ဒပ်ကံၚ်ဇြဳပၞာန်ကဵု KIO တံ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ကၠုၚ်

ဗာန်မဝ်၊ ဂျူလာၚ် (၈)

ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန် ဗ္ဒါဲခရိုၚ်လိုၚ်ဇြာ တွဵုရးကချေၚ်ဂှ်ဝွံ ဟိုတ်နူထပ်ဗပေၚ်ကၠုၚ်ဇြဟတ်ဂှ်ရ ပရေၚ်ပၞာန်ၜါလ္ပာ် သာကြံၚ်မ္ၚိုဟ်ကၠုၚ်ရောၚ်ဂှ် ညးဒုၚ်တာလျိုၚ်လလောၚ်ပရိုၚ် ဂကောံဗၠးၜးကချေၚ် KIO သ္ကိုပ်ဗိုလ်ဇၞော်နဝ်ဘူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

စနူဂိတုဂျောန် (၂၆) တုဲကၠုၚ်တေံတုဲ ဒပ်ခမရကံၚ်ဇြဳပၞာန် (၃၈၄) ကဵု ပၞာန်ညးဍုၚ်ကွာန်ယှိုဲမေန်တံ ပံၚ်တောဲတုဲ ထ္ပက်ပၞာန်ဗ္တိုက်လဝ် ဂၠံၚ် (ဆဒုံး−ကန်ပိုက်တီ) တိဍာ်တမ်ဒပ် (၃) ဒပ်ပၞာန်ဗၠးၜးကချေၚ် (KIA) ဂှ်တုဲ အပ္ဍဲဂိတုဂျူလာၚ် သတ္တာဟပထမဂှ် ထ္ပက်လဝ်ကရောၚ်ပၞာန် ဆုတ်ကလေၚ်လဝ် ဟွံမွဲဏီရ။

သ္အာၚ်နူဂှ်ပၠန် ဒပ်ကံၚ်ဇြဳပၞာန်ဝွံ ဆက်ဖျေံလဝ်ဒပ် ပ္ဍဲကွာန်နာန်သာန်ယာန်၊ ပွိုၚ်ဍုၚ်ဝိုၚ်မဝ် သ္ၚောဲနူကဵုဍုၚ်လိုၚ်ဇြာ ဒၞါဲဒတန်ဌာန်ဂအုပ်ဗဟဵု KIO ၜိုတ် ၁၁ မိုၚ်ဂှ်တုဲ ထပ်ဗပေၚ်ဇြဟတ်ပၞာန်တံဂှ် ကၠောန်ၜိုတ်ဒၟံၚ်ရ။

စပ်ကဵုအကာဲအရာ လ္ပာ်ကံၚ်ဇြဳပၞာန်တံ ဗပေၚ်ကၠုၚ်ဇြဟတ်ဂှ်တုဲ သ္ကိုပ်ဗိုလ်ဇၞော်နဝ်ဘူဂှ် အခိၚ်လၟုဟ် ကံၚ်ဇြဳပၞာန်ဝွံ ထပ်ဗပေၚ်ဒၟံၚ်ဇြဟတ် နူကဵုလ္ပာ်မျေတ်ကျဳနာတေံဂှ်တုဲ နူကဵုလ္ပာ်ဗာန်မဝ်တေံဂှ်လေဝ် ထ္ပက်ဒၟံၚ်ကရောၚ်ပၞာန်တံ နွံဂှ် ဟီုရ။

“ပြဟ်ဟ်ဏံဂှ် ညိၚ်ဒၟံၚ်ဏီ။ ဗရုရမျာၚ်သေနာတ်တံဂှ် ဟွံဂွံမိၚ်ရပုဟ်။ ပေါဲဗ္တိုက်တံဂှ် တုဲဒှ်အာ ညိၚ်အာမွဲတဲဓဝ်ဂှ် ဟွံသေၚ်ပုဟ်။ ကရောၚ်ပၞာန် လ္ပာ်ကံၚ်ဇြဳပၞာန်တံဂှ်လေဝ် ထ္ပက်ဒၟံၚ်ဖိုဟ်ရ။ ပရိုၚ်ထပ်ဗပေၚ်ဒၟံၚ် ကရောၚ်ပၞာန် နူကဵုလ္ပာ်မျေတ်ကျဳနာတေံဂှ်လေဝ် ဂွံမိၚ်ဒၟံၚ်ရ။ စိုပ်မံၚ်အလဵုရောဟီုဂှ် ဟွံဂွံတီချိုတ်တ်ပၠိုတ်တ်ဏီပုဟ်။ နူကဵုလ္ပာ်ဗာန်မဝ်ဂှ်လေဝ် ထ္ပက်လဝ်ကရောၚ်ပၞာန်တံ နွံရ။ ပ္ဍဲကဵုစၟတ်တ္ၚဲ ၅ ဂှ် စိုပ်ဒၟံၚ် ဗ္ဒါဲနာန်သာန်ယာန်ယျ။ ဣညအ်တံဂှ် ဟွံရုပ်သီပုဟ်ဟီုတှ်ေ ပေါဲဗ္တိုက်တံလေဝ် သ္ဂောံကလေၚ်ဒှ်နွံဒၟံၚ်။ ဟိုတ်ဂှ်ရ အကာဲအရာပရေၚ်ပၞာန်ဂှ် ကြံၚ်မ္ၚိုဟ်ဒၟံၚ်ဏောၚ်” သာ်ဝွံ ညးသ္ဂးရ။

ပ္ဍဲဂိတုဂျူလာၚ် (၃) တေံဂှ်လေဝ် ကောံဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံညးဍုၚ်ကွာန်တံဝွံ ထပ်ဗပေၚ်ဇြဟတ်ပၞာန်တုဲ ဟိုတ်နူထ္ပက်ကၠုၚ်ကရောၚ်ပၞာန်တံဂှ်ရ က္တဵုဒှ်လဝ်ပေါဲဗ္တိုက် ကုဒပ်ပၞာန်ဗၠးၜးကောန်ဂကူချေၚ် KIA ရ။

အပ္ဍဲပေါဲဗ္တိုက်ဏံဂှ် ဒးဆုတ်ကလေၚ်ကဵုလဝ် ဗ္ဒိုပ်ဒပ်လဂါတ်ကံၚ် မၞုံမုက်ပၞာန် သၟဝ်တဲတမ်ဒပ် (၃) ဒပ်ပၞာန်ဗၠးၜးကချေၚ် (KIA) တံဂှ်ရောၚ် သ္ကိုပ်ဗိုလ်ဇၞော်နဝ်ဘူ သ္ဂးရ။

အခိၚ်လၟုဟ်ဂှ်လေဝ် ကရောၚ်ပၞာန်ကံၚ်ဇြဳပၞာန် မထ္ပက်လဝ်ကရောၚ်ပၞာန် မွဲဒမြိပ်ဗ္ဒိုပ်ဒပ်လဂါတ်ကံၚ်တံသီုဖအိုတ် အကာဲအရာဆုတ်ကလေၚ်အာလဝ်ဂှ် ဟွံဂွံဆဵုကေတ်တုဲ ဟိုတ်နူအကာဲအရာပရေၚ်ပၞာန် ကြံၚ်မ္ၚိုဟ်ဒၟံၚ်ဂှ်ရ ပေါဲဗ္တိုက်တံ ဒှ်ကၠုၚ်အခိၚ်လအ်မ္ဂး နကဵုညးဒေသတံ ဒစးဒုၚ်တုဲ သွက်ဂွံပကောံပကေဝ်ဇွောံမစၞစတံဂှ် နွံပၟိက်ရောၚ် ညးကဵုလဝ်သတိရ။

ဒပ်ကံၚ်ဇြဳပၞာန်ဝွံ အပ္ဍဲဂိတုဂျူလာၚ် သတ္တာပထမဂှ် နူကဵုလ္ပာ်ဗာန်မဝ်−မျေတ်ကျဳနာ−ယှိုဲကူတံဂှ် ထပ်ဗပေၚ်ကၠုၚ်ဒၟံၚ် ဇြဟတ်ပၞာန်တံတုဲ ပ္ဍဲဂိတုဂျူလာၚ် (၃) ဂှ် နူကဵုဗာန်မဝ်ဂှ် ကရောၚ်ပၞာန် (၂) ကရောၚ် ဇြဟတ်မၞုံ ဗ္ဒါဲ ၂၅၀ ပြၚ်တံ ပါ်တုဲ တိုန်ကၠုၚ်ဒၟံၚ်ရောၚ် ဌာန်ပရိုၚ်အပ္ဍဲဒေသတံ ထ္မံက်ထ္ၜးလဝ်ရ။

ပ္ဍဲဂိတုဂျူလာၚ် ၄ ဂှ်လေဝ် ဒပ်ကံၚ်ဇြဳပၞာန် ဇြဟတ်မၞုံ ၜိုတ် (၁၀၀) ပြၚ် နူကဵုဍုၚ်ယှိုဲကူဂှ်ဝွံ ထပ်ထ္ပက်ကၠုၚ်ဒၟံၚ်ကရောၚ်ပၞာန် လ္ပာ်ဗာန်မဝ် အတိုၚ်တရဴဍာ်ရ။

သ္အာၚ်နူဂှ်ပၠန် ပ္ဍဲဂိတုဂျူလာၚ် (၆) တေံ နကဵုကွဳစက်ဖ္ဍိုက်ဗၞိက် သၠာ ၁၂ ပန်ဖ္ဍိုက် နူကဵုမျေတ်ကျဳနာ−ဝိုၚ်မဝ်ဂှ် ဗပေၚ်ကၠုၚ်ဇြဟတ် လ္ပာ်နာန်သာန်ယာန် နကဵုဇြဟတ်ပၞာန်ပေၚ်ၚ်ဂှ် ဂွံတီကေတ် အတိုၚ်ဌာန်ပရိုၚ်အပ္ဍဲဒေသတံရ။

အပ္ဍဲခရိုၚ်လိုၚ်ဇြာ တိဍာ်ထိၚ်ဒဝ် KIO ဂှ် ဟိုတ်နူပရေၚ်ချဳဒရာၚ်ပရေၚ်ပၞာန် ဒပ်ကံၚ်ဇြဳပၞာန်တံ နွံဒၟံၚ်တုဲ ပေါဲဗ္တိုက်တံ အခိၚ်ဟွံရုဲ က္တဵုဒှ်ကၠုၚ်မာန်တုဲ ညးဍုၚ်ကွာန်တံ စွံသတိတုဲ သွက်ဂွံအာကၠုၚ်အိုတ်ဂှ် နူကဵုရုၚ်အုပ်ဓုပ် ခရိုၚ်လိုၚ်ဇြာ လလောၚ်ပ္တိတ်ကဵုလဝ်သတိ ပ္ဍဲဂိတုဂျူလာၚ် (၄) တေံရ။

ပရိုၚ်−သြၚ်လောန်တိုၚ်(မ်)

ဗီု−Social Media