ဟိုတ်နူကၟုဲကြုက် လုပ်စိုပ်ဍုၚ်သေံအောန်ဒၟံၚ်တုဲ ဗၠေတ်ၚ်အာကဵု တၚ်ရန်တၟံကၟိန်ဍုၚ်

ၜၚ်ကံက်၊ ဂျောန် (၃၀)

ဟိုတ်နူကၟုဲအာတရဴကြုက် လုပ်စိုပ်ဂေတ်ဝေၚ်ဍုၚ်သေံ အောန်ဒၟံၚ် နူကဵုမချိၚ်ခယျလဝ်ဂှ်တုဲ ညးအာ တရဴဍုၚ်သ္အာၚ် သၞာံ ၂၀၂၃ ဂွံပေၚ် (၃၀) ပြကောဋိကိုဋ်ဂှ် သ္ဇက်ဒးဗၠေတ်ၚ်အာနွံဒၟံၚ်ရောၚ် တိုက်သြန် RHB မလေဝ်ယှာ လလောၚ်ပ္တိတ်လဝ်ရ။

Barnabas Gan တၠပညာပရေၚ်ပိုန်ဒြပ်ကဆံၚ်လ္တူ နူကဵုတိုက်သြန် RHB ဂှ် ပ္ဍဲသၞာံ ၂၀၂၃ ဏံ လၟိဟ်ညးအာတရဴကြုက် ပ္ဍဲဍုၚ်သေံဂှ်ဝွံ ဒဒှ်ရသဝ်စှ်ေအာ သၟဝ်ထပှ်ပြကောဋိကိုဋ်ဂှ်ကဵု မသုန်ပြကောဋိ ကိုဋ် နူကဵုအလဵုအသဳသေံ မစၟဳစလဝ်တံရောၚ်ဂှ် သ္ပလဝ်တၚ်စၟတ်ရ။

ပ္ဍဲကဝက်သၞာံဒုတိယ သၞာံ ၂၀၂၃ ဏံ ဟိုတ်နူပရေၚ်ပိုန်ဒြပ်ဍုၚ်ကြုက် အယောၚ်အလာလဇုဲလဇ က္တဵုဒှ်မာန်တံဂှ်တုဲ ပရေၚ်အာတရဴဍုၚ်သ္အာၚ်ဂှ် သ္ကဵုသဝ်စှ်ေအာမာန်ရောၚ် ညးချိၚ်ခယျဟီုဂးလဝ်ရ။

Site Minder စပ်ကဵုတၚ်နၚ်ဗွဲလစှ်ေပရေၚ်ကူသာန်သွံရာန်ဗၞိက်ဟဝ်တေဝ်၊ ဝပ်သာ်ကြုက် Meituan ကဵု သၟိၚ်တၠအဝဵုကမၠောန်အာတရဴသေံတံဂှ် ညးအာတရဴ သၞာံ ၂၀၂၃ မလုပ်စိုပ်ကၠုၚ်လဝ် ပ္ဍဲဍုၚ်သေံ ၜိုတ် (၁ ဒဿမ ၃) ပြကောဋိကိုဋ်ဂှ်ဝွံ ဒဒှ်ရ ဒှ်နူကဵုဍုၚ်ကြုက်ဂှ် ထ္မံက်ထ္ၜးလဝ်ရ။

သ္အာၚ်နူဂှ်ပၠန် ပ္ဍဲသၞာံဏံ နူကဵုဂိတုဂျာန္နဝါရဳ ၁ စဵုကဵုဂိတုဂျောန် ၂၅ ညးအာတရဴဍုၚ်သ္အာၚ် ပ္ဍဲဍုၚ်သေံ ဒဒှ်ရလုပ်စိုပ်လဝ် ၁၂ ဒဿမ ၅ ပြကောဋိကိုဋ်ဂှ် ဂွံတီကေတ် နူကဵုဌာနဝန်ဇၞော်ပရေၚ်ထတ်ယုက် ကေုာံ ပရေၚ်အာတရဴ ဍုၚ်သေံရ။

ပ္ဍဲကဵုရာသဳညးအာတရဴဂၠိုၚ်အိုတ် နူကဵုဂိတုဒဳဇြေမ်ဗာ စဵုကဵုအပ္ဍဲဂိတုမေ ဂှ် ညးအာတရဴဂေတ်ဂၠးတိ လုပ်စိုပ်ဒၟံၚ်ဂှ်ဝွံ လၟေၚ်ဂိတု ၜါပြကောဋိကိုဋ်ပြၚ် နွံဒၟံၚ်ဂှ်လေဝ် ဂွံတီကေတ်ရ။

အတိုၚ်တၚ်နၚ် RHB တံဂှ်မ္ဂး လၟိဟ်ညးအာတရဴဍုၚ်သ္အာၚ်လုပ်စိုပ်ဍုၚ်သေံ လၟေၚ်သၞာံဂှ်ဝွံ ပ္ဍဲသၞာံ ၂၀၂၃ ဂှ် အကြာ ၂၆ ပြကောဋိကိုဋ်ကဵု ၂၈ ပြကောဋိကိုဋ် နွံရောၚ်ဂှ် သ္ဂးရ။

ဍုၚ်သေံဝွံ ပ္ဍဲသၞာံ ၂၀၁၉ တေံ ကၠာယဲကၠောံထၞာန် Covid-19 ဂွိုအ်ဒှ်ဂှ် ဂွံဒုၚ်လဝ်တဲ ညးအာတရဴဂေတ် ဂၠးတိ ဗၞတ် ၄၀ ပြကောဋိကိုဋ်တုဲ ပ္ဍဲကဵုပမာဏဏံဂှ် လၟိဟ်ကၟုဲအာတရဴကြုက်တံ ဒှ်ဒၟံၚ်ပန်ဂအုံ မွဲဂအုံရောၚ်ဂှ် ဂွံတီကေတ်ရ။

Ref: Straitstimes