ပ္ဍဲထဝါဲ ညးဒေသမွဲတၠ ဒးဒုၚ်ပန်ဂစိုတ်တုဲ ဟွံအောန်နူကဵု (၅) တၠ ဒးဒုၚ်ရပ်ဒက်

ထဝါဲ၊ ဂျူလာၚ် (၈)

ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် လ္ပာ်ဒေသ(အရှေ့တော) ပွိုၚ်ဍုၚ်ထဝါဲ ရးဒေသဇၞော်တၞၚ်သဳဂှ်ဝွံ ပန်ဂစိုတ်ဏာလဝ် ညးဍုၚ်ကွာန်ကောန်အရာပ်ဒေသမွဲတၠတုဲ ရပ်ဒက်ဏာလဝ် ဟွံအောန်နူကဵု (၅) တၠဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကရောၚ်ပၞာန်ကံၚ်ဇြဳပၞာန် ဇြဟတ်ဒပ် ပါလုပ် ၜိုတ် (၆၀) ပြၚ်ဂှ်ဝွံ ပ္ဍဲဂိတုဂျူလာၚ် (၆) အခိၚ်ဇိုၚ်သဝ်တ္ၚဲဂှ် နူကဵုကွာန်တေန်ဂါန်တုၚ်ဂှ် လုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲကွာန်မျေန်မာတ်တိတ်ရ။

ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန်ဂှ်ဝွံ ဟိုတ်ဟွံမွဲမွဲသာ် ပန်ဂစိုတ်ဏာလဝ် ကောန်ကွာန်မျေန်မာတ်တိတ် ဥူဟာန်ဝေန် ဂတမုက်သ္ၚိညး နကဵုသေနာတ်ရ။

ဗွဲကြဴ ပ္ဍဲဂိတုဂျူလာၚ် (၇) ဂှ် ကရောၚ်ပၞာန်ကံၚ်ဇြဳပၞာန်ဝွံ နူကဵုကွာန်မျေန်မိတ်တိတ် အခိၚ်ဇက်တိုန်ကၠုၚ် ကွာန်ယျေဝိုၚ်ဂှ် ရပ်ဒက်လဝ် ညးဍုၚ်ကွာန်ကောန်အရာပ် မွဲဒမြိပ်ဂၠံၚ်တံ ဟွံအောန်နူကဵု (၅) တၠ နဒဒှ်ဇွောံစဵုဒၞါပၞာန်ဂှ် ညးဒေသမွဲတၠ ဟီုရ။

ဒပ်ကံၚ်ဇြဳပၞာန်ဝွံ စနူဂိတုဂျူလာၚ် (၁) တုဲ နကဵုဇြဟတ်ဒပ် ၜိုတ် (၂၀၀) ကြဴနူလုပ်စိုပ်ကၠုၚ် လ္ပာ် (အရှေ့တော) တုဲဂှ် ပါ်ကရောၚ်ပၞာန် (၃) ကရောၚ်တုဲ ဂေတ်ကွာန်တုဲ ထ္ပက်ဒၟံၚ်ကရောၚ်ပၞာန်ရ။

တုဲကၠုၚ် ပ္ဍဲဂိတုဂျူလာၚ် (၂) တေံဂှ်လေဝ် ကရောၚ်ပၞာန်ကံၚ်ဇြဳပၞာန်ဝွံ ဟိုတ်နူလုပ်စိုပ်ဍိုက်ဗ္တိုက်လဝ် ဗ္ဒိုပ်ကရောၚ်ပၞာန်ကဴဝဴ ဂကောံဒပ်ပံၚ်ကောံ PDF မၞုံဗ္ဒါဲကွာန်တေန်ဂါန်တုၚ်ဂှ်တုဲ သီဂွံဏာလဝ် လွဟ်လက်နက်မကမ်လ္ၚဵုတံတုဲ ကောန်ဂကောံဒပ် PDF မွဲတၠ ပြဟ်လလုဲအာလဝ်၇ဂှ် ဂွံတီကေတ်ရ။

ပရိုၚ်−သြၚ်လောန်တိုၚ်(မ်)

ဗီု−The Tanintharyi Times (ဗီု စံၚ်ဒၟံၚ်ဇွ ဒးဒုၚ်ပန်ဂစိုတ်လဝ်)