ပ္ဍဲကာလသီအဝဵု ညးရီုဗၚ်ပရေၚ်မၞိဟ်ဟွံအောန်နူကဵု ၄၀ ဒးဒုၚ်ဂစိုတ်ဂယျိုၚ်လဝ်

လ္ဂုၚ်၊ ဂျူလာၚ်(၈)

ပ္ဍဲဍုၚ်ဗၟာ ပ္ဍဲကာလဒပ်ပၞာန်သီအဝဵုပွိုၚ်ၜါသၞာံပြၚ်ဏံ ညးရီုဗၚ်ပရေၚ်မၞိဟ်ဟွံအောန်နူကဵု ၄၀ ဒးဒုၚ်ဂစိုတ်ဂယျိုၚ်လဝ်ရဂှ် သၟိၚ်ဇၞော်မဟာဆေၚ်စပ်ကဵု အခေါၚ်အရာမၞိဟ် ကုလသမဂ္ဂ Volker Turk ဟီုသ္ဂးလဝ်ရ။

တုဲကၠုၚ်ပ္ဍဲဂိတုဂျူလာၚ်(၆) ပ္ဍဲကောံဓရီုကၠောန်သ္ပလဝ် ပ္ဍဲဂျဳနဳဗာဂှ် အဃောပ္တိုန်ထ္ၜးပရေၚ်ဍုၚ်ဗၟာဂှ် ပ္တိုန်ထ္ၜးလဝ် အကာဲအရာ ညးရီုဗၚ်ပရေၚ်မၞိဟ်တံ ဒးဒုၚ်ဂစိုတ်ဂယျိုၚ်တံကဵု ဒးဒုၚ်ရပ်ဒက်တံရ။

ညးရီုဗၚ်ပရေၚ်မၞိဟ်ဒးဒုၚ်ဂစိုတ်ဂယျိုၚ်တံဂှ် ပ္ဍဲပေါဲဗ္တိုက်က္တဵုဒှ်မံၚ် အကြာကံၚ်ဇြဳပၞာန်ကဵု ရဲပၠန်ဂတးရပ်လွဟ်တံဂှ် နကဵုတၚ်ရန်တၟအ်နွံနွံ စွံပွန်တုဲ ဒးဒုၚ်ဗ္တိုက်မံၚ်တိုက်ရိုက်တံ ပါလုပ်မံၚ်ရ။

ညရီုဗၚ်ပရေၚ်မၞိဟ် ဒးဒုၚ်ဂစိုတ်မံၚ် ဗွဲမဂိၠုၚ်တံဂှ် ဒှ်ကောန်ဂကောံရီုဗၚ်ပရေၚ်မၞိဟ်ပ္ဍဲဍုၚ်တံတုဲ ပျုတ်ဗ္ဒေက်ကုပွဗ္တိုက်ဂစိုတ်ဂယျိုၚ်တံဏံရောၚ်ဂှ် သၟိၚ်ဇၞော်မဟာ စပ်ကဵုအခေါၚ်အရာမၞိဟ် ကုလသမဂ္ဂ Volker Turk သ္ဂးရ။

ညးတာလျိုၚ် ဂကောံရီုဗၚ်ပရေၚ်မၞိဟ်မွဲတၠဂှ်လေဝ် ကုကောန်ဂကောံရီုဗၚ်ပရေၚ်မၞိဟ် ကၠောန်မံၚ်ပရေၚ်ဟံၚ်ပြာ် ပ္ဍဲပေါဲဗ္တိုက်ၜါလ္ပာ်တံဂှ် ၜိုတ်သ္ပမာန် ညံၚ်ဂွံပါဲဓလေတ်ကဵုအိုတ်ကဵု ညံၚ်ဟွံဂွံကၠောန်သ္ပပန်ပှော်တံဂှ် အာတ်မိက်လဝ်ရ။

” ယဝ်ရသ္ပမာန်တှ်ေ စွံဓရ်ကၠိုဟ်ခၠၚ်လ္တူဂကောံပိုဲတံ ၜိုဟ်ဟ်သြိုဟ်ဟ်တုဲ ညံၚ်သ္ဂောံပါဲဓလေတ်ကဵုရ။ ပ္ဍဲဍုၚ်တၞဟ်ဟ်တံလေဝ် လ္ပာ်တေံလ္ပာ်ဏံ ပန်မံၚ်ရေၚ်သ္ကအ်ဂှ် အခိၚ်ကွဳစက်ဖ္ဍိုက်မၞိဟ်ယဲ တတ်အာတှ်ေ ဒေါံပန်ပှော်တံတုဲ ဗွဲကြဴမှဟေၚ် ဍေံတံကဵုဍေံတံလေၚ်ပန်ပၠန်တံ နွံရ။ လၟုဟ်ဂှ်ဟွံသေၚ်ပုဟ်။ ပိုဲတံအာကပှ် မၞိဟ်ဂိယဲဂှ်ဂှ် ပွပန်ပှော်မံၚ်နကဵုဗီုပြၚ်တၞဟ်ခြာတံ နွံမံၚ်တှ်ေ စိုတ်ဟွံခိုဟ်ပုဟ်။ မိက်သ္ဂောံဒှ်ဂှ်တှ်ေ ယဝ်ရဒှ်မာန်တှ်ေ သွက်ဂွံကၠိုဟ်ကဵု သွက်ကွဳစက်ဖ္ဍိုက်မၞိဟ်ယဲတံရ” ဂှ် သ္ဂးရ။

အတိုၚ်လိက်ဒုၚ်စဳရေၚ် သၟိၚ်ဇၞော်မဟာ စပ်ကဵုအခေါၚ်အရာမၞိဟ်ကုလသမဂ္ဂ Volker Turkဂှ်မ္ဂး ဂကောံရီုဗၚ်ထံက်ပၚ်ကဵုမံၚ် ပရေၚ်ဗ္စာရဏာမၞိဟ်အပ္ဍဲဍုၚ်တံဂှ် ပ္ဍဲကာလသီအဝဵုဏံ ဒးဆေၚ်မံၚ်မုက် ကုအန္တရာယ်ဇၞော်အိုတ်ရဂှ် ထ္မံက်ထ္ၜးလဝ်ရ။

ပ္ဍဲတံဏံဂှ် ဒးဒုၚ်ရပ်ဒက်ဟွံဗဗွဲဓဝ်တံ၊ ဒးဒုၚ်ဍဵုဍိုက်ပျဲပျာံတံ၊ ပွပကီုပရာပ်စပ်ကဵုလိၚ်တံ၊ ပွဂစိုတ်ဂယျိုၚ် နဂအုံဗွဝ်တံ၊ ပွဖျေံဒဏ်ဂစိုတ် လ္ဂောံကဵုသၞောဝ်ဥပဒေတံ မပါလုပ် ပွဖံက်ပ္ကဝ် ဗီုပြၚ်ဓဇန်အိုတ်ထပ်ကဵုထပ်တံဂှ်လေဝ် သ္ပလဝ်စၟတ်သမ္တီရဂှ် ဟီုသ္ဂးလဝ်ရ။

သ္အာၚ်နူဏံပၠန် နကဵုကံၚ်ဇြဳပၞာန် ကၟာတ်လဒဵု အရီုဗၚ်စပ်ကဵုပရေၚ်ဗ္စာရဏာမၞိဟ်တံဂှ် ဖံက်ပ္ကဝ်မံၚ် ဥပဒေ ဗ္စာရဏာပရေၚ်မၞိဟ်တံကဵု အခေါၚ်အရာမၞိဟ် ဍုၚ်နာနာတံရောၚ်ဂှ် ကဵုလဝ်သတိရ။

ညးတာလျိုၚ်ဂကောံရီုဗၚ်ပရေၚ်မၞိဟ် မွဲတၠပၠန်ဂှ်လေဝ် ပ္ဍဲအရာကၠောန်သ္ပပရေၚ်ဟံၚ်ပြာ် ပ္ဍဲပေါဲဗ္တိက်တံဂှ် ဒးဂွိၚ်မံၚ်ကုအန္တရာယ်လမျီုတံကွေံကွေံတုဲ ပ္ဍဲလၟေၚ်ဒဒှ်လ္ၚဵုတံဂှ် နူဒပ်ကံၚ်ဇြဳပၞာန် ပွသုၚ်စောဲကွဳစက်ပရေၚ်ဟံၚ်ပြာ်တံနွံမံၚ်ရဂှ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။

“အခက်အခုဲတံဂှ်တှ်ေ နွံမံၚ်ဗွဲမဂၠိုၚ်ရ။ လဴထ္ၜးလေဝ်ဟွံလေပ်ရ။ ၜါလ္ပာ်ဖျေံမံၚ်ရေၚ်သ္ကအ်။ ဇကုဂှ် ဒးအာကျောဝ် မၞိဟ်ကြေပ်မံၚ်အကြာတံဂှ်တှ်ေ အန္တရာယ်ဂၠိုၚ်ကွေံကွေံရလေဝ်။ ဒးဂွိၚ်ကၠုၚ်ကဵုအန္တရာယ်လမျီုယျဏောၚ်ဟီုတှ်ေ မၞိဟ်ဇီုကပိုက်တံဂှ် ဒှ်သမာပရဟိတတံရ။ ပ္ဍဲကိစ္စလ္ၚဵုတံဂှ် ဍေံတံသုၚ်စောဲ ကွဳစက်ဖ္ဍိုက်မၞိဟ်ယဲတုဲ ဍေံတံအာကၠုၚ်မံၚ်ရ။ ဂှ်တှ်ေ ဂကောံမွဲလ္ပာ်တေံ ညးဒးတှ်ေ ကွဳစက်ဖ္ဍိုက်မၞိဟ်ယဲတံရ အာမံၚ်အတေံ၊ အဏံ ဟာ။ အေဗီုတံဏံလေဝ်နွံမံၚ်ဂှ်ရ စဵုဒၞါဇကုဇကုဂှ်တှ်ေ စဵုဒၞါရလေဝ်။ မိက်သ္ဂောံကၠောန်ဂှ် ကၠောန်ဖျေံဏာဟဂှ်ဟီုတှ်ေ ဗီုတံဏံဂှ် စိုတ်ဟွံခိုဟ်မံၚ်ပုဟ်” ဂှ် ဟီုရ။

အတိုၚ်လိက်ဒုၚ်စဳရေၚ် သၟိၚ်ဇၞော်မဟာ စပ်ကဵုအခေါၚ်အရာမၞိဟ် ကုလသမဂ္ဂဂှ်မ္ဂး ဒပ်ကံၚ်ဇြဳပၞာန်တံ သာတုဲကၠောန်သ္ပကၠုၚ် ပွဗ္တိုက်တရဴကျာတံကဵု ပွပန်ပှော်လွဟ်ဇၞော်တံတုဲ ယဝ်ရဒးၜတ်ကၞာတ်ကဵု သၞာံတုဲကၠုၚ် ပထမ(၆)ဂိတုဂှ်မ္ဂး ပရေၚ်ဗ္တိုက်တရဴကျာ ဂၠိုၚ်တိုန်ကၠုၚ် ၃၃ တၟအ်ကၠံတုဲ ပရေၚ်ပန်ပှော်လွဟ်ဇၞော်တံဂှ်လေဝ် ဂၠိုၚ်တိုန်ကၠုၚ်စဵုကဵု (၈၀)တၟအ်ကၠံရဂှ် သ္ဂးလဝ်ရ။

ပွဗ္တိုက်ကံၚ်ဇြဳပၞာန်ဗွဲမဂၠိုၚ်တံဂှ် စွံပွန်ဗ္တိုက်လဝ် ကွာန်တံ၊ ဘာဗ္တောန်လိက်တံ၊ ရုၚ်ဂဥုဲတံကဵု ဒၞါဲသ္ပဝတ်တံမပါလုပ် ဒၞါဲဒေသကောန်အရာပ်တံ သ္ပဒတူတံမဒှ်ရဂှ် ပါလုပ် ပ္ဍဲလိက်ဒုၚ်စဳရေၚ်ဂှ်ရ။

သ္အာၚ်နူဏံပၠန် အပ္ဍဲကာလဒပ်ပၞာန်သီအဝဵုဏံ ညးဍုၚ်ကွာန်ကောန်အရာပ် ဗ္ဒါဲ ၄၀၀၀ ဒးဒုၚ်ဂစိုတ်ဂယျိုၚ်လဝ်တုဲ ၂၃၀၀၀ပြၚ် ဒးဒုၚ်ရပ်ဒက်လဝ်တုဲ သ္ၚိဒၟံၚ်ဗ္ဒါဲ ၇၀၀၀ ဒးဒုၚ်စံၚ်ပလီုလဝ်ဂှ်ရ ကၟုဲဗ္ဒၚ်၊ စၞစ၊ ဍာ် ကေုာံ မပ္တံပရေၚ်ဟံၚ်ပြာ်လမျီုတံလေဝ် ဒးဆောံလေၚ်လဝ်ရဂှ် သ္ဂးရ။

ဟိုတ်နူကံၚ်ဇြဳပၞာန် ကၟာတ်လဒဵုလဝ် အခေါၚ်လုပ်စိုပ်အရီုဗၚ်ပရေၚ်မၞိဟ်တံ ဗွဲမစှ်ေကဵုသၞောတ်ဂှ်ရ အပံၚ်လၟိဟ်မၞိဟ် ၁၅ ပြကောဋိကိုဋ်ပြၚ်တံ နွံပၟိက်မံၚ် ပရေၚ်ထံက်ပၚ် စၞစကဵုအဟာရတံကာတၟေၚ်ရဂှ် ဂွံတီကေတ် အတိုၚ်တၚ်လလောၚ်တြး ရုၚ်သၟိၚ်ဇၞော်မဟာစပ်ကဵုကုလသမဂ္ဂရ။

ပရိုၚ်-သြၚ်လောန်တိုၚ်(မ်)

ဗီု-Social Media