ဗိက်၊ ဂျူလာၚ် (၁၅)
ပ္ဍဲရးဒေသဇၞော်တၞၚ်သဳ အပ္ဍဲပွိုၚ်ဍုၚ်ဗိက်ဂှ် ဟိုတ်နူပရိုၚ် ဒပ်ကံၚ်ဇြဳပၞာန်တံ ကေုာံ နူကဵုဌာနမဆေၚ်စပ်တံ ပံၚ်တောဲတုဲရပ်အာ ဗၞိက်စၞစသုၚ်ကၠုၚ်နူသေံတံကဵု ထဝ်သေံတံဏောၚ် မံက်တိတ်ဒၟံၚ်ဂှ်တုဲ ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရောၚ် ဂွံတီကေတ် ဇရေၚ်ညးဒေသတံကဵု တၠကမၠောန်တံရ။
အပ္ဍဲပွိုၚ်ဍုၚ်ဗိက်ဂှ် ကၠုၚ်စိုပ်နူဂိတုဂျူလာၚ် ၁၇ စဵုကဵု ၁၉ ဂကောံစၟဳတ်နူကဵုနေဗျဳဒဝ်တံ လုပ်စိုပ်စၟဳတ်အာ ထဝ်သေံ ကေုာံ ကပေါတ်သေံတံရောၚ် ပရိုၚ်ဂမၠိုၚ် မံက်တိတ်ဒၟံၚ်ရ။
ဟိုတ်နူပရိုၚ်ဏံတုဲ ပ္ဍဲကဵုဆေၚ်ထဝ်လ္ၚဵုတံဂှ် ကၟာတ်လဝ် ပရေၚ်သွံတြးထဝ်သေံတံ ယာယဳနွံတုဲ သၟာဗၞိက်သွံရာန်ဒၟံၚ် ကပေါတ်ဗၞိက်သေံတံဂှ်လေဝ် ဒေါအ်ဒေၚ်ထောံ ပရေၚ်ပၠောပ်ပ္တိုန်ဗ္ကန်ကပေါတ်ဗၞိက်တံ နွံကၠုၚ်ဂှ် ဂွံတီကေတ်ရ။
မ္ၚးနူကပေါတ်ဗၞိက် ဟွံကဵုလဝ်အကံက်ခေါန်တံဂှ် ရပ်ဒက်အာ သီုကဵုကပေါတ်ဗၞိက် ဟွံလုပ်သၞောဝ်တံဏောၚ်ဂှ်ရ ညးဂမၠိုၚ် ဂွိၚ်ဂွါဲဒၟံၚ်အိုတ်ဂှ် တၠကမၠောန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဍုၚ်ဗိက်ဝွံ ဒှ်ဍုၚ်ပရေၚ်ပိုန်ဒြပ် ရးဒေသတၞၚ်သဳတုဲ ပ္ဍဲကဵုဒေသဂှ်မ္ဂး ရပ်စပ်ဒၟံၚ် ကပေါတ်ဗၞိက်သေံတံ ဂၠိုၚ်အိုတ်တုဲ ဗၞိက်တိတ်နူဍာ် နူဒေသတံဂှ်မ္ဂးလေဝ် ပလံၚ်ပ္တိုန်သွံတြးဒၟံၚ် ဍုၚ်သေံတံ နွံဒၟံၚ်ရ။
အပ္ဍဲကာလသီအဝဵုဏံ ကံၚ်ဇြဳပၞာန်ဝွံ ပ္ဍဲကဵုဒေသသ္ကုတ်အဂၞဲဍုၚ်ဗၟာ ဒေသတွဵုရးဍုၚ်မန်၊ တွဵုရးကရေၚ် ကေုာံ ရးဒေသဇၞော်တၞၚ်သဳတံဂှ် နကဵုတၚ်ထ္ၜးဟိုတ် ကပေါတ်ဗၞိက်သေံတံ ဟွံလုပ်သၞောဝ်ပုဟ်ဂးတုဲ ရပ်ဒက်ဒၟံၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai