွဲလစှ်ေတံဂှ်ရောၚ် ဂကောံဒေါအ်ပန်ပှော် (၅) ဂကောံတံ လလောၚ်ပ္တိတ်လဝ်ကီုလေဝ် တၚ်တုပ်စိုတ် မကလိဂွံတံဂှ် ထ္မံက်ထ္ၜးလဝ် ဗွဲလစှ်ေ ဂှ် ဟွံမွဲရ။

ဆ္ဂး နကဵုဂကောံဒေါအ်ပန်ပှော် EAO (၅) ဂကောံ ကောန်ဂကောံ PPST တံဂှ် မူပေါဲသဳကၠဳကဆံၚ်လ္တူ ညံၚ်ဂွံသောာၚ်ကလးတတ်ၜက် အကြေပ်အဂြတ်ပရေၚ်ဍုၚ်ကွာန်ဍုၚ်ဗၟာလၟုဟ်မာန်ဂှ်ကဵုဒှ်၊ တၚ်စၞောန် ပျး NCA သွက်ဂွံစဵုဒၞါမၚ်မွဲ ညးဍုၚ်ကွာန်ကောန်အရာပ်ဟွံမွဲကဵုဒုဟ်ဒဏ်တံကဵုဒှ် ညံၚ်ဂွံဆက်ကၠောန်အာ ကမၠောန်ကဵုအရီုဗၚ်ပရေၚ်ဗ္စာရဏာမၞိဟ်တံမာန်ဂှ်ကဵုဒှ် ရေၚ်တၠုၚ်ပ္တိတ်အာဇြဟတ်လၟိုန်ဏောၚ်ဂှ် လလောၚ်ပ္တိတ်လဝ်ရ။

ပ္ဍဲကဵုပေါဲသဳကၠဳပရေၚ်ၜိုဟ်လလမ် ကုဂကောံရပ်လွဟ် (၅) ဂကောံတံဂှ် နူကဵုလ္ပာ်ကံၚ်ဇြဳပၞာန်ဂှ် တၚ်နၚ်မိက်ဂွံပလေဝ် နူကဵုသၞောတ်သ္ဇိုၚ် ၂၀၀၈ တံကီု၊ တၚ်နၚ်မတုပ်လဝ်စိုတ် ပ္ဍဲကဵုပေါဲသဳကၠဳကၠာ တေံကီုဂှ် ညံၚ်ဂွံထ္မံက်ရုပ်ရဴ ရေၚ်တၠုၚ်မာန်ဂှ် သဳကၠဳလဝ်အိုတ်ရ။

သ္အာၚ်နူဂှ်ပၠန် ညံၚ်ဂွံကၠောန်ဗဒှ်ကောံဓရီုပရေၚ်ၜိုဟ်လလမ်ကၟိန်ဍုၚ်မာန်ဂှ်ကီု၊ ကိစ္စပရေၚ်ဒေသဂွံညိၚ် ဝတ်တံကဵု ပရေၚ်ဗ္တိုက်သ္အးဂဥုဲၜူမာဲတံဂှ်လေဝ် သဳကၠဳလဝ်ညးသ္ကအ်အိုတ်ရ။

စပ်ကဵုကိစ္စကၠောန်ဗဒှ်ကောံဓရီုပရေၚ်ၜိုဟ်လလမ်ဂှ်တုဲ ဒဝ်သဝ်မျရာဇာလေန်ဂှ် ဒဒှ်ရဗီုပြၚ်မိက်ဂွံ ကၠောန်ဒၟံၚ်ကောံဓရီု နကဵုမၞိဟ်အောန်န် သွဟ်ခိုဟ်ဟ်ဂွံတိတ်မာန်တံဂှ် ဂ္စါန်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“တၚ်နၚ်အဓိကတံဂှ် ဟီုဟွံဂွံပုဟ်။ အရာဟီုဂွံဂှ်တှ်ေ ဂကောံ NSPNC တံကဵု ဂကောံသဳကၠဳဆဵုဂဗ ဗွဲပလးတံ တၚ်နၚ်မဆဵုဂဗလဝ်ညးသ္ကအ် ပ္ဍဲကဵုဂိတုမာတ်ချ်တေံဂှ် ပလေဝ်ပလေတ်လဝ်ညိညတုဲ တၚ်နၚ်လ္ၚဵုတံဂှ် ထ္ပက်စၟတ်တဲမာန်လဝ်နွံရ။ တုဲပၠန် ကိစ္စစပ်ကဵုပရေၚ်ဗ္စာရဏာမၞိဟ်တံဂှ် တော်ကဵုအလုံ ဍုၚ်မွဲတုဲ သဳကၠဳလဝ်ဂှ်နွံ။ တုဲပၠန် ဟီုလဝ်ပရူ ပရေၚ်ၜိုဟ်လလမ်ဍုၚ်ကွာန်ဂွံသာယာ၊ ပရေၚ်ဒေသဂွံ ညိၚ်ဝတ်တံ နွံရ။ အဓိကဂှ်တှ်ေ ဒေသဒးညိၚ်ဝတ်ဒၟံၚ်ဏောၚ်၊ ဒေသဟွံညိၚ်ဝတ်ပုဟ်ဟီုမ္ဂး ဍုၚ်ကွာန်ဟွံ တောတက်ပုဟ်။ ဟီုလဝ် မတံဏံ နွံရ” သာ်ဝွံ ညးသ္ဂးရ။

ပ္ဍဲကဵုပေါဲသဳကၠဳဏံဂှ် နူကဵုလ္ပာ်ညးစၞး ဂကောံဒေါအ်ပန်ပှော် ၅ ဂကောံတံဂှ် သ္ပစၞး ကုမူသ္ဇိုၚ် PPST ၁၀ ဂကောံ နွံဒၟံၚ်နူကဵုကၠာတေံဂှ်ကီု၊ မူဂကောံ PPST (၇) ဂကောံ လက္ကရဴဏံဂှ်ကီု ကေုာံ မူဝါဒ မကလိဂွံလဝ် နူကဵုဂကောံပ္ညဳပ္ညပ်သဳကၠဳဗွဲပလး နူကဵုဂကောံ NCA-S EAO (၇) ဂကောံတံဂှ်တုဲ သဳကၠဳမာန်လဝ်ရောၚ် သ္ဂးရ။

ပ္ဍဲကဵုဏံ ပ္ဍဲကဵုဂိတုဂျောန် (၁၇) တေံ တၚ်တုပ်စိုတ် (၁၃) တၚ် မကလိဂွံလဝ် နူကဵုကောံဓရီု ဂကောံ NCA-S EAO (၈) ဂကောံ မကၠောန်ဗဒှ်လဝ် ပ္ဍဲဍုၚ်ဇၚ်မာဲ၊ ဍုၚ်သေံဂှ် ပ္တိုန်ထ္ၜးလဝ်တုဲ ပလေဝ်ပလေတ် လဝ်ညိညတုဲ သ္ပဒတန်မာန်လဝ်ရောၚ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ဂကောံဒေါအ်ပန်ပှော် (၅) ဂကောံတံရ။

ဂကောံဒေါအ်ပန်ပှော် (၅) ဂကောံဂမၠိုၚ် ဌာန်ဂအုပ်ဗၠးၜးကောန်ဂကူပအိုဝ် (PNLO) ၊ ဒပ်ပၞာန်ဒတုဲ ဖဵုဒဳမဝ်ကရေဇြဳကရေၚ် (DKBA) ၊ ကံၚ်ဇြဳပရေၚ်ၜိုဟ်လလမ်ကရေၚ် KNU/KNLA-PC ၊ ဗော်သွးဒဳမဝ်ကရေတ်တေတ်လာဟူ (LDU) ကေုာံ ဗော်ဗၠးၜးရးရခေၚ် (ALP) တံဝွံ အပ္ဍဲကာလသီအဝဵုဏံ ဒှ်ဂကောံ EAO ဟွံကေၚ်ဒှ်လဝ်ပေါဲဗ္တိုက် ကုဒပ်ကံၚ်ဇြဳပၞာန်တံရ။

ပရိုၚ်−သြၚ်လောန်တိုၚ်(မ်)